Read anuak Neeyam 3 Bible Online

Neeyam 3 - anuak bible

Neeyam 3

¹Wui, ï na pääny man wø køny rem jiy piny, otïmö ni raac jïrï. Dëërï opäŋ ki tööt ki twier jiy.

²Wïny dööt nyïbuki, ki dööt tiet jïëth okwëënyi, ki dööt tiet okwëënyi, ki dööt jïëth okwëënyi!

³Jø leny mo bäät okwëënyi ge läännö ni ge rwøya okwëënyi; no opëëlle namal, ni tøøŋi nagaaŋ. Lwaa dhaanhø mo päl di nääö, ni bëët dëëtge na athwöe piny, ni kwään dëët jiy ba thum, ni jiy moo cør kaace, tietge di cwanynyø dëëtge.

⁴'Ba gïïa tägö bëët beeye kiper mana bëët Nineba ni caala dhaagø ma kääbi. Eni mïërö, ni tïïö ki jap ajuuk, ni bïth wïth juurre ki wïth jiy ki køør bëëtö mare manøgø.

⁵Neennu, mana caan Wuuö Jwøki, eni na wïth jammi bëët, bee en, ena köö, ni «Aani, a tïïö dëërï ki gïrpiny. Aani, abïïnï jaara maal ni pïïe wïïï, naa nyootha dëërï jï wïth juurre, ni ö akwöp nyec ni jootge lään wïc marï.

⁶Aani gïïa no okwäk wø leeŋ wïthur leeŋa bäätï, ni mara jar ïïni, ni tïïa ïïni na gïr apääda.

⁷Jø oneen ïïni bëët nyeŋge putge løø wøk dëërï, ni köge, ni ‹Nineba anidwöt. ?Aŋa noo jwöŋi kipere?› ?'Ba ennø, aano jïta kaa ki ŋat mo cøma cwïnyï?»

⁸?Wui Nineba, ki jïrï ni beerra ïïni niï kaala Tëbic, pääny Ijep na en bäät Naam Nail, na näk orööc pïïyi, ni naam ee tïïö na gëëŋi, ni tïïc pïï na kiir mare?

⁹Ithiöpia abëëdö na teek mare, këël ki Ijep, ni bëët teeki mare ni bäŋ cuŋŋe; ni ö Puti ki Libya ni bëëtge na jø køny gø.

¹⁰'Ba jø Thëbic gena käl ni ge mak ka tøŋ, ni ö obwöre ni gøyi ki piny nyeŋ jïëthe ni pet ge na thäŋi, ni ö dïbwöthe moe ni pääŋŋi ki køør nyuuthe mo wø tïïc ki ri kwääk ki baw, ni twöc geni ko oguudi.

¹¹Ï na Nineba thuwø, ï tïmö kaamar ŋat mo omeer ki køøŋø. Kar gwøk røk marï omanynyï niï kana riï ki nyïïmän moï.

¹²Kiiri mo pääny moï moa no ogeerø ni teek tïmö ni caala olaam mo nyïïe ociek, mo noo kenyi, nyïïe puta päth piny ni puti leeŋ dhøk.

¹³Ka adïëri møn, jø leny moï moø ni en yi paac marï yøø, gena mään. Dhøk kiir mo paac marï ojabø jaak. Dïdëëdi mo dhøk kiir moï othöör maaci.

¹⁴Tööm dëërï ki pïï kiper kanyo bëët kiirri no ociel dïër. Tïïc kwör gwøk røk moï ni teek. Ci yo odhöönh ni cwöthï gø, ni tïïï ki thuube.

¹⁵Jiy moï othöör maaci, ni ö tøŋŋi ni dïïr wïthge kaawat man wø tïïc bäänyö. Määny riï ki lwaak mo päl mo caala lwaa bäänyö, ni thööth kaamar lwaa omør.

¹⁶Ka adïëri møn, jø gath moï atïïyï ni thööth ni kaala ceer mo maal, 'ba geni paac wø loonyge loonyø ni aacge, kaawat man wø tïïc lwaa bäänyö.

¹⁷Kwääri moï ki jø kööre moï ge thööth ni caala bäänyö, ni thööthge caala lwaa bäänyö ni wø pï piny bäät kiiri mo pwöth kany wø näk da köö, ni kany wø tuul cäŋŋi, ge puta määtö, ni kany wø cige yie kuc.

¹⁸Wui nyeny Aciria, dïbwöthe moï obuti ki niir thøø, ni ö jø kööre moï ni narge ki narø mo bäŋ cuŋŋe. Jiy moï okeethi bäät kïte, ni bäŋ ŋat mo cooŋ geni këët.

¹⁹Rääö marï na caal ŋwellø ba jïti ki køny, ni ba løny ki man caŋŋe. Jøw wïny gïr ränynyö marï bëët ceŋge paŋge paŋø bäätï, ?kiper gïï wø tïïyï na reyø cooth aŋa ni pööth wøk ki ge?