Read anuak Mathiew 22 Bible Online

Mathiew 22 - anuak bible

Mathiew 22

¹Kanyøgø Jecu jiy acäŋ cäännö ki luup mo keda leere, ni kööe,

²ni «Buya käl maal doo päärö ki nyeya mo da cam mo ee jiiŋŋø kiper nywöm mar wääde,

³ni jääŋ laaŋe moe wøk kuna cwølge jøøa näk ocwølø kar cam nywöm. 'Ba jøøgø akweer ki öö.

⁴Ni cäŋ laaŋe moe møøk jääŋŋö, ni kööe, ni ‹Caannu jï jøøa näk ocwølø kar cam nywöm, ni «Ennø, cam anø jiiŋŋa, ni rwädhe ki røøe 'moa moa no olør yaa nø 'näk, ni jammi bëët onø jiiŋŋø. Ööu kar cam nywöm.» ›

⁵'Ba jøøa ööt nyeya baŋge, luumme adøøcge luubö mo bäŋ tiere, ni aacge, ni ö mørri ni ci yi pwöthe, ni ci mørri kar tïïe.

⁶Ni ö jiyi moa dööŋ ni makge laaŋe mo nyeya, ni caange geni ki caannø mo raac døc, ni 'näkge geni.

⁷Kanyøgø nyeya cwïnye aränynyö, ni jääŋ jø tøŋ moe, ni dïïr wïth dïnäge moøgø, ni waaŋ poge.

⁸Køøre nyeya aköö jï laaŋe moe, ni ‹Kar nywöm onø jiiŋŋø. 'Ba jøøa cwøl, gena tïmö ni ge paa jiy mo orømø ki cwøl.

⁹Kiper manøgønø, cou uutjïëthe, ni cwøllu jøw ojootu bëët nee öge kar cam nywöm.›

¹⁰«Ni ö laaŋe moøgø ni aage wøk uutjïëthe ni kälge jøøa jootge bëët, ni beege jiy moa reyø ki moa beyø bëët. Ni ö kar nywömmi ni pääŋe ki wëëlle.

¹¹«'Ba kanya ö nyeya kuna neen wëëlle, ena jïtö ki dhaanhø mør kaace mo dëëre bäŋ abïï nywöm.

¹²Ni pëëny gø, ni ‹?Nyawat, ïïno ö kany nidïï ni dëërï bäŋ abïï nywöm?› Ni ö nyenøgø ni magi ya apïte.

¹³Kanyøgø nyeya aköö jï laaŋe moe, ni ‹Twöyu ceŋŋe ki tiete, ni leeŋu eni wøk yi muudhö, kany wø jwöŋ jiyi yie ni mööta lakge.›

¹⁴Kiper jiy mo thööth wø di cwølø, 'ba beege mo nøk noo jier.»

¹⁵Kanyøgø jø Paricith aay ni cooŋge røkge ki man määnyge ki jöö man dwøc dhi Jecu ki gø ki køør luup moo care.

¹⁶Ni jääŋge bääŋi moge baŋe, ni ge cii ka jic Eerat na aciel, ni köge jïgø, ni «Dïpööy, ŋäcwa ni ïïna dhaanhø miï caana adïëri, niï pöö ka jöör Jwøk na adïëri, ni jiy raŋï ka waŋ aciel, ni bäŋ jiy mo kwörge døøŋŋø mo lwäärï.

¹⁷Kiper manøgønø, caanï jïwa. ?Agïnaŋø ni caarï? ?Beeye gïn mo beer ki man cïpö ka ajwäk jï Cidhar,[25] wala ba beer?»

¹⁸'Ba Jecu kanya ŋäc rääö marge, ena köö, na «?Aŋø ni päänynyu aani, u jø atade?

¹⁹Nyuunhnhu aani ki gwelø man wø cïp kiper ajwäk.» Ni känge jïgø ki gwelø.

²⁰Ni kö Jecu jïge, ni «?Man a kïdö mar ŋa ni nyeŋŋe oput göör bääte en?»

²¹Ni dwøkge gø jïgø, ni «Beeye Cidhar.» Kanyøgø Jecu aköö jïge, ni «Dwøgu japa näk jap Cidhar baŋ Cidhar, ni dwøgu japa näk jap Jwøk baŋ Jwøk.»

²²'Ba kanya wïnyge gïnögøøni, yïthge arëëm, ni wecge Jecu ni aacge.

²³'Ba ni poot na dïcäŋögøøni, jø Cajucith ni wø köö ni bäŋ duun wøk ki yi thøø, møøk aö baŋ Jecu, ni pëënyge eni ki pïëc,

²⁴ni köge, ni «Dïpööy, Modhe aköö, ‹Ni näk dhaanhø thøw ni jïre bäŋ obwöre, coki doo dööŋ ki cï gø, ni dee wï coki nywølø.›

²⁵'Ba da jak ma nyïïmëëe abïriiø mo obëëdö dïwa. Mana dïkwøŋ anyöömmö, ni thøøe, ni bäŋ obwöre. Ni wëëk cïïe coki.

²⁶Ni ö rietge thuwø ni thøøe ni bäŋ obwöre, këël dääge, këël mana thumge karge bïriedi.

²⁷Køørge nø, dhaagø aläw thøø.

²⁸?Kiper manøgønø, kanyo duu jiyi wøk ki yi thøø, dhaagø manøgø otïme na cï ŋa dï jagøgø na abïriiø yøø? Kiper ena bëëdö na cï ŋati man nø.»

²⁹'Ba adwøk Jecu jïge, ni «Uuna bääyö, kiper weet Jwøk kuyu, këël teek Jwøk.

³⁰Kiper kanyo duu jiyi wøk ki yi thøø, røk ba nywøm këët. 'Ba ge tïmö ni ge caala nyïïatwiet maal.

³¹?'Ba nee kiper luum duun wøk ki yi thøø, mana caan Jwøki jïïu käru kwaanø? Ena köö,

³²ni ‹Aana Jwø Eeberam, ni näga Jwø Aydhak, ni näga Jwø Jeekap.› Eni paa Jwø jøøa näk othøw, 'ba ena Jwø jøøa kwøw.»

³³'Ba kanya ö lwaaki na wïnyge gïnögø, yïthge athäŋŋö ki pwöc mare.

³⁴'Ba kanya wïnynyi ya jø Paricithi ni Jecu jø Cajucith ee dhällö, jø Paricith rege adwalge na aciel.

³⁵Ni ö nyen mørri dïge ma ŋat wø caan tiet ciik Jwøk, ni pëëny eni, ni päänynya gø, ni kööe,

³⁶ni «?Dïpööy, a ciik mane ni dwøŋŋa eni røk ciik Jwøk?»

³⁷Ni dwøgi ya Jecu jïre, ni « ‹Ï doo mëër ki Wuuö Jwøk na näk Jwøï ki cwïnyï bäre, ki jwïëyï bäre, ka acaayï bäre.›

³⁸Manøgø beeye ciik mana dwøŋŋa eni na pere leth.

³⁹Ni rietge poot caala manøgø thuwø, ni ‹Ï doo mëër ki ŋat mør kaawat man wø mëërï ki dëërï.›

⁴⁰Ni beege ciik moi na ariiø ii na göök ciik Jwøki bëët rege, këël luup moa køp nyïïkuk Jwøki.»

⁴¹'Ba kanya poot jø Paricithi ni dëëtge ege cooŋ kanya ciel, gena pëëny Jecu ki pïëc,

⁴²ni kööe, na «?Agïnaŋø ni caarru kiper Krictø? ?Ena o ŋa?» Ni dwøkge gø jïre, ni «Ena O Deebit.»

⁴³Ni kööe jïge, na «?Aperŋø nø, na cwøli ya Deebiti ni Kwäärö ki køør mana nyooth Jwïëc Jwøki jïre, kanya caan gø,

⁴⁴«ni ‹Wuuö Jwøk aköö jï Kwääya, ni «Pï bäät cwïïa, këël mano cïba nyïïmännï tietï» ›?

⁴⁵?Ni näk eno nø cwøl Deebiti ni Kwäärö na enønø, a dee cäŋ tïmö na wääde nidïï?»

⁴⁶'Ba bäŋ dhaanhø mo oløny jïre ki man duun gø ki luubö. Ni bäŋe ŋat mo cwïnye ee maar mak ki man pëëny gø ki pïëc møøk këët køør pïëyögø.