Read anuak Jepaniya 3 Bible Online

Jepaniya 3 - anuak bible

Jepaniya 3

¹Otïmö ni leth jï pääny Jerucalem ni wø caar jiy, ni wø gëëmö ni bëëdö ni ba waany!

²Eni bäŋ dwøl mo wïnynye, ni bäŋ acaara mo jïëe. Eni Wuuö Jwøk käre ŋäädhö, ni eni ba nyiik buut Jwøk mare.

³Dïbwöthe moe ge bëëdö kaamar ŋuuwe mo märö, ni ö dïŋut luupi moe ni bëëtge kaamar kwäänynye mo owär, mo ge cämö ka wäär ni bäŋ gïn wecge kiper amöölla.

⁴Nyïïkuk Jwøk moe gena jiy mo wïthge reyø, ni wïth jiy maaŋge maaŋŋø. Dïlämme moe kar lam mana en kur keere atïïcge ni ba waany, ni raanyge ciik.

⁵'Ba Wuuö Jwøk na en yi Jerucalem, mare beeye adïëri, ni eni ba ŋudö ki luup mo patha karge. Ka amöölla cooth adïëri mare wø käle yi tar, ni eni ba døø ŋääe ki gø ki yïth nïne bëët. 'Ba jøøa reyø ge poot temma raay ni wïthge ba lääy.

⁶Wuuö Jwøk aköö, ni «Aani wïth juurre anø raanynya, ni wëëga kwör gwøk røk moge na teek na en gøøde mo kiir ränynyö. Nyeŋ jïëthe moge anø raanynya, ni tïme ni bäŋ ŋat mo cäädhi ki yïthge; ni wëëga päänye moge niruuth ni bäŋ dhaanhø mo obøth na bäre bäre.

⁷Kanyøgø aana cädö ni jø Jerucalem doo løny ki man lwäcge ki aani, ni wïnyge pwöc 'moa. Køøre ŋöömö marge daa wiiø ni ba raanynya këët, ni ö ajäla mara bäre mana näk yaa cïp piny kipere ni ba kïtha gø bääte këët. 'Ba geni, ge poot pänynya maal kuna tïïcge japa reyø ki yïth tïïe moge bëët.»

⁸Kiper manøgønø, Wuuö Jwøk aköö, ni «Koorru aani, kiper dïcäŋo cuŋŋa naa cäänna uuni. Aani, anø ŋøla ki man cooŋa wïth juurre ge ki buc nyeye bëët, nee wëër mara bäre ni wø liel kaamar maac nee kønynya bäätge. 'Ba jø bäät piny bäre geno put maaci thöör mar këëny cwïny mara.

⁹«Køøre aano cïpi ki lëëpi mo waany jï wïth juurre, ni tïmge bëët ni ge cøøra nyeŋŋa, a na Wuuö Jwøk, ni tïnyge aani ni dëëtge ege dwalø na aciel.

¹⁰'Ba jiy moa en løø näp jø Kuuc løøga, ni beege jiy 'moa moa no okeethø ni wø wøør aani, geno känni jïra ki muuce.

¹¹'Ba dïcäŋöca, u na jiya, wïthu ba lääy këët kiper japa reyø bëët na tïïyu dëëra. Kiper jiy bëët mo wø töödö ni pwøya dëëtge, ge raanynya raanynyø yi Jerucalem; ni tïme ni bäŋ dhaanhø mo töödö këët bäät kïdi mara na en kur keere.

¹²'Ba aano kïth yi Jerucalem ki jiy mo mwöl mo dëëtge ege dwøk piny, ni putge bëëtö ni geno göök ri nyeŋŋa, a na Wuuö Jwøk.

¹³'Ba jø Icriel moo dööŋ ni kwøw ge ba bääö këët, ni ge ba cäänö ki tööt këët, ni bäŋ luup cwøk mo wïnynyi dhøkge këët. 'Ba geno cämö ni butge jaak, ni bäŋ ŋat wëëk geni lwär.»

¹⁴Wui Dhayan, ï na caal nyakøø, kwöŋŋï ki met ec! Tïŋ dwørï maal døc, ï na Icriel! Beerra man mïn yiï ni kanynyï ki cwïnyï bäre, ï na Jerucalem na caal nyakøø!

¹⁵Wuuö Jwøk ajäla marï mana dee ï jäälö ki gø akäl wøk bäätï, ni dwøk nyïïmän moï ŋäthge. Wuuö Jwøk, ni beeye nyeny Icriel, nut buutï; bäŋ gïn mo leth mo lwäärï këët.

¹⁶'Ba ï na Jerucalem, dïcäŋöca ocaan jïrï na ennø nø, «Wui, Dhayan, kärï lwäyö! kär bäätï wëëk pädhö.

¹⁷Wuuö Jwøk, Jwøk marï, nut buutï; ena ŋat leny mo teek man wø böödö. Eni yie omïnni ki ïïni ki met ec mo dwøŋ, ni wëëk ïïni nikïïl yi mëër mare; yie mïnnö bäätï ni kwöŋŋe ki met ec.»

¹⁸Wuuö Jwøk aköö jï jø Jerucalem, ni «Kïmmö maru kiper ajwöm mo wø wøørru, käla wøk bäätu; atïmö na tëër bäätu ni känne ki laac wïc bäätu.

¹⁹'Ba dïcäŋöca, jiy bëët moa caar uuni jääla jäälö; 'ba puudhi okønya, ni cooŋa jøøa no okeethø na mak ki tøŋ, ni mooa geni ki pwøc ki wödö bäät piny bäre na kar lään wïc marge.

²⁰Dïcäŋöca u cooŋa cooŋø ni duua uuni pou. Aani, u mooa mooø ki wödö ki pwøc ki yïthakic wïth juurre bëët mo bäät ŋøøm, kanyo cäŋa bëëtö maru dwøk kare ni nëënö jïïu ki nyeŋŋu.» Luummögø caana Wuuö Jwøki.