Read anuak Abakuk 1 Bible Online

Abakuk 1 - anuak bible

Abakuk 1

¹Man beeye dwør Wuuö Jwøk mana caal tëër na ö bäät nyikuŋ Jwøk ma Abakuk.

²Wui Wuuö Jwøk, akëël kany mo nyïëdi nø noo cøøra ïïni kiper køny, ni dwøra ba wïnynyï? ?Na akëël kany mo nyïëdi nø, noo jwöŋa dëërï kiper gïï ni leth ii, niï ba kunynyï?

³?Aperŋø na tïïyï aani nee gïï mo leth jooda? ?Na aperŋø na wëëgï gïï ni reyø ii tägö? Ennø, bëët aranya ki tïïc gïï mo leth ajooda; wëëye ko okiera anyaay.

⁴Kiper manøgø nø, ciik atïmö ni ba tïïö, ni tïm ŋøl luup ni ba thur karge. Jø raay jøøa marge beer acielge dïër, ni tïm ŋøl luup ni di wellø.

⁵«Raŋŋu gïno tïïc wïth juurre ni neennu gø døøc, yïthu othäŋŋi ni rëëm yïthu, kiper aani da gïn mo tïïa tïïö yïth nïne mou, na gïn mo ba ŋääthu këël doo na olamø jïïu.

⁶Kiper ka adïëri møn, aani jø Kaldia tïŋa maal, jøøa näk cwïnyge keec na näk cwïnyge piew ki lac gïrpiny, ni caathge piny bäre ki man macge kwör bëëte moa näk paa moge.

⁷Gena jiy mo di lwäärö, mo dëël kwanynyi ki geni. Ciik marge ki teek marge käla baŋge keerge.

⁸Okwëënyi moge rïïŋö døc ni kaala kwäänynye, ni ge kämö ni kaala orude mo wø lwääge ki wïthïënhö. Jø leny moge ge rïïŋö døc ki bäät okwëënyi, ni ge rïŋŋi ki kany mo bäär, ni ge määnni kaamar odhuuth mo päära bäät gïrpiny.

⁹Ge öö bëët kiper tïï gïn mo leth, ge öö ni gena lwaak ni ge cäänhnha nyïmge ni giirge lwaa dhaanhø ki tøŋ mo caala nyeŋ akwöö.

¹⁰Geni nyeye wø päätge päädö, ni buuge kwääri, ni ŋïërge bäät päänye moa no ogeerø ni teek, ni thørge ŋøøm maal deŋ päänye ni makge geni.

¹¹Køøre ki kany mo thiinh ge puta nimany kaamar jamø, ni laarge pöödhö. 'Ba ge di kwaanø ni geno bääyö, ge na teek marge ege tïïö na jwøk marge.»

¹²Wui Wuuö Jwøk, Jwøk mara, ï na en kur keere, ?aŋø, ï ba käl ya acääŋŋe? Waani, wa ba thøw. Wui Wuuö Jwøk, jø Kaldia akwanyï ki man ŋølge luup. Wui, ï na kïnna teek, tietge akëëlï piny ki man tiirge jiy.

¹³Ïïni, ï tøŋ, niï ba many man neenï gïn mo raac ki waŋï, ni ba løny ki man raŋŋï gïï wø tïïc ni reyø. ?Aperŋø ni neetï jø cwøk jaak en? ?Na aperŋø ni bëëdï niï lïïŋö jaak kany wø öge, ge na jø raay, ni wø thöörge jøøa näk theemma marge ni kaala geni?

¹⁴Ïïni jiy atïïyï kaamar rec, kaamar gïï wø muuli ki piny mo bäŋ dïbwödhi jïge.

¹⁵Ge bëët, gena jwïër jø Kaldia wøk kaawat man wø jwïër rec wøk ko obïth, ni piecge geni kaawat man wø pëëö rec wøk ka ajääp bat, ni køølge geni kanya ciel kaawat man wø køøl rec ya ajääp, ni put yïthge mïnnö ni kanyge.

¹⁶Kiper manøgø nø, ge wø cïpö ko olämme jï ajääpi moge, ni wääŋge ki gïn wø jïye ŋwääi ni met jï ajääpi moge, kiper beeye ki køør gïïögø na jïtge ki kwärö, ni tïm cam marge ni päl.

¹⁷?Aŋø, ge poot bëëdö no opëëlle moge ege wöth wøk ki man bëëtge ni ge nääŋŋa wïth juurre ni cwïnyge ba pädhi?