Read anuak Dhekaraya 10 Bible Online

Dhekaraya 10 - anuak bible

Dhekaraya 10

¹Pëënynyu Wuuö Jwøk nee køth jääŋŋe bäätu kany wø näk dhi køth. Kiper beeye Wuuö Jwøk ni wø jääŋ køth ki ri pøøl; bee eni ni wø wëëk køth ööny piny kiper jiy, ni wëëk gïïa no opiidhø ciek yïth pwöth jï ŋati man nø.

²Juu moa näk patha adïëri ge cara tööt, ni jø adïëda jammi mo wø carge no onyoodhø jïge beege mo cwøk; geni, ge cara lääk mo patha adïëri, ni ge cøømma cwïny jiy ki gïï mo bäŋ tietge. Kiper manøgønø, jiy geno thääyi kaamar dïëk mo bäŋ dïkwääy jïge, ni caar geni kiper na bäŋe ŋat bwøth geni.

³'Ba Wuuö Jwøk aköö, ni «Aani, gootø mara liel kaamar maac bäät dïbwöthe. Dïbwöthe jääla jäälö; kiper a na Wuuö Jwøk na en wïth jammi bëët, pïïth mara gwøa gwøø, ni beege jø dhi øt Juuda, ni tïïa ge kaamar okweeny leny man wø ŋwöö ki gø ri leny.

⁴'Ba dïbwöthe mo bëëdö kaamar kït gøøt, ki mo bëëdö kaamar mucumääre mo wø gur oduŋkaara piny ki ge, ki mo bëëdö kaamar atheerø mar leny, ki teeŋ dïbwöthe møga bëët, di joodø ki røk jø dhi øt Juuda.

⁵'Ba geni bëët, geno tïmö kaamar jø leny mo teek mo wø nyør nyïïmän moge ri leny yïth odhöönhe mo nyeŋ jïëthe. 'Ba kiper mana näk mo Wuuö Jwøk bëëdö ka geni, geno këëdi ni böötge jø wø këëdi ki bäät okwëënyi.

⁶«Aani jø dhi øt Juuda wëëga tëënnö, ni piema jø dhi øt Jocep. Aani bëëtö marge dwøga kare, kiper bäth ec mara yaa nyoodhø bäätge. Geno bëëdö kaamar jiy mo kede ge kära kwøŋ kwier, kiper aana Wuuö Jwøk, Jwøk marge. Aani lam man wø lämge ki gø løøa løø jïge.

⁷Jø tuuŋ Ipariem geno bëëdö kaamar jø leny mo teek, ni bëëtge ni cwïnyge omïnnö kaamar jiy mo omädhö ki køøŋø. Obwöre moge køny manøgø ojootge ni kanyge; ni ö cwïnyge ni mïnne ki aani, a na Wuuö Jwøk.

⁸Aani, jø Icriel ocwøla ki lwiyø naa cooŋa geni kanya ciel, kiper aani ge ya nø wïïl wøk; ni tïm kwäänge ni thööth ni caala mana kwøŋge bëëtö.

⁹'Ba kanyo keetha geni dï wïth juurre, wïthge parge parø ki aani yïth mïëri moø ni kwörge bäyö yøø, ni ö geni ko obwöre moge ni bëëtge kunece ni cäŋge duuö yi nyïme.

¹⁰Aani, ge duua duuö ki yi ŋööm Ijep, ni gwäära geni ki ya Aciria. Ni ööa ni dääa ge yi ŋööm Gelät ki Libaanø, ni tïme ni bäŋ kany mo di joodø mo ge røma yie.

¹¹Geni, ge puta pöödhö ki yi bëëtö mo leth mo caala athaŋ naama dwøŋ, 'ba aani, athaga manøgø gøøa gøø, nee kwöra päŋ mo Naam Nail talge, ni ö atöör mar Aciria ni puti dwøk piny, ni ö teeki mar Ijep ni ränynye.

¹²'Ba a na Wuuö Jwøk, geno mooa ki teek, ni ö geni ni bëëtge ni ge wøøra nyeŋŋa.» Manøgø bee dwør Wuuö Jwøk.