Read anuak Milkiya 2 Bible Online

Milkiya 2 - anuak bible

Milkiya 2

¹'Ba Wuuö Jwøk, eni na wïth jammi bëët, aköö, ni «Uuni na dïlämme, ciik man a cäänna uuni ki gø.

²Ni näk mo ïthu ba cegu, ni ba kanu gø cwïnynyu ki man wøørru nyeŋŋa, u jääla jäälö døc, ni tïïa gwïëth man wø gwïëthu jiy ki gø na acïëni. Ka adïëri møn, gwïëth maru yaa nø cien ennø, kiper ciik mara käru kan cwïnynyu.

³Neennu, nyïïu jääla jäälö, ni wëëga täärnyïmmu rwøth ki weenynye mo lääy moa cïp no olämme, ni put uuni wetø ki gø na aciel bëët.

⁴Køøre nø, putu ka ŋäc ni ciik man yaa nø jääŋŋö jïïu kiper nee luumma tuuda nee bëëde ni nut yïthakicwa ki nyïïkwaac Libay na näk dïlämme.» Gïnögø caana Wuuö Jwøki, eni na wïth jammi bëët.

⁵Ni cäŋ köö, ni «Gïna tuutwa ki nyïïkwaac Libay, tiere beeye luum kwøw ki bëët-mëër, ni cïba gø jïge kiper naa wøørge, ni ö geni ni wøørge aani ni lwäärge nyeŋŋa.

⁶Geni, gena pöö ki pwöc ma kare, ni bäŋ gïn mo obøth mo owïnynyö dhøkge. Gena bëëdö ki aani ki bëët-mëër ni cwïnyge leer, ni duuge jiy mo thööth wøk ki jöör raay.

⁷«Kiper dïlämi doo naa bëëdö ni ciik Jwøk ŋääe ni ena dhee, ni di jiyi ö baŋe kiper pwöc, kiper bee eni na jääŋ Wuuö Jwøki, eni na wïth jammi bëët.

⁸'Ba uuni, uuna gaa wøk øtjöö, ni wëëgu jiy mo thööth pädhö ki køør pwöc mou, ni raanynyu gïna tuuda ki nyïïkwaac Libay.

⁹Køøre nø aani thuwø, uuna tïïa ni uuno dwøk piny, ni uuno taaø dï jiy, kiper na käru jööra gwøø, ni jeenynyu jiy ki køør ciik Jwøk.» Gïnögø caana Wuuö Jwøki, eni na wïth jammi bëët.

¹⁰?Aŋø, jïïø ba da wääø aciel? ?Ni patha Jwøk aciel na cwääc øøni bëët? ?Aperŋø nø, ni bëëdø ni ŋati man nø dëëtø tïïö ka atade dëër coki, ni päädø gïna tuut Wuuö Jwøki ki kwäyø?

¹¹Jøøa bëëdö yi ŋööm Juuda gena tïïö ka atade, ni tïïge ki gïn mo raac døc yi Icriel ki yi Jerucalem, kiper jøøa bëëdö yi ŋöömmögø, øt lam na en kur keere mar Wuuö Jwøk mana mëëre ki gø apäätge ki køør mana nyöömge ki mään mo wøøra jwøk mør.

¹²Beerra man ö Wuuö Jwøki ni raany teeŋ ŋatøgø nø ki nyïïkwaaye bëët dï jic Jeekap, ni tïme ni bäŋ ŋat mo dööŋ jïre mo cïpi ko olämme jï Wuuö Jwøk, eni na wïth jammi bëët.

¹³Gïn mør maa cäŋu tïïyö thuwø beeye en; u jwöŋö lak gïn wø cïp olämme bääte, ni tïm pï nyeŋŋu ni øya piny bääte, nou kïmmö kiper mana ö Wuuö Jwøki na ba neen jï muuce mou, ni ba jïëc geni baŋu, ni yie ba met ki geni.

¹⁴Ni pëëu ni kööu, na «?Aperŋø na ba jïëc geni?» 'Ba beeye kiper Wuuö Jwøk bëëdö ni neeta luum nywöm mana tuutu yïthakiyu ki cïïï mana nywømï ni ïïna wøp; 'ba ïïna tïïö ka atade dëëre, këël na bëëde ni uuna dëël aciel ki gø ni näk cïïï na tuutu luum nywöm ki gø.

¹⁵?Aŋø, u kär tïïc Wuuö Jwøki na dëël aciel na jwïëy aciel ki cïïï na bëëde? ?Aperŋø na ö Wuuö Jwøki na tïïc gïnögø? Beeye kiper nou jïtö ko obwöre ma jø Jwøk ma adïëri. Kiper manøgø nø, gwøgu dëëtu, nee bäŋe ŋat mo tïïö ka atade dëër cïïe mana nywøme ni ena wøp.

¹⁶'Ba Wuuö Jwøk, Jwø Icriel, eni na wïth jammi bëët, aköö, na «A män ka apääk, ni mäna ki ŋat mo tïïya gïï mo reyø dëër cïïe. Kiper manøgø nø, gwøk dëërï, ni ba tïïï ka atade.»

¹⁷Uuni, Wuuö Jwøk aööllu ki luup mou. 'Ba uuna köö, ni «?Eni ewa öölö nidïï?» Beeye kiper mana kööu, ni «Ŋat wø tïïc gïn mo raac poot beer ki nyïm Wuuö Jwøk, ni Wuuö Jwøk yie met ki ŋatøgø.» Wala u köö, ni «?Jwøk ni wø ŋøl luup na karge en kaa?»