Read anuak Dhekaraya 6 Bible Online

Dhekaraya 6 - anuak bible

Dhekaraya 6

¹Kanyøgø aana cäŋ lwïthö maal ni jooda jïëth okwëënyi aŋween mo ööa wøk ki yïthakic kïte ariiø; 'ba kïte moøgø bëëdö kaamar nywïënyö ma jwïël.

²'Ba jään okweeny mana dïkwøŋ tuta okwëënyi mo kwayø, ni rietge tuta okwëënyi mo cøl,

³ni dääge tuta okwëënyi mo tar, ni ŋweerge tuta okwëënyi mo rege da kït ma apøøl. 'Ba geni bëët ge teek døc.

⁴Køøre nyïïatwiel maal mana cäänö ki aani apëënynya ni kööa, ni «?Kwäärö mara, moi agïïaŋøøni?»

⁵'Ba aløk nyïïatwiel maalli jïra, ni «Moøgø beege jwïëy aŋween mo wø en maal, ni ge ö wøk ka kany wø cuŋge yie nyïm Wuuö Jwøk, eni na kwääc bäät piny bäre.

⁶'Ba jään okweeny mana tut okwëënyi moa cøl aci yïth mïëri moa en jï løø wï-piny, ni ö jään okweeny mana tut okwëënyi moa tar ni läp køør gø, ni ö jään okweeny mana tut okwëënyi moa näk kïtge apøøl ni ci yïth mïëri moa en jï løø tier-piny.»

⁷'Ba okwëënyi moøgø ni teek yøø, kanya tïmge ni ge manynya aa wøk, gena bëëdö ni tietge cäcge cäyö kiper wääth man wïrge bäät piny bäre. Ni kööe jïge, ni «Cou ni wïrru bäät piny bäre!» Køøre gena put cøø ni wïrge gø.

⁸Køøre nyïïatwiel maal aana cwøle ni kööe, ni «Neenï, jøøa jääŋŋi yïth mïëri moa en wï-piny, cwïny Wuuö Jwøk acïpge piny yi ŋöömö mana en jï løø wï-piny.»

⁹Kanyøgø dwør Wuuö Jwøk aö bääta ni kööe na ennø,

¹⁰ni «Ciï ni kännï ki warkey ki gwel-bïrö ki baŋ Kelday, ki Thöbiya, ki Jidaya, jøøa no omaaø ki tøŋ na duuö ki yi Babiløn. 'Ba dïcäŋögø thuwø wär ci po Jöcaya wär Jepaniya,

¹¹ni lwørï warkey ki gwel-bïrö ni tïïï ka aduda ni kïthï gø wï Kwääy Lam Mana Dwøŋ ni beeye Jøcua o Jöcëdëk.

¹²Ni caanï gø jïre ni man bee dwør Wuuö Jwøk, eni na wïth jammi bëët, ena köö, ni ‹Man bee dhaanhø mo nyeŋŋe cwøl ni Lwinh Jaath; eno løth kaamar lwinh jaath kanya en yie, ni geer øtø mar Wuuö Jwøk.

¹³Bee eni noo geer øtø mar Wuuö Jwøk, ni jïte ka ajiem, ni pï bäät wälu mare ni käär paac, ni put tïmö na Kwääy Lam Mana Dwøŋ bäät wälu mare. 'Ba tïïe moø na ariiø yøø odwale ki bëët-mëër.›

¹⁴'Ba aduda ocïp cer Kelday ki Thöbiya ki Jidaya ki Jöcaya wär Jepaniya, nee tïme na gïr par wïc yi øt Wuuö Jwøk.

¹⁵'Ba jøøa kwörge bäyö geno ööi ni kønyge uuni ki geer øtø mar Wuuö Jwøk; køøre putu ka ŋäc ni bee Wuuö Jwøk, eni na wïth jammi bëët, na jääŋ aani baŋu. Gïnögø otägi ni näk dwør Wuuö Jwøk, Jwøk maru, leŋu leŋø.»