Read anuak Dhekaraya 4 Bible Online

Dhekaraya 4 - anuak bible

Dhekaraya 4

¹Køøre nyïïatwiel maal mana cäänö ki aani aduuö ni jiec aani kaa man wø jiec dhaanhø yïth niine.

²Ni pëëny aani ni kööe, na «?Agïnaŋø ni neetï enø?» Ni løøa gø jïre, na «A neeta gïn wø cuŋ lambae bääte mo otïïö ki warkey, ki mäc abïriiø mo liel wïïe, ni wïïe da wïl maaw ki gïï ma abïriiø mo wø jääŋ maaw baŋ mäc moa liel.

³Eni thuwø deŋŋe da jer wø nyïïe wel na maaw ma ariiø mo ena buut wïlli manøgø, na aciel ena bäät cwïïc, ni ö maya ni en bäät caam.»

⁴Kanyøgø nyïïatwiel maal mana cäänö ki aani apëënynya ni kööa, ni «?Kwääya, moøgø agïïaŋøøni?»

⁵Ni løk gø jïra, na «?Aŋø, gïïögø kuyï?» Ni kööa, ni «Kuua, kwääya.»

⁶Køøre ena köö jïra, ni «Man beeye dwør Wuuö Jwøk mana caane jï Dherubabel, ena köö, ni ‹Paa ki teek wala ki mak røk, 'ba beeye ki køør jwïëy 'moa.› Manøgø caana Wuuö Jwøki, eni na wïth jammi bëët.

⁷«Wui, ï na kïnna dwøŋ! ?Ïïna agïnaŋø? Ïïni, ï tïmö na ŋøøm mo ree päärö nyïm Dherubabel. Køøre eni kïdi mana näk aŋuudi mar geer okäle ni kïth gø dëër Øt Jwøk ni jiy kwöŋŋö ki met ec, ni ‹Eno gwïëth Jwøki! Eno gwïëth Jwøki!› »

⁸Kanyøgø dwør Wuuö Jwøk aput ö bääta ni kööe,

⁹ni «Ceŋ mo Dherubabel tier Øt Jwøk man na nø tääe en ki tïïc, oput thöör. Køøre putu ka ŋäc ni bee Wuuö Jwøk, eni na wïth jammi bëët, na jääŋ aani baŋu.

¹⁰«?Aŋø, aŋa ni wø taak cäŋ man wø täk tïïc ni thiinh yie? 'Ba jiy yïthge omïnni kanyo jootge gïr røm man wø nyooth tiir mar øtø ni ena cer Dherubabel. «'Ba gïïa na abïriiø beege nyeŋ mo Wuuö Jwøk mo wø bëëdö ni wïdö ni raŋŋa bäät piny bäre.»

¹¹Køøre nyïïatwiel maal acäŋa pëënynyö, ni «?Jenni moi na ariiø ii ni wø nyïïe wel na maaw en, na aciel ena cwïï gïn wø cuŋ lambae bääte, ni ö maya ni en bäät caame, tiere aŋø?»

¹²'Ba ena cäŋa pëënynyö, ni «?Bäädi mo jenni mo wø nyïïge wel na maaw moø na ariiø yøø ni en buut gïïö na ariiø yøø no otïïö ki warkey ni yïthge ŋammø ni caala bööl ni wø kuny wøk ki maaw mo caala warkey, gena gïïaŋø?»

¹³Ni løk gø jïra, na «?Aŋø, gïïögø kuyï?» Ni kööa, ni «Kuua, kwääya.»

¹⁴Kanyøgø nø aløøe ni kööe, ni «Gïïögø na ariiø yøø beege jøøa näk wïthge othïïmmö ki maaw ki man tïnyge Wuuö Jwøk, eni na kwääc bäät piny bäre.»