Read anuak Mathiew 12 Bible Online

Mathiew 12 - anuak bible

Mathiew 12

¹'Ba kanyøgø Jecu acør dï pwöth beel ki cäŋ jwömö. 'Ba bääge onäk käci, ni täkge ki man tøcge wïth beel ni ŋiinyge ge ni nyamge ge.

²'Ba gïnögø na jooti ya jø Paricithi, gena köö jïgø, ni «Neenï, bäägï ge tïïya gïn mo ba doo tïïö ki cäŋ jwömö.»

³'Ba Jecu aköö jïge, na «?Aŋø, gïna tïïc Deebiti käru kwaanø, kanya 'nägi ya käci, ki jøøa cäädhö ki eni bëët?

⁴Eni, ena døny Øt Jwøk ni lwør muuga näk nyuuthe ni cam ge, na näk ba doo beer jïre ki man cam ge wala ki man cami ya jøøa cäädhö ki eni, 'ba beer kaper dïlämme keerge.

⁵?Aŋø, luubö mana no ogöörö yi ciik Jwøk käru kwaanø thuwø, ni kany wø näk cäŋ jwömö, dïlämme mo wø tïïö Øt Jwøk Mana Dwøŋ luum cäŋ jwömö wø dhalge dhalø, ni ba jääl ge?

⁶'Ba aani, a cäänna uuni, ni gïn mør mo dwøŋŋa eni ki Øt Jwøk Mana Dwøŋ ena kany.

⁷'Ba doo naa tier gïna caan Jwøki ŋäyu, na køp, na ‹A manynya mëër ni kaala olämme,› jøøa bäŋ ajäla røkge ba dou jäälö.

⁸Kiper Wär Dhaanhø beeye Kwääy cäŋ jwömö.»

⁹'Ba Jecu aay kaace, ni døny yi øt acooŋ lam.

¹⁰'Ba kanyøce da ŋat mo cere obäp. 'Ba geni Jecu apëënyge, ni «?Beeye gïn mo beer ki man køny dhaanhø mo tuu ki cäŋ jwömö?» Luummögø acaange kiper nee jïtge ki luubö mo kïthge bääte.

¹¹'Ba ena köö jïge, na «?Aŋa dïïu, ni näk mo jïre da diel aciel, ni ö dierøgø ni päth yi buur ki cäŋ jwömö, ni ba käl gø wøk?

¹²?Aŋø, ba letha per dhaanhø ki diel? Kiper manøgønø, beeye gïn mo beer ki man tïïc gïn ma wøp ki cäŋ jwömö.»

¹³Kanyøgø ena köö jï ŋata näk cere obäp, ni «Rwiec cerï.» Ni ö ŋatøgø ni rwiec cere, ni put cere døø kare na wøp ni caala maya.

¹⁴'Ba jø Paricith gena aa wøk ni tuutge gïr Jecu, kiper yi jöö mano 'näkge gø ki gø.

¹⁵'Ba kanya ö Jecu na ŋäc gïnögø, ree adaae kaace. Ni ö jiyi mo thööth ni läpge køøre. Ni køny jiy moa tuu bëët.

¹⁶Ni kööm geni nee eni ba waacge.

¹⁷Manøgø beeye kiper gïna caan nyikuŋ Jwøki ma Aydheea nee thur kare, na kööe,

¹⁸na «Adïëri møn, ŋat tïïc mara na jiera, ni beeye omëëya, ŋata met yia ki mare, Jwïëya okïtha bääte, ni beeye eni noo køp luum ŋøl luup mo beer mar Jwøk jï wïth juurre.

¹⁹'Ba eni ba pïëmö, ni ba lweelli, ni bäŋ ŋat mo wïny dwøre uutjïëthe.

²⁰Ni ba toor otöök mo onyøc, ni ba jwöc maac mo duuŋ, këël mano wëëk ŋøl luup mo beer mar Jwøk thur kare.

²¹Ni nyeŋŋe beeye noo ŋääth wïth juurre.»

²²Kanyøgø ŋat ma cwør mo ba cäänö, mo dëëre da anägö, akäl baŋ Jecu. Ni ö Jecu ni køny ŋatøgø, ni tïm ŋatøgø ni ba cäänö enø, ni cäänö ni nëënö.

²³Ni rëëm yïth jiyi bëët, ni köge, na «?Aŋø, ŋati paa Nyikwaar Deebit wän?»

²⁴'Ba na ö jø Paricithi na wïnyge gïnögø, gena köö, ni «Beeye kwääy anäge ma Bieldhebap keere, ni wø ö ŋati wø riem anäge wøk ki nyeŋ gø.»

²⁵'Ba Jecu gïïa caar jøøgø ŋääe, ni kööe jïge, ni «Mïëri bëët mo wø pääŋ rege, ränynyö. Ni bäŋ pääny wala jø dhi øtø mo pääŋ rege ni cuŋŋe.

²⁶'Ba ni näk Ceethan dëëre rieme wøk, eni pääŋŋa ree keere. ?Aŋø, buye a dee cuŋŋö nidïï?

²⁷?'Ba ni näk ma anäge wø riema wøk ka teek Bieldhebap, a jiyu nø, anäge wø riemge ge wøk ki nyeŋ ŋa? 'Ba beeye geni noo ŋøl maru piny.

²⁸'Ba ni näk Jwïëc Jwøk beeye wø riema anäge wøk ki gø, beeye buc Jwøk na ö bäätu.

²⁹?'Ba dhaanhø a dee døny øt ŋat mo teek nidïï kuna twier jap gø, ni näk ŋata teek käre kwøŋ mak ni twöc gø? Køøre nø, eni cøø møn ni twier øt gø.

³⁰Ŋat wø ba en kura, eni män ki aani, ni ŋat wø ba cuuŋö ki aani, mare beeye keth.

³¹Kiper manøgønø, a caana gø jïïu, ni teeŋ raay bëët ka ajaany owëën Jwøki. 'Ba ŋat wø jany Jwïëc Jwøk ba wëën Jwøki.

³²'Ba ŋato wäro cäänni ki luubö mo raac dëër Wär Dhaanhø, eno wëën Jwøki. 'Ba ŋat wäro cäänni ki luubö mo raac dëër Jwïëc Jwøk na en kur keere, eni ba wëën Jwøki yi pinyi en wala yi mano ööi.

³³«Jaath mo beer wø nywøla nyïëdi mo beyø, ni jaath mo raac wø nywøla nyïëdi mo reyø. Kiper jaath wø ŋec ka nyïïe.

³⁴?U na nyïï thwöre, luubö ma wøp a dou gø caanø nidïï nou reyø? Kiper gïï wø thööth ni wø en cwïny beege ni wø caan dhøki.

³⁵Kiper ŋata beer wø käla gïn mo beer wøk ki røk japa beyø na en cwïnye. 'Ba ŋata raac wø käla gïn mo raac wøk ki røk japa reyø na en cwïnye.

³⁶'Ba a cäänna uuni, ni dïcäŋo ŋøl luup yie, luup bëët mo wø caan jiyi ni bäŋ tietge jaak, ocäŋ døø wïthge.

³⁷Kiper ïïno ŋunni ki køør dwørï, ni jääl ïïni thuwø ki køør dwørï.»

³⁸Kanyøgøøni dïpööye møøk mo ciik Jwøk ki jø Paricith aköö jï Jecu, ni «Dïpööy, wa manynya ŋïï mo neenwa neenø baŋï.»

³⁹'Ba adwøk Jecu jïge, ni «Jø pinyi ni reyø ii ni wø kwier luum Jwøk en, ge manynya ŋïï, 'ba bäŋ ŋïï mo nyooth jïge. 'Ba beeye ŋïï mar nyikuŋ Jwøk ma Joona keere noo nyooth jïge.

⁴⁰Kiper Wär Dhaanhø ojïti ki nïne adäk ki wärre adäk piny, kaawat mana ö Joona na bëëde yi rëëö ki nïne adäk ki wärre adäk.

⁴¹'Ba jø Nineba, geno ö maal ni jäälge jø pinyi en, dïcäŋo ŋøl luup yie. Kiper geni cwïnyge aløkge kanya ö Joona na køp luum Jwøk jïge. 'Ba ennø, da gïn mo dwøŋŋa eni ki Joona mo ena kany.

⁴²Nyenynya näk dhaagø mar paana en jï løø tier-piny, ööa maal ni jääl jø pinyi en dïcäŋo ŋøl luup yie. Kiper eni ööi ka kany mo bäär døc kuna wïny leec wïc mar Cølöman. 'Ba ennø, da gïn mo dwøŋŋa eni ki Cølöman mo ena kany.

⁴³«Kany wø ö jwøa raaci wøk dëër dhaanhø, eni wø wïïra kany mo bäŋ pïï, ni manynya kar jwöm. 'Ba eni bäŋ wø jïti.

⁴⁴Kanyøgø eni wø köö, na ‹A døøa øda, kanya kwøŋa bëëtö yie.› 'Ba noo ööe, cwäne cwänö ni ŋaam no ojwiiø no ojiiŋŋø.

⁴⁵Køøre nø, eni wø aay ni känne ki juu abïriiø møøk mo kadha rääö marge ki mare, ni dønyge yie, ni putge bëëtö kaace. Ni ö bëët ŋatøca ni tïme ni raac døc ni kaala mana dïkwøŋ. Beeye gïnögø thuwø noo tägi dëët jø pinyi ni reyø ii.»

⁴⁶Kanyøgønø, kanya poode ni Jecu cäänö ki jiy, menni ki nyïïmenni cuŋŋö wøk, ni ge manynya cäänö ki eni.

⁴⁷Ni caani ya ŋat mørri jïre, ni «Meru ki nyïïmeru ge cuŋŋö wøk ni ge manynya luubö ki ïïni.»

⁴⁸'Ba adwøge jï ŋata caan gø jïre, ni «?Mera aŋa? ?Ni nyïïmera a jøøe?»

⁴⁹Ni nyooth bääge ki lweete, ni kööe, ni «Jøøi ii beege mera ni näkge nyïïmera.

⁵⁰Kiper ŋat wäro tïïc mana many Wära ni en maal, beeye coka ni näk mera.»