Read anuak Dhekaraya 2 Bible Online

Dhekaraya 2 - anuak bible

Dhekaraya 2

¹Køøre aana lwïthö ni jïta ki dhaanhø nyïma mo cere da thøør røm.

²Ni pëënynya gø, ni «Ï ciï kaa ŋø cøøn?» Ni løk gø jïra, na «A cøøa kuna røma Jerucalem nee lïŋ dööŋ yie ki bär mare nee jooda.»

³Køøre nyïïatwiel maal mana cäänö ki aani aay, ni put mørri öö ni røømge ki gø,

⁴ni kööe jï gø, ni «Reŋ baŋ nyenece ni cere da thøør røm ice, ni caanï gø jïre, ni ‹Jerucalem otïmö na pääny mo bäŋ kiir deŋŋe kiper mano tïm jiyi ki lääc paac ni thööth yie døc.

⁵'Ba aani ki dëëra, a na Wuuö Jwøk, aano tïmö kaamar kiir jïre mo bëëdö ni caala maac deŋŋe, ni tïma ni aana ajiem mano en yie.›

⁶«Wui, u na jiya, ööu maal, ni rïŋŋu wøk ki yi ŋöömma en jï løø wï-piny, kiper aani uuna nø keetha yïth tuk piny moa na aŋween kwör wø ö jamø ki yïthge.

⁷Wui, jø Dhayan! U ni wø bëëdö yi Babiløn, pänynyu wøk!»

⁸Kiper man bee gïna caan Wuuö Jwøki, eni na wïth jammi bëët, «Køør mana nø jiem aani, aana jääŋŋe baŋ wïth juurre moa caar uuni, kiper ena köö, ni ‹Jø wø gut uuni guta guu waŋa.›

⁹Ka adïëri møn, cera puta ka tïŋ maal bäätge ni jääla ge, ni ö jøøa näk ege caarø ni twierge ge. Køøre nø, putge ka ŋäc ni bee Wuuö Jwøk, eni na wïth jammi bëët, na jääŋ aani.

¹⁰«Wui jø Dhayan! Kwöŋŋu ki met ec, kiper aana öö naa bëëda dïïu. Manøgø caana Wuuö Jwøki.

¹¹'Ba noo tïme na dïcäŋeca, wïth juurre mo thööth geno ö baŋ Wuuö Jwøk, ni tïmge na jiy 'moa thuwø. Ni bëëda dïïu ni putu gø ŋäc ni bee Wuuö Jwøk, eni na wïth jammi bëët, na jääŋ aani baŋu.

¹²'Ba Wuuö Jwøk ŋööm Juuda otïmö na kure yi ŋöömma en kur keere, ni cäŋ Jerucalem jierrø na pääny mare.

¹³Wui u na jiy bëët, noukïïl nyïm Wuuö Jwøk, kiper ena nø ö maal ki kar bëëtö mare na en kur keere.»