Read anuak Jepaniya 1 Bible Online

Jepaniya 1 - anuak bible

Jepaniya 1

¹Man beeye dwør Wuuö Jwøk mana ö bäät Jepaniya o Kuuci, Kuuci o Gedaliya, Gedaliya wär Amariya, Amariya wär Edhekaya. 'Ba dwøl manøgø ööi ki kanya bëët Jöcaya wär Amön ni ena nyeya Juuda.

²Wuuö Jwøk aköö, ni «Aani jammi bëët raanynya raanynyø na bäre bäre bäät piny.

³Aani, jiy ge ki lääy bëët, ki weny mo maal, ki rec mo naama dwøŋ, ge raanynya raanynyø. 'Ba kanyo raanynya jiy bäät piny, jøøa reyø geno put ränynyö, ni dööŋge kaamar gïï mo owetø wï thur.

⁴«Aani cera tïŋa maal bäät jø Juuda ki jiy bëët mo wø bëëdö yi Jerucalem ni raanynya ge. Aani kwör wø lam jwø wø cwøl ni Baal yïthge, ki thäk jiy moa no odööŋ ni lama gø, ge raanynya raanynyø. Ni raanynya dïlämme mo juuga path nee nyeŋge ba wïnynyi këët.

⁵Ni beege jø wø këël cøŋge piny bäät uudi, ni wø løø wïthge maal kuna lamge cäŋ ki dwääy ki ceer, ni wø këël cøŋge piny ni kööŋge ri Wuuö Jwøk, ni ge cäŋa kööŋ ri jwø wø cwøl ni Milköm;

⁶ni beege jøøa døø ŋäthge ki man ba cääthge køør Wuuö Jwøk, na kweer ki man manyge gø wala man pëënyge gø.»

⁷Bëëdu nou lïŋö nyïm Kwäärö Wuuö Jwøk! Kiper cäŋ Wuuö Jwøk kare acäännö. Kiper Wuuö Jwøk ree ee nø jiiŋŋø ki man 'näk jiy kaawat man wø 'näk lääy mo wø cïp no olämme, ni jøøa näk ee cwølø kiper 'näk manøgø ee nø jiiŋŋø.

⁸Wuuö Jwøk aköö, ni «Yi cäŋ mano tïïa 'näk mara yie, dïbwöthe, ki wäät nyeya, ki jiy bëët moa näk dëëtge ege røønyø ka abïïk kööŋŋe mo juurre møøk, ge jääla jäälö.

⁹Dïcäŋöca jiy bëët mo wø lam juu mo path, ni wø pääŋ uut juu moge ki jammi mo joot ka køør tïïe mo reyø, ki jap twëër, ge jääla jäälö.»

¹⁰Wuuö Jwøk aköö, ni «Dïcäŋöca, oduuru owïnyi ki Dhi Kiir-Rec, ni ö guyö ni wïnye ki thääŋ paac mana nyään, ni ö dööti mo thööth ni wïnye ki bäät thuuri.

¹¹Wui, u ni wø bëëdö kwör gath, gööu ko oduuru! Kiper jø gath mou bëët di raanynyø, ni ö jø wø rumö ki gwet-bïrö ni ränyge.

¹²Dïcäŋöca, yi Jerucalem meenya meenyø ki lambae, ni jääla jø wø bëëdö jaak ni wø cäänö ki cwïnyge, ni ‹Wuuö Jwøk bäŋ gïn mo beer wala gïn mo raac mo tïïe!›

¹³Geni, jap kwärö moge otwier, ni dööŋ uudi moge ni bäŋ gïrpiny yïthge. Geno gëëdö ki uudi, 'ba ge ba bëëdö yïthge, ni pïïthge ko omøki, 'ba kwøk nyïïomøki ba maathge.»

¹⁴Cäŋa dwøŋ mar Wuuö Jwøk aløny ni kare cään; aløny ni kare cään ni läädö døc ki man laar öö. Cegu ïthu, oduuru mo dwøŋ dagø mo tägö yi cäŋ mar Wuuö Jwøk! Yi cäŋ manøgø, jø leny ge kwöŋŋö ki kwöŋŋö mo leth døc.

¹⁵Cäŋ manøgø tïmö ni beeye cäŋ wëër; na cäŋ kïmmö ki jwør gïï mo leth; na cäŋ aranya ki dïïr wïc; na cäŋ mo piny tïmö na muudhö ni piny dhïïth; na cäŋ mo maal tïmö na pöölö bäre, ki muudhö mo cøl døc.

¹⁶Ni beeye cäŋ mano wïny dwør tuuŋ yie, ki dööt jø leny mo nyaga päänye moa no ogeerø ni teek, ki uut koor moa no ogeer maal yïth gøøde mo kiir.

¹⁷Wuuö Jwøk gïï mo leth kïthe bäät jiy, ni ö jiyi ni cääthge kaamar cööye, kiper raay moa tïïcge dëëre; remø marge nimata piny kaamar pïï, ni tïm rïŋ dëëtge ni caala wär mo oker piny.

¹⁸Bäŋ gwel-bïrö marge wala warkey marge mo løny jïre ki man piem geni yi cäŋ wëër mar Wuuö Jwøk; piny bäre ränynyö ki maa këëny cwïny mare, kiper eni jø bäät piny bëët thööre thöörö ki 'näk ki jöö mo di lwäärö.