Read anuak Dhekaraya 1 Bible Online

Dhekaraya 1 - anuak bible

Dhekaraya 1

¹'Ba kanya bëët Dariöc ni ena nyeya Parca, kanya tïme na ri riet cwiiri moe bäät nyec ki dwää abära, dwør Wuuö Jwøk aö bäät nyikuŋ Jwøk ma Dhekaraya wär Berekiya, nyikwaar Idö.

²Wuuö Jwøk aköö, ni «A na Wuuö Jwøk, aana bëëdö ni aano gootø ki kwäyu.

³Kiper manøgønø, a na Wuuö Jwøk na en wïth jammi bëët, a cäänna uuni, ‹Luu nyïmmu baŋa, nee nyïma luua baŋu.› Manøgø caana aani, a na Wuuö Jwøk na en wïth jammi bëët.

⁴Käru tïmö kaamar kwäyu. Kwäyu luup 'moa ajääŋŋa baŋge kar kaaca ki dhøk nyïïkuk Jwøk 'moa mo acääŋŋe ni kööa, ni ‹Man beeye dwøra, a na Wuuö Jwøk na en wïth jammi bëët: «Ennø, weyu uutjïëthe mou na reyø ki tïïe mou na reyø.» › 'Ba gena kweer ki man cekge ïthge wala ki man wïnyge luumma. 'Ba luummögø caana aani, a na Wuuö Jwøk.

⁵?Age kwäyu ennø? ?A nyïïkuk Jwøk, gena løny ki man bëëtge na bäre bäre?

⁶?Aŋø, luup 'moa ki ciik 'moa na köömma geni ki ge ki dhøk jiya ma nyïïkuk Jwøk kärge kwierø ni jïtge ka ajäla? 'Ba køøre raacge akøpge ni köge, ni ‹Wuuö Jwøk, eni na wïth jammi bëët, gïn atïïe dëëtø ki køør uutjïëthe 'moø ki japa reyø na tïïø, ni beeye tiere ni put gø tïïc møn kaawat mana cooŋ gø.› »

⁷'Ba kanya tïm nïr dwää apaar kurciel na pïërariiø kurŋween, ni beeye dwääna cwøl ni Cebat, ni poot na ri riet cwiic nyec mo Dariöc, dwør Wuuö Jwøk acäŋ ö bäät nyikuŋ Jwøk ma Dhekaraya wär Berekiya, nyikwaar Idö, ni caan japa joode na ennø nø:

⁸Aani, da gïn ma anyooth jïra ki wäär. Aana jïtö ki dhaanhø nyïma mo cäädhi ka bäät okweeny lääy mo kwaar. Ni ööe ni mäk piny ni cuŋŋe tiet jenni bäät waŋ, ni jiy møøk mo cäädhi ka bäät okwëënyi mo kwayø, ki mo obwörö, ki mo tar ena buute.

⁹Køøre aana pëëö, ni «?Kwäärö, moøgø a jøøe?» Ni løgi ya nyïïatwiel maalli jïra mana cäänö ki aani, ni «Aani, tier luubö marge ocaana jïrï.»

¹⁰Kanyøgø ŋata näk cuŋŋö tiet jenni aput løk jïra ni kööe, ni «Jøøgø beege jøøa jääŋ Wuuö Jwøki nee cääthge bäät piny bäre.»

¹¹'Ba jøøgø aputge løk jï nyïïatwiel maal mar Wuuö Jwøk na näk cuŋŋö tiet jenni, ni köge, ni «Waani bäät piny acaathwa bäre, ni jootwa gø na adïëri møn ni jiy bëët geno jwöm ni ge ena yi bëët-mëër.»

¹²Køøre nyïïatwiel maal mar Wuuö Jwøk aköö, «Wui Wuuö Jwøk, ï na wïth jammi bëët, ?A kany mo nyïëdi noo bëëdï ni bäth ec marï ba nyoothï jï Jerucalem ki päänye mo Juuda na gootï ki geni ki cwiiyi na pïërabïriiø ii?»

¹³'Ba aløk Wuuö Jwøki jï nyïïatwiel maal mana cäänö ki aani, ni løøe ka dwøl mo met ki yi cäänö mar cøm cwïny.

¹⁴Køøre nyïïatwiel maal mana cäänö ki aani aköö jïra, ni «Gøø luubö man piny na ennø nø: Ni man beeye luumma caan Wuuö Jwøki, eni na wïth jammi bëët, ena köö, ni ‹Aani, aana këëyö døc kiper Jerucalem ki Dhayan.

¹⁵'Ba aana gootø døc ki wïth juurre moa näk bëëtö marge jööt, kiper kanya bëëda ni aano gootø ki mo thiinh, ge poot bëëdö ni ge meeta tïï gïï mo reyø.›

¹⁶Kiper manøgønø, luumma caan Wuuö Jwøki bee en, ena köö, ni ‹Aani a duua Jerucalem ni bäth ec mara yaa nyoodhø jïre; ni ö øtø mara ni cäŋi geerrø yie, ni ö Jerucalemmi ni cäŋi geerrø bäre.› » Luummögø caana Wuuö Jwøki, eni na wïth jammi bëët.

¹⁷Ni cäŋ köö jïra, ni «Cäŋ luubö man gøø piny na ennø nø: Ni man beeye luumma caan Wuuö Jwøki, eni na wïth jammi bëët, ena köö, ni ‹Päänye 'moa, yïthge cäŋa päŋŋö ki jap kwär, ni cäŋa cwïny Dhayan cømmø, ni cäŋa Jerucalem jierrø.› »

¹⁸Køøre aana lwïthö; 'ba ka adïëri møn tuŋi aŋween mo lääy aputa joot.

¹⁹Kanyøgø nyïïatwiel maal mana cäänö ki aani aputa pëënynyö, ni «?Moi agïïaŋøøni?» Ni løk gø jïra, ni «Moøgø beege jiy moa näk wïthge ege tïŋ maal kaamar tuk lääy, ni beege jøøa wëëk jø Juuda keethø, ki jø Icriel, ki jø Jerucalem.»

²⁰Køøre Wuuö Jwøk jiy aŋween ma rëëmme mo thääth anyoodhe jïra.

²¹Køøre aana pëëö, ni «?Jøøi öge baŋ ŋø nee tïïcge?» Ni løk gø jïra, ni «Rëëmme moøgø ge ööa baŋ jiy moa näk wïthge ege tïŋ maal kaamar tuk lääy, ni beege jøøa wëëk jø Juuda keethø, ni put tïmö ni bäŋ dhaanhø mo løny ki man tïŋ wïïe maal. 'Ba öö marge ge ööa kuna wëëkge jøøgø lwär, nee put ge raanynyø, ni beege wïth juurre moa näk wïthge ege tïŋ maal kaamar tuk lääy ki man raanyge ŋööm Juuda nee jiye keethge.»