Read anuak Milkiya 3 Bible Online

Milkiya 3 - anuak bible

Milkiya 3

¹Wuuö Jwøk, eni na wïth jammi bëët, aköö, ni «Neennu, aani nyïïatwiel mara ojääŋŋa, ni ö eni ni jiiŋ jöö nyïma; ni ö kwäärö na manynyu ni ö yi øt lam mare ni cwöba rou. 'Ba eni na nyïïatwiel mano käär luumma tuut Jwøki ki jiy oööi, ni beeye ŋata met yïthu ki gø.»

²?'Ba aŋa noo løny jïre ki man jïëny gïïo tägi dïcäŋo ööe? ?Na aŋa noo cuŋŋi kanyo pïïe? Kiper eni caala maac mo twøna warkey nee tïme ni tøŋ, ni caala caabuun man wø tïïc abïï ni tar.

³'Ba eni, eno bëëdö ni caala ŋato leeny gwel-bïrö ni twøn gø; ni ö eni ni tïïc nyïïkwaac Libay ni waany, keda man wø twøn warkey wala gwel-bïrö, ni twøn ka maac, kiper nee ge cïpge ki muuce jïra, aa na Wuuö Jwøk, ni cwïnyge leer.

⁴Køøre nø, muuce moo cïp jøøa bëëdö yi ŋööm Juuda këël jø Jerucalem otïmö ni tïïya yia ni met, a na Wuuö Jwøk, keda mana bëëde dïkwøŋ yïth cwiiri moa pöödhö.

⁵Wuuö Jwøk, eni na wïth jammi bëët, aköö, ni «Aano ö baŋu kuna jääla uuni, ni puta mara caan dëët ajuuk ki jø luuy ki jø wø kööŋ ni marge tööt, ki jø wø møt gwet jø tïïc, ni wø thiel määr thuunhnhi ki kïïe piny, ki jø wø daaŋ luum wëëlle mo path ki jöö mo patha kare; ni beege jø wø ba lwäär ki aani thuwø.»

⁶'Ba Wuuö Jwøk, eni na wïth jammi bëët, aköö, ni «A na Wuuö Jwøk, acaaya ba wiila; ni beeye tiere ni käru ränynyö na bäre en, u na nyïïkwaac Jeekap.

⁷'Ba ki mana täge cøøn ki ri kwäyu, uuno gaa wøk ri ciik 'moa, ni käru geni gwøø. Ennø, duu baŋa; køøre nø, aano duu baŋu. «'Ba uuna köö, ni ‹?Waano duuwa baŋï nidïï?›

⁸«?Aŋø, løny jï dhaanhø ki man møt Jwøk? 'Ba uuni aana møtu. «'Ba uuna köö, ni ‹?Ï ewa mødø nidïï?› «Møt mana mudu ki gø beeye mana käru cïpö ki paac wïth jammi ki muuce.

⁹Pou bäre ki jiy bëët moa en yie ocienø kiper mana møtu aani.

¹⁰'Ba beeye aani na Wuuö Jwøk, a na wïth jammi bëët, ni cäänö en. Ennø, kälu paac wïth jammi na karge ni kïthu gø kar kan na en yi øt lam mara, kiper nee tïme ni da cam yi øda kaace. Tïïyu gïn nou päänynya aani; køøre ojootu ni maal yaa jabø ni wëëga gwïëth mo päl døc ööny bäätu, këël mano rømu ki gø.

¹¹Bäänyö mäna mänö ki man cam caammi mou, ni ö nyïïomøki ni ba päthge piny ni poot kär ciek.» Gïnögø caana Wuuö Jwøki, eni na wïth jammi bëët.

¹²Ni cäŋ köö, ni «Juurre bëët oköö ni dëëtu gum, kiper mana bëëdu paac mo yïth jiy met ki gø.» Gïnögø caana Wuuö Jwøki, eni na wïth jammi bëët.

¹³Wuuö Jwøk aköö, ni «Uuna cäänö ki luup mo teek dëëra. «'Ba uuna köö, na ‹?A luumma ŋø na caanwa dëërï?›

¹⁴«Ni kööu, ni ‹Ki man tïny Jwøk beeye gïn mo bäŋ tiere.› Ni kööu thuwø, na ‹?Agïnaŋø na jootwa ki køør mana gwøkwa ciik moe, wala ki køør mana bëëtwa ni wa kïmmö nyïm Wuuö Jwøk, eni na wïth jammi bëët?

¹⁵'Ba ennø, ki baŋwa jø atöör beege ni yïthge met. Jø wø tïïc gïï mo reyø tïmö ni kwärra geni, ni ö geni ni päänyge Jwøk ni bäŋ gïn mo tägi dëëtge.› »

¹⁶Køøre jøøa lwäär Wuuö Jwøk gena cäänö yïthakicge keerge, ni ö Wuuö Jwøki ni cek ïthe ni wïny marge. Ni ö wëëlö ni gööri nyïme kiper jøøa lwäär eni na wøør nyeŋŋe, nee bëëtge ni ge di lääŋŋö.

¹⁷Ni kö Wuuö Jwøki, eni na wïth jammi bëët, ni «Geno tïmö na 'moa, ni tïmge na thööga dïcäŋo täga ki tïïc. Ni bäädha cwïnya ki geni keda man wø ö dhaanhe wø bääth cwïnye ki wääde man wø tïny gø.

¹⁸Køøre nø, ocäŋ tïmö ni løny jïïu ki man ŋäyu ŋata beer ki ŋata raac; këël ŋat wø tïny Jwøk ki ŋat wø ba tïny gø ŋäyu ŋääö thuwø.»