Read anuak Neeyam 1 Bible Online

Neeyam 1 - anuak bible

Neeyam 1

¹Man beeye wëëlö mar gïna nyooth jï Neeyam nyï Elköc, ni beeye dwøl mana caal tëër na cäänö kiper pääny Nineba.

²Wuuö Jwøk beeye Jwøk mo cwïnye këënynyö, mo kwör di coolø. Wuuö Jwøk kwör di coolø, ni ena wää wëër. Wuuö Jwøk kwör di coolø dëët jø wø kwier eni, ni bëët wëërri mare bäät nyïïmän moe.

³Wuuö Jwøk ba laar wëër, ni eni teek mare dwøŋ; 'ba Wuuö Jwøk jø raay ba wiie ni ba jääle. Kany wø cäädhe, piny puta jïtö ka apwøyaweerø ka atuunna, ni tïm pøølli na tør mar tiete.

⁴Eni naama dwøŋ di jooø ni taal gø, ni taal näm bëët. Ni ö luumme mo pwöle mo Baacan ki jer Kïn Karmël ni talge, ni ö jer Lur Libaanø moa no oŋøøk ni talge.

⁵Kïte atïmö ni jäŋŋi nyïme, ni ö thuuri ni nigemwøny piny. Piny tïmö ni kwanynyi nyïme, këël ki jiy moa en bäät piny bëët.

⁶?Aŋa ni løny jïre ki man cuŋŋe ki wëër mare? ?Na aŋa ni løny jïre ki man jïëny wëër mare ni wø liel kaamar maac? Wëër mare liela nyïme kaamar maac, ni ö kïte ni piinge nyïme.

⁷Wuuö Jwøk beer, ni ena teek mar jiye cäŋ gïï mo leth. Jiy mo wø kan rege buute di gwøø.

⁸'Ba eni jø Nineba baabe baabø kaamar jwïïö, ni dïïr wïthge, ni riem geni na nyïïmän moe yi muudhö mo cøl kar thøø.

⁹Acaara mano caarge kiper Wuuö Jwøk raanynye raanynyø na bäre bäre, ni bäŋe nyïïmän mo cäŋ duu maal këët.

¹⁰Geni, ge caala jiy mo omeer mo oŋiel køøŋe, ni ge caala koodhi mo otal mo owaaŋ maaci.

¹¹Wui Nineba, da ŋat mo öö ki riï mo cwïnye päŋ ki raay, mo cädö ki gïn mo raac dëër Wuuö Jwøk.

¹²Man beeye mana caan Wuuö Jwøki: ni «Këël na bëët jø Nineba ni ge teek ni ge thööth døc, wïthge poot di dïïrö ni rwäänyge. U na jiya, këël na tïïa uuni nee dëëtu jïtge ki ŋwiili, uuni u ba tïïa nee dëëtu jïtge ki ŋwiili këët.

¹³'Ba ennø, aani teek marge na en bäätu na caal jaath puur man wø jøøny ŋut rwaath raanynya raanynyø, ni cööta thøøli moa twöc uuni ki ge.»

¹⁴Wuuö Jwøk akän wøk ki ciik kiperï, ï na Nineba: «Bäŋ jiy mo jootï këët mo öö ki dëërï mo käära nyeŋŋï. Aani juu moï ki kït gïï wø lam ni wø en yi øt juu moï raanynya raanynyø. Aani bwörö marï jiiŋŋa jiiŋŋø, kiper ï bäŋ karï këët.»

¹⁵Raŋŋu tiet dhaanhø ni ööi enø, ni cura bäät kïdi, na ŋat mo käla luubö mo nyään mo køpa luum bëët-mëër. Wui jø Juuda, bëëdu nou wøøra ajwöm mou, ni cïpu gïïa kööŋŋu ki ge jï Wuuö Jwøk. Kiper jø raay moøgø u ba cäŋge tugö këët. Geni wïthge di dïïrö na bäre bäre.