Read anuak Dhekaraya 3 Bible Online

Dhekaraya 3 - anuak bible

Dhekaraya 3

¹Køøre Wuuö Jwøk Jøcua na näk Kwääy Lam Mana Dwøŋ anyoodhe jïra ni cuŋŋö nyïm nyïïatwiel maal, ni Ceethan cuŋŋö jï løø bäät cer cwïïe, ni kïtha bäät gø ki luup mo reyø.

²Kanyøgø Wuuö Jwøk aköö jï Ceethan, ni «Nyie Ceethan, ïïno jook Wuuö Jwøki! Wuuö Jwøk na jier Jerucalem ïïno jooe! ?Aŋø, ŋati ni kïthï bääte ki luup mo reyø en paa ŋata caal jaath mo liel mo käl wøk ka yi maac?»

³'Ba Jøcua kanya cuŋŋe nyïm nyïïatwiel maal, eno ruyö ka abïïe mo okïl ki cïlö.

⁴'Ba nyïïatwiel maal aköö jï jiy moa näk cuŋŋö nyïme, na «Abïïk Jøcua moø no okïl ki cïlö yøø, kälu wøk dëëre!» Køøre ena köö jï Jøcua, ni «Raŋï, aani raay moï apaanya bäätï; 'ba dëërï orunynya ka abïïe mo beyø.»

⁵Køøre aana köö jï jøøa en kaace, ni «Kïthu wï Jøcua ka abïï mo tøŋ man wø rïëp wïc.» Kanyøgø abïï mo tøŋ man wø rïëp wïc aputge kïth wï gø, ni runyge dëër gø ka abïïe, ni nyïïatwiel maal mar Wuuö Jwøk poot cuŋŋö buute.

⁶Køøre nyïïatwiel maal mar Wuuö Jwøk Jøcua acäänne na ennø nø:

⁷ni «Man beeye luumma caan Wuuö Jwøki, eni na wïth jammi bëët, ena köö, ni ‹Ni näk miï cäädhö ki uutjïëthe 'moa, ni tïïyï tïïe 'moa, øt lam mara ki yïth käälle moe bëët cïba cerï, ni raŋŋï jammi mo wø tïïc yie bëët; ni jaba jöö jïrï ki man cuŋŋï nyïma kaamar jøøi ni cuŋŋi kany ii.

⁸« ‹Wui ï na Jøcua, ni bee ï na Kwääy Lam Mana Dwøŋ, cek ïthï ki nyïïawäätï moø no opï piny buutï yøø, ni beege jøøa näk nyuuthe kiper gïïo tägi yi nyïm. Kiper ka adïëri møn, aani dhaanhnha na caal lwinh jaath 'käla kälö.

⁹Raŋŋu kïdi mø mana näk yaa cïp nyïm Jøcua! Da nyeŋ abïriiø mo raŋ mo ena dëër kïdi manøgø na aciel enø. 'Ba aani, jammi møøk ogööra bääte; ni ööa ni paanya raay bäät jiy moi ni en yi ŋöömö man en ki dïcäŋ aciel.› Manøgø beeye luumma caan Wuuö Jwøki, eni na wïth jammi bëët.»

¹⁰Wuuö Jwøk, eni na wïth jammi bëët, aköö, ni «Dïcäŋöca, ŋati man nø dëëtu watge cwøle cwølø ki met ec ni pïge piny ki gø tier jaath omøk mare ki tier olaam mare.»