Read anuak Mikiya 7 Bible Online

Mikiya 7 - anuak bible

Mikiya 7

¹Wui, aani cwïnya apädhö kiree! Bäŋ ŋat mo cwïnye ena køør Jwøk. Kiper aana määnyö kaamar dïlïm nyïïjenni, kaamar jø wø dädö ki nyïïomøki yïth pwöth, mo bäŋ okut nyïïomøki mo jootge mo di camø, wala nyïïolämmi mo wø kwøŋ ciek.

²Kiper ŋat mo cwïnye ena køør Jwøk ba joot yi ŋöömö, ni bäŋ ŋat mo mare thïïŋ yïthakic jiy. Geni bëët, ge bëëdö ni ge kønynya rem jiy piny, ni ŋati man nø bëëdö ni dwara watge ka ajääp.

³Ceŋ moge tïï gïn mo raac ege kwanyø ni beer kiree. Dïbwödhi ki dïŋut luup wø manynya gïï mo di cïbö jïge ki piny; ni ŋata kare dwøŋ wø caana mana en cwïnye jaak, ni geni luubö wø meenge meenø na aciel.

⁴ŋata no okøø dïge ni beerra eni døc caala koodhø, ni ŋata no okøø ni mare thïïŋ døc, rääye kaala koodhi mo olöör piny. 'Ba uuni, cäŋ mana caan jø koorri ma nyïïkuk Jwøk öö, ni beeye ööny ajäla maru, ni ö paaci ni jïte ko okiera.

⁵Uuni, bëëdu ni bäŋ ŋat mo ŋääth ŋat atut mare, ni bäŋe ŋat mo ŋääth watge. Këël cïïï man wø bëëdï ki gø kiree, bëëdï ni dhiï iï gwøø ki eni.

⁶Kiper wäädö wänni oraaŋe ni ee jarø, ni ö nyeyi ni ö maal bäät menni, ni ö cï nyeyi ni thïïŋ ree dëër waŋi mii cwøre; ni tïm dhaanhe ni nyïïmän moe beege jø wø en paare kiree.

⁷'Ba aani, aano bëëdö naa raŋŋa mar Wuuö Jwøk ni cwïnya da ŋäädhe, naa koora mar Jwøk, eni noo piem aani. Eni na Jwøk mara, dwøra wïnynye wïnynyö.

⁸Wui nyïïmän mowa, kär yïthu mïnnö bäätwa, wa na jø Icriel! Këël wa doo pädhö, wa poot duua maal, ni këël wa doo bëëdö yi muudhö, Wuuö Jwøk poot bëëdö na tar marwa.

⁹Waana bääyö dëër Wuuö Jwøk møn; wëër mare bëëdö ni ena bäätwa këël kanyo pïëme kiper luubö marwa, noo këël tier adïëri marwa piny. Eni wa käle wøk ni bëëtwa yi tar, ni jootwa adïëri mare.

¹⁰'Ba kar kaace nø, oraŋ nyïïmänni mowa, ni ö lään wïci ni ö bäätge, ge na köö jïwa, «?Aŋø, Wuuö Jwøk, Jwøk maru, en kaa?» Waani, geno raŋwa ki nyeŋwa, ni kar kaaca geno nyørø kaamar odhöönh mo jiy caatha dïëre øtjöö.

¹¹U na jø Jerucalem, da nïne mo öö mo kiir maru geerru geerø, ni yïth nïne moøgø, nyeŋ kee mar ŋöömö maru nyiiga ŋäthge kuya.

¹²Ni kanyo tïme na yïth nïröke, jiy oö baŋu, ni ge käla ya Aciria, ki yïth päänye mo Ijep, ki mano täge ki Ijep bäre, këël mano këët bäät Naam Upareeti. Ni ö møøki ki bäät naama dwøŋ këël bäät naama dwøŋ maya, ni ö moa kwörge bäyö bäät kïte ki bäät kïte møga ni öge.

¹³'Ba løø piny mano dööŋ oränynyi ki køør raay mo jø wø bëëdö yie.

¹⁴Wui Wuuö Jwøk, kwaac jiyï na alaŋkaanynyï ena cerï, man wø koorï geni ki gø, ni beege na thöögï na caal pïïth dïëk moï, geni ni wø bëëdö kur keerge kany mo yie da jenni, mo ŋöömö mana en deŋŋe ciek ki caammi. Beerra man kïthï geni Baacan ki Gelät, nee ge bëëtge ni ge cama caammi mo wø ciek kwöröke, kaawat mana bëëde yïth nïra cääŋŋe cøøn.

¹⁵Wui Wuuö Jwøk, nyuuthï jïwa ki gïï mo rëëma ec, kaawat mana kwøŋï nyooth ya acääŋŋe kanya kälï wa wøk ki Ijep.

¹⁶Køøre oraŋ wïth juurre ni lää wïthge, kanyo jootge gø ni teek marge bäŋ gïn mo kønye, ni bëëtge ni ceŋge ege maa dhøkge, ni ïthge ba wïnyö.

¹⁷Geni, geno ööi ni ge muulö yi tør ki bäp yïthge kaamar thwöl, ki gïï wø muuli ki yïth ŋøøm, ni ge ö wøk ka kwör gwøk røk moge ni dëëtge kwanynyi ki lwär, ni ge ööa nyïmï, ï na Wuuö Jwøk, Jwøk marwa, ni dëëtge miel, ni bëëtge ni ge lwäär nyïmï.

¹⁸?Ïïni, a Jwøk mane ni caal ïïni, ï ni wø wëën raay, ni wø wec gïïa bac jiyï na näk thöögï moa dööŋ? Ïïni wëër marï ba bëëdö na bäre bäre, 'ba yiï wø mïnni ka man nyoothï mëër marï ni wø ba jøøl.

¹⁹Ïïni mëër marï wø nyoothï nyoodhø jïwa, ni nyøønï raay mowa piny, ni ö gïïa bacwa bëët ni leeŋï geni yi kut yi naama dwøŋ.

²⁰Ïïni, ï bëëdö niï nyootha adïëri jï nyïïkwaac Jeekap, ni nyoothï mëër marï man wø ba jøøl jïge, ge na dhi øt Eeberam, kaawat mana kööŋï jï kwäcwa yïth nïra cääŋŋe.