Read anuak Agëë 2 Bible Online

Agëë 2 - anuak bible

Agëë 2

¹'Ba kanya tïm nïr dwää abïriiø na pïërariiø kurciel, dwør Wuuö Jwøk aö bäät nyikuŋ Jwøk ma Agëë ni kööe,

²ni «Caanï jï Dherubabel o Celatiyal eni na kwäärö mar akwöm Juuda, ki Jøcua wär Jöcëdëk, eni na Kwääy Lam Mana Dwøŋ, ki jiy moa dööŋ na bøth dhøk gïï mo leth, ni kööï,

³na ‹?A jøøe dëëtu ni poot kwøw ni ŋäc bëëtö mar Øt Jwøk man ka ajiem mare mana dïkwøŋ? ?A kawaane ennø, nëëne kaamar ŋø ki jïïu? ?Ba nëëni keda gïn mo bäŋgø jaak ki jïïu?

⁴'Ba ennø, ï na Dherubabel, ki ï na Jøcua wär Jöcëdëk, ni bee ï Kwääy Lam Mana Dwøŋ, ki u na jø paac bëët, magu dëëtu ni tïïyu tïïc; 'ba a ena buutu.› Manøgø caana Wuuö Jwøki, eni na wïth jammi bëët.

⁵'Ba ena cäŋ köö, ni ‹Manøgø beeye luumma tuuda ki uuni kanya ööu wøk ki Ijep. 'Ba jwïëy 'moa poot bëëdö ki uuni. Käru lwäyö.›

⁶«Wuuö Jwøk, eni na wïth jammi bëët, aköö, ni ‹Ki kany mo thiinh, aani, maal ki piny, ki näpa døøŋŋø, ki ŋøøm moa no otal cäŋa ka jäŋŋö ki yie aciel keere.

⁷Ni jäŋa wïth juurre bëët, ni ö jap kwär mo wïth juurre bëët ni käli; køøre a na Wuuö Jwøk, na en wïth jammi bëët, øtø man pääŋa pääŋö ka ajiem.

⁸Kiper gwet-bïrö beege 'moa, ni warkey beege 'moa thuwø, a na Wuuö Jwøk, na en wïth jammi bëët.

⁹'Ba ajiem mar øtø man tïmö ni dwøŋŋa eni døc no opöödhö ki øtø mana dïkwøŋ. 'Ba aani thuwø, bëët-mëër cïba cïbö kany.› Manøgø caana Wuuö Jwøki, eni na wïth jammi bëët.»

¹⁰'Ba kanya tïm nïr dwää abïŋween na pïërariiø kurŋween, ni cwiic Dariöc ariiø bäät nyec, dwør Wuuö Jwøk aö bäät nyikuŋ Jwøk ma Agëë na ennø nø,

¹¹ni «Man bee gïna caan Wuuö Jwøki, eni na wïth jammi bëët, ena köö, ni ‹Pëëny dïlämme ki gïna caan ciiki kiper luubö man.

¹²Ni näk dhaanhø käädö ki rïŋö mo ocïp kur keere na mar Wuuö Jwøk ni ee bääö ka abïï, ni gut møø ki deŋ abïïnögø, wala kadø, wala køøŋ nyïïomøki, wala maaw, wala gïn mo di camø jaak, ?løny ki man tïm gïïögø ni ena kur keerge na mo Wuuö Jwøk?› » 'Ba kanya pëëny dïlämme ki pïëc manøgø, gena köö, ni «Jïre bäär.»

¹³Køøre Agëë aköö, «?A ni näk da dhaanhø mo otïmö ni ba waany ki køør mana gut gïn mo othøw, ni gute ki gïrpiny aciel røk japøge, gïnaca tïmö ni ba waany?» Ni løgi ya dïlämme, ni «Kare, tïmö ni ba waany.»

¹⁴Køøre aløk Agëë, ni kööe, ni «Gïna caan Wuuö Jwøki bee en, ena köö, ni ‹Gïnögø bee teeŋ gïna tïïc jiyi moi ni beege wï jur man, ni nëëni jïra en, kiper tïïe moge bëët ko olämme mo wø cïpge ba waany.

¹⁵« ‹'Ba ki mano täge ennø, beerra man caarru gïna tägö kanya poode ni Øt Wuuö Jwøk poot kär tääö ki geer.

¹⁶Kar kaaca, kany wø näk da dhaanhø mo cøøa kar beel nee jïte ki rumme ma pïërariiø, eni tïmö ni joota rumme apaar keerge. Ni kany wø ö dhaanhø noo ci kar biic nyïïomøki nee jïte ki rumme ma pïërabïïc, tïmö ni joota rumme ma pïerariiø keerge.

¹⁷Aani jammi moa tïïyu ki ceŋŋu bëët araanynya ki jamø mo lïëth, ki twöŋö, ki pey; 'ba u kär duu baŋa. Manøgø caana aani, a na Wuuö Jwøk.

¹⁸'Ba ki mano täge dïcäŋ man ni nïr dwää abïŋween pïërariiø kurŋween, cädu kiper dïcäŋa cagu tier Øt Wuuö Jwøk ki geer.

¹⁹Këël ni bëëde ni bäŋ köödhi mo odööŋ yo odek, no omøki, ko olämmi, ka adikwäle, ki jaath man wø nyïïe wel na maaw poot kär jïtö ki nyïëdi, ki mano täge dïcäŋi ennø kiree, u gwïëdha gwïëdhö.› »

²⁰Kanyøgø, dwør Wuuö Jwøk acäŋ öö ri rietge bäät nyikuŋ Jwøk ma Agëë, ni nïr dwääy pïërariiø kurŋween.

²¹Ni kööe, ni «Caanï jï Dherubabel, eni na kwäärö mar akwöm Juuda, ni kööï, ni ‹Maal ki piny jäŋa jaŋö.

²²Ni ö wäle mo buc nyeye mo wïth juurre ni jaalla ge, ni raanynya teek marge. Ni raanynya jïëth okwëënyi mo leny, ki jø wø kiiw geni. Ni ö okwëëc leny ki jø wø kiiw ge ni päänhge. Ni ö ŋati man nø ni nägi yo opëëllö mar wati.›

²³«'Ba Wuuö Jwøk, eni na wïth jammi bëët, aköö, ni ‹Noo tïme na dïcäŋeca, ï na dhaanhnha ma Dherubabel o Celatiyal, ï lwøra lwørø ni tïïa ïïni kaamar ogut lweedø mara mana näk ree da ŋïï, kiper ï yaa jierø.› Manøgø caana Wuuö Jwøki, eni na wïth jammi bëët.»