Read anuak Mathiew 19 Bible Online

Mathiew 19 - anuak bible

Mathiew 19

¹'Ba kanya løny Jecu ki caan luupögø, ena tïŋŋö Galili, ni ci yïth mïëc Judia løø Naam Jördan løøga.

²Ni ö jiyi mo thööth ni läpge køøre, ni køny jøøa tuu moa en dïge kaace.

³Kanyøgø jø Paricith aö baŋ Jecu, ni pëënyge eni, ni ge päänynya gø, ni «?Beeye gïn mo beer jï dhaanhø ki man kwier cïïe kiper luubö mør jaak?»

⁴Ni dwøgi ya Jecu jïge, na «?Aŋø, käru kwaanø, ni Jwøk na cwääc jiy kanya cwääc piny, ‹gena cwääe na thwønh ki maath?›

⁵Ni put köö, ni ‹Kiper manøgønø, dhaanhø wänni ki menni wø wiie wiiø ni dwätge ki cïïe. Ni ö geni karge riet, ni tïmge na dëël aciel.›

⁶Kanyøgønø, ge patha jiy ariiø këët, 'ba gena dëël aciel. Kiper manøgønø, gïï mo onø dwal Jwøki, kär dee ŋat pää ge.»

⁷'Ba gena cäŋ pëëö, na «?Aperŋø nø, na caani ya Modhe, ni dhaanhø cïïe dee göönnö ki wëël apääk ni kwier gø?»

⁸Ni kööe jïge, ni «Kiper mana teek cwïnynyu beeye na ö Modhe na wëëk uuni apääk ki määru. 'Ba ki mana täge ki kanya cwääc piny, kär tïïö na enøgønø.

⁹'Ba a cäänna uuni, ni ŋat wäro kwier cïïe ni paa kiper käp, ni nyöömme ki dhaagø mør, mare beeye luk.»

¹⁰Kanyøgø bääge aköö jïre, ni «Ni näk bëët dhaanhø ki cïïe beeye enøgønø, beerra man ba nyööm dhaanhe.»

¹¹'Ba Jecu aköö jïge, ni «Patha jiy bëët noo jïëc luummögø, 'ba beeye jø wø wëëgi ge keerge.

¹²Kiper da jiy mo nywöli na bwöy. Ni dee jiy møøk mo tïïya jiyi na bwöy. Ni dee jiy mo ba nyöömmi ni ge tïïya dëëtge ni caala bwöy kiper buya käl maal. 'Ba ŋat mo løny jïre ki man jïëc gïnögø, wär jïëe.»

¹³Kanyøgø obwöre akäl baŋ Jecu nee ceŋŋe kïth bäätge ni läme kiperge. Ni ö bääŋi ni jookge jøøgø.

¹⁴'Ba Jecu aköö, ni «Weyu obwöre, nee öge baŋa; ni ba mänu ge. Kiper teeŋ obwöre moøgø nø, buya käl maal beeye marge.»

¹⁵Ni kïth ceŋŋe bäätge. Køøre ena aay kaace.

¹⁶Kanyøgø nyen mør aö baŋ Jecu, ni kööe, ni «?Dïpööy, agïnaŋø ni beer noo tïïa naa jïta ki kwøw mana näk adïëri mo bäŋ cuŋŋe?»

¹⁷Ni dwøgi ya Jecu jïgø, na «?Aŋø, ï pëënynya aani kiper gïn mo beer? Beeye Jwøk keere ni beer. 'Ba ni näk miï manynya man ciï yi kwøw, gwøk gïïa cem Jwøki.»

¹⁸Ni kööe jïgø, na «?A mane rege?» Ni kö Jecu, ni «Kärï nägö ki dhaanhø; kärï kännö ki luk; kärï kwätö; kärï cäänö ki tööt;

¹⁹wøør wäru ki meru; ni mëërï ki ŋat mør kaawat man wø mëërï ki dëërï enø.»

²⁰'Ba nyenøgø aköö jïgø, ni «Gïïögø bëët yaa gwøø. ?Agïnaŋø ni poot kära tïïö nø?»

²¹Ni kö Jecu jïgø, ni «Ni näk miï manynya man tïm bëëtö marï no othur kare ni beer bäre, ciï ni dwøgï gïïa en jïrï bëët pwödhö, ni mëëgï gwetge jøøa can, ni ööï ni cäädhï køøra. Køøre nø, ïïno jïti ki jap kwär maal.»

²²'Ba kanya ö nyenøgø na wïny gïnögø, ena aay ni cwïnye opädhö. Kiper eni jïre da jammi mo thööth døc.

²³Kanyøgø Jecu aköö jï bääge, na «Adïëri møn, a cäänna uuni, noo tïmö ni teek døc jï ŋat mo okwär ki man døny yi buya käl maal.

²⁴Naa cäŋa u cäännö, ni jööta eni jï athïrööl ki man dønye ki waŋ lïlmu ki man ö ŋat mo okwärri ni døny buc Jwøk.»

²⁵'Ba kanya ö bääŋi na wïnyge gïnögø, yïthge athäŋŋö døc, ni pëëge, na «?Aŋa nø, noo maar piem?»

²⁶'Ba jïge aneen Jecu, ni kööe jïge, ni «Ki jï jiy, gïnögø ba maar lønyø. 'Ba ki jï Jwøk jammi bëët løny.»

²⁷Kanyøgø adwøk Piterri jïre, ni kööe, ni «Kawaane jammi bëët awiiwa piny ni caathwa køørï. ?Agïnaŋø nø, noo jootwa?»

²⁸Ni kö Jecu jïge, na «Adïëri møn, a cäänna uuni, ni kanyo døøc piny mo nyään, ni beeye kanyo ö Wär Dhaanhø noo pï bäät wäl ajiem mare, u na caath køøra u pïïa bäät wäle apaar kurriiø thuwø, nou ŋøla luum wïth tuk Icriel karge paari kurriiø.

²⁹'Ba jiy bëët moa näk mïëri moge ege wiiø, wala nyïïmëëkge, wala wëëkge, wala mëëkge, wala nyïïge, wala pwöth moge, kiper nyeŋŋa, geno jïti ki møøk mo thööth døc mo kaala geni, ni ci kwøwi mana näk adïëri mo bäŋ cuŋŋe jïge.

³⁰'Ba jiy mo thööth mo en nyïm ennø, odøø cään, ni ö mo en cään ennø ni pööthge maal.