Read anuak Dhekaraya 14 Bible Online

Dhekaraya 14 - anuak bible

Dhekaraya 14

¹Wui Jerucalem, ka adïëri møn, cäŋ Wuuö Jwøk aløny ni öö, ni beeye cäŋo twier ïïni yie, noo pääŋ jammi moï nyïmï ni nëënö jïrï.

²Wuuö Jwøk aköö, ni «Aani, wïth juurre bëët ge cooŋa cooŋø ni öge kuna këëtge ki Jerucalem. Pääny Jerucalem omak, ni twier uudi moe, ni gøc mään moe ki piny, ni ö thääŋö mar jiy ni mak geni ki tøŋ. 'Ba jiy moo dööŋ ni kwøw, ge ba ŋul wøk këët yi pääny.»

³'Ba Wuuö Jwøk eno døny wøk kuna këëde ki wïth juurre moøgø kaawat man wø këëde dïcäŋ leny.

⁴Dïcäŋöca Wuuö Jwøk tiere okëël bäät Kïn Ølip ki jï løø kur tuul-cäŋ ki Jerucalem, ni ö Kïn Ølip ni kaae ki dïëre ni tägi ka jï løø kur tuul-cäŋ këël jï løø kur pänh-cäŋ, ni put dïëre tïmö na waŋ aleya mo dwøŋ, ni jööt thääŋ kïdi maya jï løø wï-piny, ni ö thääŋŋe maya ni jööt jï løø tier-piny.

⁵'Ba uuno reŋi ki ya aleny kïdi mana tïïe, kiper aleny kïdi mana tïïe okëët ŋööm Adhel. Uuno reŋi kaawat mana reŋu ki dïjäŋ piny mana tägö ri nïr Udhaya, nyeny Juuda. Køøre Wuuö Jwøk, Jwøk mara, eno ööi ki nyïïatwiet maal bëët na en kur keerge.

⁶Dïcäŋöca otïmö ni bäŋ tar, 'ba beeye lwøc mo cøl;

⁷kiper otïmö na cäŋ mo ena kur keere mo ŋäya Wuuö Jwøki, ni beeye cäŋ mo patha dïcäŋ wala wäär. 'Ba noo tïme na ŋec wëëlle, tar otïmö ni dagø.

⁸'Ba dïcäŋöca pï kwøw okwön wøk ki yi Jerucalem, ni ö thääŋö mar pïïögø ni jööt yi naama dwøŋ jï løø kur tuul-cäŋ, ni ö thääŋŋe maya ni jööt yi naama dwøŋ na en jï løø kur pänh-cäŋ; ni manøgø tägi ka yi cwiir ki öörö bäre.

⁹'Ba Wuuö Jwøk otïmö na nyeya kiper bäät piny bäre. Dïcäŋöca Wuuö Jwøk otïmö ni bee Jwøka eni keere, ni nyeŋŋe bee eni keere.

¹⁰'Ba ŋööm paac bäre, ki mano täge Gëba këël Rimön na en jï løø tier-piny ki Jerucalem, otïmö ni ree päärö kaamar ŋööm Araba. 'Ba Jerucalem otïmö ni raŋa maal ni bëëdö kare, ki mano täge ki dhi kiir Benjamen këël buut dhi kiir mana dïkwøŋ na en jï løø dhi kiir mana en gøøt kiir, ki mano cäŋ tägö ki Øt Koor Mar Ananel këël kany wø nywøp køøŋ nyeya yie.

¹¹Jiy obëëdö yie, ni bëëde ni bäŋ acïëni mo ö bääte këët, kiper Jerucalem obëëdö no okoorø.

¹²'Ba ajäl täw mano ö Wuuö Jwøki noo 'näk jiy bëët ki gø moa tïïc leny dëër Jerucalem bee en: Rïŋ dëëtge kwäk ni ge cuŋŋö ki tietge jaak, ni kwäk nyeŋge yïth aguut nyeŋge, ni ö lëëpge ni kwäkge dhøkge.

¹³Dïcäŋöca lwär mo dwøŋ mo käla baŋ Wuuö Jwøk ööa bäätge; ni ö ŋati man nø ni gam cer watge, ni ö manni nø ni tïŋ cere maal bäät watge ni ge pööta rege keerge.

¹⁴Jø Juuda thuwø geno këëdi ni ge gwøga Jerucalem, ni ö jap kwär mo wïth juurre bëët moa en deŋge ni cooŋge ge ni thööth døc, ni beege warkey, ki gwet-bïrö, ka abïïe.

¹⁵'Ba ajäl täw mo caala manøgø thuwø ööa bäät lääc paac mo nyïïmän kuna 'näk ge, ni beege bäät okwëëc lääy, ki gääŋŋe, ka athïrööle, ka arëëni, ki bäät lääc paac bëët moa en yïth twëëre moge.

¹⁶Køøre jiy moo dööŋ ni kwøw ki røk wïth juurre bëët moa tïïc leny bäät Jerucalem, geno wäro ci ki yi cwiir cooth kuna wøørge nyeya ma Wuuö Jwøk, eni na wïth jammi bëët, ni cige ni wøørge ajwöm wø wøør ni jøw ena yïth abïle.

¹⁷'Ba jø bäät piny moo kweer ki man cige Jerucalem kuna wøørge nyeya ma Wuuö Jwøk, eni na wïth jammi bëët, otïmö ni bäŋ køth mo pädhi yi ŋöömö marge.

¹⁸Ni näk mo jø Ijep ge ba ci baŋ wödö, køth otïmö ni bäŋgø mo pädhi yi ŋöömö marge. Wuuö Jwøk ajäla manøgø ojääŋŋe bäätge kaawat mano jääŋŋe bäät wïth juurre moo kweer ki man cige kuna wøørge ajwöm wø wøør ni jøw ena yïth abïle.

¹⁹Manøgø otïmö ni beeye ajäla mano jääl jø Ijep ki gø ki wïth juurre bëët moo kweer ki man wøørge ajwöm wø wøør ni jøw ena yïth abïle.

²⁰'Ba dïcäŋöca luubö man ogöör bäät athaliiŋŋi mo wø en ŋut okwëënyi ni «Gïn ena kur keere na mar Wuuö Jwøk.» 'Ba dääe thuwø mo Øt Wuuö Jwøk otïmö ni ena kur keerge kaamar athääe mo wø en nyïm gïn wø cïp olämme bääte.

²¹Këël dääe bëët moa en yi Jerucalem ki moa en yi Juuda otïmö ni ena kur keerge na mo Wuuö Jwøk, eni na wïth jammi bëët. 'Ba jiy bëët moo wäro ö baŋ cïp olämme, geno lwöti røk dääe moøgø ni tëëtge ki ge. Dïcäŋöca otïmö ni bäŋ dïgäthe këët yi Øt Wuuö Jwøk, eni na wïth jammi bëët.