Read anuak Mathiew 14 Bible Online

Mathiew 14 - anuak bible

Mathiew 14

¹'Ba kar kaaca Eerat na bëën paaci, gïr Jecu awïnynye.

²Ni kööe jï jø tïïc moe, ni «Nyenøgø beeye Jøøn na näk dïlööy na nyuudhi. Eno tïŋ maal ki yi thøø, ni beeye tiere gø ni tïme ni da teek bääte ki man tïïe ki gïï mo rëëma ec enø.»

³Kiper dïkwøŋ Eerat Jøøn amaae ni twöc gø, ni kïth gø øt twöc ki køør Eerödia, cï owänni ma Pilip,

⁴kiper na kö Jøønni ki eni, ni «Ba doo beer jïrï ki man bëëdï ki nyaanøgø na cïïï.»

⁵'Ba këël na bëëde ni Eerat manynya man 'näk Jøøn, ena lwäyö ki jiy. Kiper ojïëc jiyi ni Jøøn beeye nyikuŋ Jwøk.

⁶'Ba kanya tïme na cäŋa lwaarø ki Eerat yie, nyi Eerödia amiel nyïm wëëlle, ni døøc yi Eerat mo met.

⁷Kiper manøgønø, Eerat nyilaarøgø abuŋŋe ni kööŋe ni gïno pëënynye jaak, mëëge eni.

⁸'Ba yi nyilaarøgø acoon menni, ni kö nyilaarøgø, ni «Mëëk a wï Jøøn na näk dïlööy na nyuudhi kany ennø, ni ena ya athäänh.»

⁹'Ba këël na bëëde ni nyeya ma Eerat cwïnye opädhö, ena cïpö ki dwøl nee wï Jøøn mëëk nyilaarøgø, kiper kööŋ mare na nø kööŋe ki gø nyïm wëëlle moe.

¹⁰Ni jääge ki jiy nee wï Jøøn ŋul wøk øt twöc.

¹¹Ni käl wï Jøøn ki ya athäänh ni mëëgi nyakøønnøgø, ni kïth gø baŋ menni.

¹²Ni ö bääk Jøønni ni öge ni kälge dëër Jøøn ni koonyge gø. Ni cige ni caange gø jï Jecu.

¹³'Ba kanya ö Jecu na wïny gïnögø, ree adaae kaace, ni aay ka jääy, ni ci kany mo bäŋ paac yie. 'Ba kanya wïnynyi ya jiyi, jiy mo thööth aöö ki tiet mïëri, ni läpge køøre ki tietge.

¹⁴'Ba kanya ö Jecu na eth wøk, lwaak mo päl ajoode, ni päth cwïnye ki gïrge, ni køny jøøa tuu dïge.

¹⁵'Ba na tïme na abøøya, bääŋi aö baŋe, ni köge, ni «Man a paap, ni cäŋ oløny ni thiinh. Wëëk lwaak wääth nee cige dï mïëri kiper nee dëëtge ŋëëmge ki caammi.»

¹⁶'Ba Jecu aköö, ni «Ge ba aay. 'Ba mooyu geni ki gïn camge.»

¹⁷'Ba gena köö jï Jecu, ni «Jïwa da muunni abïïc ki rec ariiø keerge kany.»

¹⁸Ni kööe jïge, ni «Kälu ge baŋa kany.»

¹⁹Kanyøgøøni lwaak aköömme nee pïge piny yi luum. Ni lwør muuga näk abïïc ki reya näk ariiø, ni neen maal ni gwïëth ge, ni pøt muugögø, ni mëëk ge bääge. Ni ö bääge ni pääŋge ge jï lwaak.

²⁰Ni cämge bëët ni jäŋge. Ni ö bääge ni kwaanyge thäŋi moa näk opøtø na dhäthö, ni pääŋge yïth gupe apaar kurriiø.

²¹'Ba jøøa cämö bëët, jïtö ki jiy ma kume abïïc ma cwøw, ni mään ko obwöre kär kwaanø.

²²Kanyøgø Jecu bääge aput köömmö nee ethge yi jääy nee kwøŋge ci nyïme løøga, kanyo poode ni eni wëëga lwaak keethø.

²³'Ba kanya nø wëëk lwaak keethø, ena aa bäät kïdi keere kuna läme. 'Ba kanya tïm pinynyi na wäär, ena dööŋ kaace keere.

²⁴'Ba yi kar kanyøgøøni kar jääy onø tïmö ni bäär ka ageela, ni pööt athaga pöötö, kiper jamø atïmö ni kwönna bäätge.

²⁵'Ba kanya tïm kar øwi ni cään ni piny poot cøl, Jecu aö baŋge ni cäädhi ka bäät pïï.

²⁶'Ba kanya ö bääge na jootge eni ni cäädhi ka bäät pïï, gena bwøk, ni köge, ni «Tïpö!» Ni rëëtge ki lwär.

²⁷'Ba kanyøgø Jecu aput luupö ki geni ni kööe, ni «Magu cwïnynyu. Man a aani. Käru lwäyö.»

²⁸'Ba aløk Piterri jïre, ni «Kwäärö, ni näk beeye ïïni, cwøl a, naa ööa baŋï ki bäät pïï.»

²⁹Ni kööe, ni «Ööï.» Kanyøgø Piter aeth piny ki yi jääy, ni cäädhe ki bäät pïï, ni ci baŋ Jecu.

³⁰'Ba kanya neen jamø, ena lwäyö. 'Ba na täge ki man neelïŋ, ena köök ni kööe, ni «Kwäärö, køny aani.»

³¹Ni ö Jecu ni put cere rwaak baŋe ni mak gø, ni cään gø ni kööe, ni «Nyie, ï ni ŋäädhe marï thiinh en. ?Aŋø ni tääï en?»

³²'Ba kanya ethge yi jääy, jamø acuŋŋö.

³³Ni ö jøøa en yi jääyi ni wøørge eni, ni köge, na «Adïëri møn, bee ï na O Jwøk møn.»

³⁴'Ba kanya kathge løøga, gena mäk piny yi ŋööm jø Genedharet.

³⁵'Ba kanya ö jø paanøce na ŋecge Jecu, gena jääk tiet mïëyögø bëët, ni kälge jøøa tuu bëët baŋ Jecu.

³⁶Ni kwaacge eni këël ki man gutge deŋ abïïne keere jaak. 'Ba jøøa gut gø bëët, dëëtge adøø karge.