Read anuak Dhekaraya 5 Bible Online

Dhekaraya 5 - anuak bible

Dhekaraya 5

¹'Ba køøre na cäŋa lwïthö, ka adïëri møn, aana put jïtö ki pïën mo onyøŋø mo määdö mo luup Jwøk ogöör bääte.

²Ni kö nyïïatwiel maalli jïra, na «Agïnaŋø ni neetï en?» Ni løøa gø, na «A neeta pïën mo määdö, mo bär mare gööye ma pïërariiø, ni dööŋ yie gööye apaar.»

³Køøre ena köö jïra, ni «Manøgø beeye acïëni mano ö bäät piny bäre. Ka adïëri møn, jiy bëët mo wø kwädö geno raanynyi ki køør luup moa no ogöörö løø pïënögø aciel, ni raany jiy mo wø kööŋ jaak ki tööt ki køør luup moa no ogöörö løø pïënögø aciel maya.

⁴Aani na Wuuö Jwøk na en wïth jammi bëët, pïën manøgø jääŋŋa jääŋŋö wøk, ni døny yïth uudi mo kuuwe ki yïth uudi mo jø wø kööŋ ri nyeŋŋa jaak ki tööt, këël mano thöör wäär ni raanynya uudi mo jøøgø, ni put jenni ki kïte ränynyö moa geer uudi ki ge.»

⁵Køøre nyïïatwiel maal mana cäänö ki aani aö baŋa ni kööe jïra, ni «Lwïthï ni raŋï gïn ni ö wøk en, man näk gïnaŋø.»

⁶Køøre aana pëëö, ni «?Gïnögø aŋøøni?» Ni kööe, ni «Gïnögø beeye oröögö mar røm.» Ni cäŋ köö, «Ni gïnögø beeye raay mo jø bäät piny bäre.»

⁷'Ba gïna näk wï oröögö manøgø orïëbö ki gø, na näk otïïö ki nywïënyö ma eracaac, ree ajabe, ni yo orööŋŋögø da dhaagø mo opï piny yi gø.

⁸Ni kö nyïïatwiel maal manøgø jïra, ni «Dhaaŋŋøgø beeye nyuudhi mar rääö.» Køøre eni dhaaŋŋøgø aput thiel piny yo orööŋŋögø ni put wï oröögö na näk otïïö ki nywïënyö ma eracaac cïëk bäät gø.

⁹Køøre na lwïtha maal, aana put jïtö ki mään ariiø mo jïge da bwöm kaamar aliil, mo ge määdö yi jamø, ni öge ni ceecge orööŋŋögø ni määtge maal ki gø.

¹⁰Kanyøgø nyïïatwiel maal mana cäänö ki aani aputa pëënynyö, no «?Oröögö kïthge gø kaa?»

¹¹Ni løk gø jïra, ni «Ge kïtha gø yi ŋööm Babiløn nee gëënni ki øtø yie. 'Ba kanyo jiiŋ øtø manøgø, eno put bëëtö kare kunece.»