Read anuak Agëë 1 Bible Online

Agëë 1 - anuak bible

Agëë 1

¹'Ba kanya tïm cwiic Dariöc na ariiø bäät nyec, ni nïr dwää abïciel aciel, dwør Wuuö Jwøk aö bäät nyikuŋ Jwøk ma Agëë kiper Dherubabel o Celatiyal na bëëdö na kwäärö mar akwöm Juuda, ki Jøcua wär Jöcëdëk na näk Kwääy Lam Mana Dwøŋ.

²'Ba gïna caan Wuuö Jwøki, eni na wïth jammi bëët, bee en, ena köö, ni «Jiy moi aköö, ni ‹Ennø, kany geer Øt Wuuö Jwøk yie kare poodi.› »

³Køøre Wuuö Jwøk dwøre aput jääŋŋö ki ri nyikuŋ Jwøk ma Agëë na ennø nø,

⁴na «?Aŋø, bee gïn mo beer ki jïïu ki man bëëdu yïth uudi mo ogeerø ni beyø, ni øtø mara bëëdö no oränynyö?»

⁵'Ba ennø, gïna caan Wuuö Jwøki, eni na wïth jammi bëët, bee en, ena köö, ni «Beerra man cädu kiper bëëtö maru.

⁶Uuna bëëdö nou pïïdhö ki gïï mo thööth, 'ba atïmö ni duua mo nøk. U bëëdö nou cämö, 'ba u ba jäŋ. U bëëdö nou mädhö, 'ba u ba røm. U ruuö ka abïïe, 'ba dëëtu ba murri. U mägö ki jap kwäk mou, 'ba kïïce mou bëëdö kede otuc.»

⁷Man bee gïna caan Wuuö Jwøki, eni na wïth jammi bëët, ena köö, ni «Cädu kiper bëëtö maru!

⁸Ethu maal bäät kïte, ni ŋudu ki jenni ni kälu ge piny, ni geerru øtø mara; køøre nø, yia omïnni ki gø, ni jiem a ki køøre.

⁹U cädö nou jïtö ki mo thööth, 'ba tïmö nou joota mo nøk. 'Ba kany wø kïthu ge paac, puta ka kooth ki jam dhaa.» Køøre Wuuö Jwøk, eni na wïth jammi bëët, aköö, na «?Aperŋø ni wø täk gïïögø? Beeye kiper na weyu øtø mara no oränynyö, ni tïm ŋati man nø ni lääŋŋa øde keere ki man jiiŋ gø.

¹⁰Kiper manøgønø, maal atïmö ni ba cïpi ki thööy, ni ö pinynyi thuwø ni ba cïpe ki caammi.

¹¹Ni cwöla meel bäät pwöth, ki bäät kïte, ki bäät beel, ki bäät jer omøki, ki bäät jer wø nyïïge wel na maaw, ki bäät gïïa no otuy bäät piny, ki bäät jiy ki lääc paac, ki bäät gïïa tïïyu ki ceŋŋu na ööllu ki ge.»

¹²Køøre Dherubabel o Celatiyal, ki Jøcua wär Jöcëdëk, na näk Kwääy Lam Mana Dwøŋ, ki jiy bëët moa no odööŋ na bøth dhøk gïï mo leth, gena jïëy ki dwør Wuuö Jwøk, Jwøk marge, ki luubö mana car nyikuŋ Jwøki ma Agëë, kiper mana ö Wuuö Jwøk, Jwøk marge na jääŋ gø baŋge. Ni ö jiyi ni putge lwäyö ki Wuuö Jwøk.

¹³Køøre Agëë, na jääŋ Wuuö Jwøki, dwør Wuuö Jwøk man acaane jï jiy na ennø nø, ni «Wuuö Jwøk aköö, ni ‹Aani, a bëëdö ka uuni.› »

¹⁴Kanyøgø Wuuö Jwøk atïïö cwïny Dherubabel o Celatiyal na bëëdö na kwäärö mar akwöm Juuda, ki cwïny Jøcua wär Jöcëdëk na näk Kwääy Lam Mana Dwøŋ, ki cwïny jiy bëët moa no odööŋ na bøth dhøk gïï mo leth, ni putge ö maal ni täkge ki geer Øt Wuuö Jwøk, Jwøk marge, eni na wïth jammi bëët,

¹⁵kanya tïm nïr dwää abïciel na pïërariiø kurŋween ri riet cwiiri mo nyeya ma Dariöc.