Read anuak Mathiew 13 Bible Online

Mathiew 13 - anuak bible

Mathiew 13

¹'Ba dïcäŋögø Jecu adøny wøk ki yi øtø ni ci bäät Puul Galili ni pï piny.

²Ni ö lwaaki mo päl ni cooŋge rege buute. Kiper manøgønø, ena eth yi jääy ni pï piny yie. Ni ö lwaaki bäre ni cuŋŋe bäät ageela.

³Ni caan luup mo thööth jïge na leere, ni kööe, ni «Neennu, da dïpïïdhi mo oaa wøk kuna pïïthe ni mare jør.

⁴'Ba na jude, nyeŋ köödhi møøk apäth thääŋ jöö, ni ö wenynyi ni öge ni camge ge bëët.

⁵Ni ö köödhi møøk ni päthge yi ŋöömö mo tiere da kïdi, kany mo bäŋ ŋöömö mo päl yie. Ni laarge tuu wøk, kiper mana tïme ni bäŋ ŋöömö mo päl.

⁶'Ba na rieny cäŋŋi, gena waaŋ ni talge, kiper mana tïmge ni bäŋ lweedi jïge.

⁷'Ba köödhi møøk apäth yïth koodhi. Ni ö koodhi ni døøŋge, ni bøøcge ge.

⁸'Ba köödhi møøk apäth yi ŋöömö mo beer, ni känge ki nyeŋ. Møøk käla nyeŋ ma dïpa, ni møøk käla pïërabïciel, ni kän møga ki pïëradäk.

⁹Ŋat mo jïre da ïdhi, beerra man cek ïthe.»

¹⁰Køøre bääŋi aöö ni köge jï Jecu, na «?Aŋø ni caanï luup jïge kaamar leere en?»

¹¹Ni dwøk gø jïge, ni «Beeye uuni na wëëk ŋäc tiet luup moa näk tietge okwøŋ kan kiper buya käl maal. 'Ba jø møga, tier gïnögø kär cïbö jïge nee ŋäcge.

¹²Kiper ŋat wø jïre dagø, møøk ocäŋ cïpö jïre, ni tïm moe ni thööth. 'Ba ŋat wø jïre bäŋgø, këël man wø en jïre di lwørø.

¹³Ni beeye tiere en na cääna ki ge ki luup mo keda leere; kiper ge nëënö, 'ba bäŋ gïn jootge; ni ge wïnyö, 'ba bäŋ gïn ci cwïnyge; ni tier luummögø ba kwanyge.

¹⁴'Ba ka adïëri møn, mana caan nyikuŋ Jwøki ma Aydheea athur kare jïge, na kööe, «no ‹U wïnyö møn, ni ba maaru tiere kwany. Nou nëënö møn, 'ba bäŋ gïn jootu.

¹⁵Kiper cwïny jøøi ii, atïmö ni bäŋ gïn mo maarge joot, ni ïthge odhïŋ ki man wïnyge luubö, ni nyeŋge ege miiø, kiper nee ba jootge ki nyeŋge, ni ba wïnyge ki ïthge, ni ba kwanyge tier gø ki cwïnyge, ni ba luuge rege baŋa, nee ge kønya.›

¹⁶'Ba uuni, uuno gwïëdhö, kiper nyeŋŋu nëënö, ni ïthu wïnyö.

¹⁷Ka adïëri møn, a cäänna uuni, ni nyïïkuk Jwøk mo thööth ki jiy mo beyø mo thööth, gena many man neenge gïï ni neennu ii, 'ba kärge neenø. Ni manyge man wïnyge gïï ni wïnynyu ii, 'ba kärge wïnynyö.

¹⁸«Wïnynyu tier luumma caana kaamar leer kiper dïpïïdhi.

¹⁹Kany wø ö dhaanhe wø wïny luum buya käl maal ni ba kwany tier gø, ŋata raac wø öö ni juth gïna näk opiith cwïnye wøk. Manøgø caala mana näk ojør thääŋ jöö.

²⁰'Ba mana jør yi ŋöömma näk tiere da kïdi, beeye ŋat wø wïny luubö ni laar gø jïëc ki met cwïny.

²¹'Ba bäŋ lweedø mo okëët piny ree, ni bëëdö ka kany mo thiinh keere. 'Ba kany wø ö gïï mo lethi ki caannø wø täkge kiper luummögø, eni luummögø laare ka wec.

²²'Ba mana jør yïth koodhi, beeye ŋat wø wïny luubö. 'Ba eni bëëdö ni lääŋŋa jap piny, ki mëëc kwär. Ni ö gïïögø ni bøøcge luummögø, ni ba jïte ki nyeŋ.

²³'Ba mana jør yi ŋöömma beer beeye ŋat wø wïny luum Jwøk ni kwany tier gø, ni jïte ki nyeŋ møn, na aciel käla nyeŋ ma dïpa, ni kän maya ki pïërabïciel, ni maya käla pïëradäk.»

²⁴'Ba Jecu luubö mør mo keda leer acäŋ parrø jïge, ni kööe, ni «Buya käl maal doo päärö ki ŋat mo pwöthe ee jørø ki köödhi ma wøpe.

²⁵'Ba nyimän mare aöö ki wäär ni jiy obutö, ni jør luum mo raac dï beel, ni aae.

²⁶'Ba kanya tuc beelli ni jïtge ki nyeŋ, luuma raac ree anyoodhe thuwø.

²⁷Kanyøgø jø tïïc mo wää pwödhö aö baŋe ni köge, ni ‹?Kwäärö, aŋø, ï ba jør köödhi ma wøpe na bëëde yi pwödhö marï? ?Aŋø, luum mo raac oöö nidïï?›

²⁸«'Ba ena köö jïge, ni ‹Beeye nyimän na tïïc gïnögø.› «Ni kö jø tïïci jïre, ni ‹?Ï manynya waani man ciwa nee luum puthwa wøk ni cooŋwa gø?›

²⁹«'Ba ena köö, ni ‹Patha enøgønø, kiper no pudhu luum wøk, beel kuu ka wøk ki geni na aciel.

³⁰Weyu nø, nee døøŋge karge riet këël kanyo cööp ri kac. 'Ba kanyo tïme na kar kac, ocaana jï jø kac, ni «Kwøŋu luum cooŋ ni twöyu gø na wïdhi kiper nee waaŋ, 'ba beel 'moa wär kïthu yo odek mara.» › »

³¹Ni ö Jecu ni cäŋ luubö mør parrø jïge mo keda leer, ni kööe, ni «Buya käl maal caala nyi waŋ kunhnhö mo thiinh døc mo okäl dhaanhe ni piith gø yi pwödhö mare.

³²Ni kunhnhögø thiinhnha waŋe døc dï köödhi bëët. 'Ba kany wø døøŋŋe tïmö ni dwøŋŋa eni røk moa no opiidhø bëët, ni tïme na jaath, ni ö wec maalli ni gëëtge bääte ki uudi.»

³³Ni ö Jecu ni cäŋ ge cäännö ki luubö mør mo keda leer ni kööe, ni «Buya käl maal caala thømmø mo olwør dhaage ni kïth gø yi møø ma yïth rumme adäk këël mana wäny møø manøgø bäre.»

³⁴Gïïögø bëët acaan Jecu jï lwaak na luup mo keda leere. Ni bäŋ gïn mo ee caanø jïge ni ba caane na leer.

³⁵Manøgø beeye kiper nee gïna caan nyikuŋ Jwøki thur kare, na kööe, ni «Aano cäänö ki luup mo keda leere, ni køba gïïa näk okanø ki mana täge ki kanya cwääc piny.»

³⁶Kanyøgø Jecu lwaak awii piny, ni aae ni ci yi øtø. Ni ö bääge baŋe ni köge, ni «Caan tier leer jïwa mar luuma raac na en yi pwödhö.»

³⁷Ni dwøk gø jïge ni kööe, ni «Ŋata jør köödhi moa näk wøpe beeye Wär Dhaanhø.

³⁸Ni pwödhö beeye piny. Ni köödhi moa näk wøpe beege wäät buya käl maal. Ni luuma raac beeye wäät ŋata raac.

³⁹Ni nyimän mana jør köödhi beeye anägö. Ni kar kac beeye aŋuun piny, ni jø kac beege nyïïatwiet maal.

⁴⁰'Ba kanyo ŋuut pinynyi yie, otïmö keda kanyo cooŋ luuma raac yie ni waaŋi ki maac.

⁴¹Kiper Wär Dhaanhø nyïïatwiet maal moe ojääŋŋe, ni dwarge jø wø wëëk raay öö, ki jø wø tïïc raay, ni kwänyge ge wøk ki yi buye,

⁴²ni leeŋge ge yi maac mana päl kar ajäla, kany wø jwöŋ jiyi yie ni mööta lakge.

⁴³'Ba kar kaaca, jøw onäk marge beer, orieny ni caala cäŋ yi buc Wääge ni en maal. Ŋat mo jïre da ïdhi, beerra man cek ïthe.

⁴⁴«Buya käl maal caala jap kwärö mo perge leth mo okoony piny yi pwödhö, ni jooti ya dhaanhe ni cäŋ gø rïëpö. Ni mïn yie ni aae ni dwøk jape bëët pwödhö, ni ööe ni ŋeew pwöthögø.

⁴⁵«Ni buya käl maal caala ŋat nyagadha mo manynya nyeŋ tii ma wøpe.

⁴⁶'Ba kanya ö ŋatøgø na joot waŋ tiiø aciel mo gäte thööth døc, ena aay ni dwøk jape bëët pwödhö, ni ööe ni ŋeew waŋ tiinnøgø.

⁴⁷«Ni buya käl maal caala ajääp mo oleeŋ yi naam, ni gwaar wïth rec yie bëët.

⁴⁸'Ba kanya pääŋe, atuut jiyi wøk dhi waath ni pïge piny ni kwanyge moa beyø yïth olïïte, ni wetge moa reyø.

⁴⁹Gïnögø beeye teeŋ gïno tägi kanyo tïme na aŋuun piny. Kiper nyïïatwiet maal oööi, ni pääŋge jøøa reyø ki jøøa beyø,

⁵⁰ni leeŋge jøøa reyø yi maac mana päl kar ajäla, kanyo jwöŋ jiyi yie ni ge mööta lakge.»

⁵¹Ni kö Jecu jïge, «?Gïïögø bëët aci cwïnynyu?» Ni köge jïre, ni «Yaa.»

⁵²Ni kööe jïge, «Kiper manøgønø, dïpööye mo ciik Jwøk bëët moa no opwönynyö kiper buya käl maal caala wää paaci mo wø käla gïï mo nyärö ki gïï mo oruuö wøk ki yi kar kän mare ni nyooth ge jï jiy.»

⁵³'Ba kanya løny Jecu ki car luupögø ni keda leere yøø, ena aay kaace.

⁵⁴'Ba kanya ö dï poge, jiy apwönynye yi øt acooŋ lam marge ki pwöc mo yïthge athäŋŋö ki gø. Ni köge, ni «?Ŋati leec wïc manøgø ki tïïe moi ni døøŋŋø ii ee kwanyø kaa?

⁵⁵?Aŋø, nyenøgø paa wär dïjëëth opämi? ?A menni, paa Meeri? ?A nyïïmenni, paa Jeemeth ki Jocep, ki Cayman, ki Juudac?

⁵⁶?A nyïïmenni moa näk mään bëët bäŋ wø bëëdö kany ka øøni? ?Gïïögø bëët okwany nyenøgø kaa ŋø?»

⁵⁷Ni taakge gïr gø. 'Ba Jecu aköö jïge, ni «Nyikuŋ Jwøk bäŋ wø bëëdö ni ba wøør, 'ba beeye paac mana näk dï poge ki paare kiree noo ba wøøri yie.»

⁵⁸Køøre Jecu bäŋ tïïe mo thööth mo døøŋŋø mo ee tïïö kaace kiper mana kärge jïëy.