Read anuak Mathiew 15 Bible Online

Mathiew 15 - anuak bible

Mathiew 15

¹Kanyøgøøni jø Paricith ki dïpööye mo ciik Jwøk aöö ki Jerucalem ni öge baŋ Jecu, ni köge,

²na «?Aŋø ni ö bääŋi moï ni dhalge kööŋŋö mar jøøa døøŋŋø? Kiper geni ceŋge bäŋ wø lwøkge kany wø cämge.»

³'Ba adwøk Jecu jïge, na «?Aŋø ni wø dhallu mana cem Jwøki kiper kööŋŋö maru?

⁴Kiper Jwøk aköö, ni ‹Wøør wäru ki meru.› Ni ‹Ŋato cäänö ki gïn mo raac dëër wänni wala menni wär eni 'näk.›

⁵'Ba u wø köö, ni løny jï dhaanhø ki man kööe jï wänni wala menni, ni ‹Køny mana diï joodø baŋa anø mëëga Jwøk.› Ni mooyu gø ki jöö ki man ba wøør wänni ki køør køny.

⁶Kiper manøgønø, u raanynya luum Jwøk kiper kööŋŋö maru.

⁷U jø atade, gïru acaan Aydheea na kare na kööe,

⁸«ni ‹Jøøi ii a wø wøørge ka lëëpge, 'ba cwïnyge karge bäär ki aani.

⁹Naa wøørge ka wödö mo oballe jaak, ni ge pöö ka pwöc jiy ni keda luum Jwøk.› »

¹⁰Ni ö Jecu ni cwøl lwaak baŋe ni kööe jïge, ni «Wïnynyu luummi ni kwanynyu tiere.

¹¹Patha gïn wø ci dhøk ni wø raany dhaanhø, 'ba beeye gïn wø ö wøk ki dhøk ni wø raany dhaanhø.»

¹²Kanyøgø bääge aö baŋe ni köge jïre, na «?Aŋø, ŋäyï ni jø Paricith gena gootø kanya wïnyge gïna caanï en?»

¹³Ni dwøk gø jïge, ni «Gïïa näk otuy bëët ni ba piitha Wära ni en maalø, geno puth wøk.

¹⁴Wiiu geni karge. Geni, ge caala cööye mo ge pieya cööye. Ni näk ŋat ma cwør pieya cwørri mør, ge pätha yi buur karge riet.»

¹⁵'Ba Piter aköö jïre, ni «Caan tier luumma caanï jïwa kiper gïn wø ö wøk ki dhøk.»

¹⁶Ni kö Jecu jïge, na «?Aŋø, uuni thuwø, gïnögø tiere poot käru kwanyø en?

¹⁷?Aŋø, kuyu ni gïn wø ci dhøk, pöötha ec, ni pööth wøk?

¹⁸'Ba gïn wø ö wøk ki dhøk käla yi cwïny, ni beeye gïn wø raany dhaanhø.

¹⁹Kiper acaare moa reyø wø ööi ka yi cwïny, teeŋ ka 'näk, ki luk, ki käp, ki käw, ki caan gïn mo patha adïëri, ki waac nyeŋ.

²⁰Gïïögø bëët beege gïï wø raany dhaanhø. 'Ba ki man cämö ki ceŋ mo kär lwøø, dhaanhø ba raanynye.»

²¹Ni ö Jecu ni aae kaace, ni daa po jø Tayar ki po jø Caydan.

²²Kanyøgøøni, nyijø Keenan mo bëëdö paanøce aöö ni rëëdö ni kööe, ni «Køny canna, Kwäärö, Nyikwaar Deebit. Nyaara omak anägö ni teek døc.»

²³'Ba Jecu bäŋ luubö mo ee dwøgø jïgø. Ni ö bääge ni kwacge eni, ni köge, ni «Riem nyijøøgø, kiper ena tïmö ni jwöŋö køørø.»

²⁴Ni dwøgi ya Jecu, na «A jääŋŋi kaper jø Icriel keerge ni wø caal dïëk mo orwäänyö.»

²⁵'Ba nyijøøgø aöö ni këël cøŋŋe piny nyïm Jecu, ni kwaac gø ni kööe, «Kwäärö, køny aani.»

²⁶Ni dwøgi ya Jecu jïre, ni «Paa gïn ma wøp ki man lwør møk obwöre ni leeŋi baŋ guu.»[12]

²⁷'Ba nyijøøgø aköö, ni «Beeye kare, Kwäärö. 'Ba këël guu wø poot cämö ki thäk caammi mo wø thenh thenh ni wø päth piny kar cam mar kwääcge.»

²⁸Kanyøgø adwøk Jecu jïre, ni «Nyijøøe, ŋäädhe marï dwøŋ. Gïnö ni manynyï enø otïïc jïrï.» Ni ö dëër nyaare ni put døø kare yi caannøgø.

²⁹Køøre Jecu ena aay kaace ni cør bäät Puul Galili. Ni eth bäät kïdi ni pï piny kaace.

³⁰Kanyøgøøni jiy mo thööth aö baŋe ni ge käla ŋööte, ki jiy moa näk obäp, ki cööye, ki jøøa näk ba luubö, ki jiy møøk mo thööth mo dëëtge da täwe ma teeŋi, ni cïpge ge piny nyïme. Ni ö Jecu ni køny geni.

³¹Kiper manøgø nø, jiy yïthge arëëm kanya neenge jøøa näk ba luubö ni ge cäänö, ni jøøa no obäp dëëtge odøø karge, ni ŋööte ge cäädhö, ni cööye ge nëënö. Ni jiemge Jwø Icriel.

³²Kanyøgø Jecu bääge acwöl baŋe, ni kööe, ni «Cwïnya apädhö ki gïr lwaaøgø, kiper nïne adäk ennø ni ge bëëdö ka aani, ni bäŋ gïn mo camge. 'Ba aani yia ba met ki man wëëga ge wääth ki käc. Kanymør ge bup waŋjöö.»

³³'Ba bääŋi aköö jï Jecu, na «?A kaa noo kälø muunni mo thööth ki yie dï paabi, mo caamø lwaai ni päl en ki gø?»

³⁴'Ba Jecu aköö jïge, na «?A muunni adïï ni en jïïu?» Ni köge, ni «Muunni abïriiø, ki rec mo nøk mo thenh thenh.»

³⁵Køøre Jecu lwaak aköömme nee pïge piny.

³⁶Ni lwør muuga näk abïriiø ki rec. 'Ba kanya nø dwøk met ec, apøte, ni mëëk ge bääŋi. Ni ö bääŋi ni pääŋge ge jï lwaak.

³⁷Ni cämge bëët ni jäŋge. Ni ö bääge ni kwanyge thäŋi moa no opøtø na dhäthö, ni pääŋge yïth gupe abïriiø.

³⁸'Ba jøøa cämö jïtö ki kar kume aŋween, ni mään ko obwöre kär kwaanø.

³⁹'Ba na wëëk lwaak wääth ena ci yi jääy ni aa dï mïëc Magadan.