Read anuak Mathiew 24 Bible Online

Mathiew 24 - anuak bible

Mathiew 24

¹'Ba Jecu adøny wøk ki yi Øt Jwøk Mana Dwøŋ ni aae. 'Ba bääge aö baŋe nee uudi moa en dëër Øt Jwøk nyooth jïre.

²Ni dwøk gø jïge, ni «?Gïïögø bëët ajootu? Adïëri møn a cäänna uuni, otïmö ni bäŋ kïdi aciel kany mo dööŋ bäät watge ni ba leeŋ piny.»

³'Ba kanya ö Jecu na pï piny bäät Kïn Ølip, bääge aö baŋe kur keerge, ni köge, ni «?Caanï jïwa, a wäne noo täk gïïögø, na agïnaŋø noo näk ŋïï mar öönynyï ki mar kanyo cuŋ pinynyi yie?»

⁴Ni dwøk gø jïge, ni «Gwøgu rou, nee bäŋe ŋat mo maaŋ wïthu.

⁵Kiper jiy mo thööth oööi ki nyeŋŋa, ni kö ŋati man nø, ni ‹Beeye aani na Krictø.› Ni ö geni ni maaŋge wïth jiy mo thööth.

⁶'Ba mänye ki waac mänye owïnynyu. 'Ba kär cwïnynyu bwøk. Kiper gïïögø kwøŋa tägö, 'ba cuŋŋe poodi.

⁷Kiper paac mør dëëre othïïŋe ri paac mør, ni ö nyeya mørri ni thïïŋ ree ri nyeya mør, ni jït mïëri mo thööth ki meel, ni tïm kwör mo thööthi ni jäŋŋi.

⁸'Ba gïïögø bëët beege nyäät gïï mo leth moo tägi.

⁹«Kanyøca uuno kïthge dhøk gïï mo leth, ni nääŋge uuni. Ni ö wïth juurre bëët ni mänge ki uuni kiper nyeŋŋa.

¹⁰'Ba kaaca jiy mo thööth odøø cään, ni tïm ŋati man nø ni dëëre ŋeee ŋeeø ki watge maya, ni mänge ki røkge.

¹¹'Ba nyïïkuk Jwøk mo thööth mo patha adïëri rege othïïŋge ni maaŋge wïth jiy mo thööth.

¹²'Ba kiper mano tïm rääö ni päl, thööth jiy mëër marge othïnhnhi.

¹³'Ba ŋato jïëny gïïögø këël aŋuunne, opiem.

¹⁴'Ba luumma nyään na met mar buya käl maal okøp dï piny bäre nee gïre wïny wïth juurre bëët. Køøre aŋuun piny oööi.

¹⁵«'Ba gïna näk ec raac ki gø døc na näk gïr ränynyö ojootu ni cuŋŋa yi kanya en kur keere na näk mar Jwøk, ni beeye gïna køp nyikuŋ Jwøki ma Daniel.» Beerra man ö ŋato kwaan luubö man ni ŋäc tier gø.[29]

¹⁶«Kanyøca nø, jø wø en Judia wär bwøkge bäät kïte.

¹⁷Ni ŋato en wï øtø, kär nee duua piny kuna käl gïï mo ena yi øde.

¹⁸Ni ö ŋato en yi pwödhö, ni ba duu paac kuna lwør abïïne.

¹⁹'Ba otïmö ni leth døc jï määro yïthge da jiy, ki määro dhwödhö yïth nïröke.

²⁰'Ba lämu nee böök maru ba täge ka arïïa, wala cäŋ jwömö.

²¹Kiper kar kaaca piny ojïti ki teeŋ gïï mo leth døc, mo kär kwøŋ tägö ki mana täge ki kanya cwääc piny këël kawaane en, ni bäŋ teeŋe mo cäŋ tägö këët na bäre bäre.

²²'Ba doo na nïrögø kär tïïö ni nøk, doo bäŋ dhaanhø mo doo piemø. 'Ba kiper jøøa no ojierø, nïrögø otïïc ni nøk kiperge.

²³Kar kaace ni näk da ŋat mo köö ki uuni, ni ‹Neennu, Krictø en,› wala ‹Eni ice,› käru nou jïëy ki gø.

²⁴Kiper Kricte mo patha adïëri ki nyïïkuk Jwøk mo patha adïëri, rege othïïŋge ni tïïge ki ŋïïce mo døøŋŋø ki gïï mo rëëma ec, nee wïth jiy maaŋge; këël wïth jøøa näk ojierø maaŋge maaŋŋø thuwø ni näk mo løny jïge.

²⁵'Ba ennø, a caana gø jïïu kany poode ni poot kär tägö en.

²⁶Kiper manøgønø, ni näk ge köö jïïu, ni ‹Neennu, Krictø ena dï paap,› käru nou cøøa wøk. 'Ba ni näk ge köö, ni ‹Neennu, eni ena dï øtø kuya,› käru nou jïëy ki gø.

²⁷Kiper ööny Wär Dhaanhø otïmö kaamar agaackøth ni wø nigaaŋ ki jï løø kur tuul-cäŋ ni këët dääre jï løø kur pänh-cäŋ.

²⁸Kaawat man wø købi, ni kany wø näk da dëël mo othøw yie, cøre wø kuuta yie.

²⁹«'Ba køør gïïo leth moo tägi yïth nïrögøøni, « ‹cäŋ oput tïïc ni cøl, ni ö dwääyi ni ba cïp taye, ni päänh ceerri ki maal, ni ö gïïa näk jïge da teek maal ni jäŋi.›

³⁰Kanyøgønø, ŋïï mar Wär Dhaanhø onëëni maalø, ni ö jø pinynyi bëët ni kïmge, ni ö geni ni neenge Wär Dhaanhø ni öö ki bäät pøøl mo maal ni jïre da teek ka ajiem mo dwøŋ.

³¹Ni jääŋ nyïïatwiet maal moe ni da tuuŋ mo dwøre dwøŋ mo di koodhø, ni cooŋge jiye moa näk ee jierø, ni kälge ka wïth tuk piny karge ŋweeni, ni beeye bäät piny bäre.

³²«Ennø, kwänynyu ki pwöc dëër olaam. Kany wø tïm bääte ni løth ni jïte ki bøøge, wø ŋäyu ŋääö ni dhikøth kare acäännö.

³³Kaawat manøgø thuwø, kanyo neennu gïïo tägi bäät piny bëët, oŋäyu ni ööny Wär Dhaanhø kare acäännö, ni ena dhi kiir kiree.

³⁴Adïëri møn, a caana gø jïïu, ni beenhnhø man ba pöödhö ni gïïögø bëët poot kär cööp karge.

³⁵Maal ki piny opöödhi, 'ba luupa ba dak.

³⁶«'Ba dïcäŋöca ki yi caannøca, bäŋ ŋat ŋäc gø, këël nyïïatwiet maal wala Wäädö. 'Ba beeye Wuuö keere.

³⁷'Ba ööny Wär Dhaanhø otïmö kaamar nïr Nöa.

³⁸Kiper kanya poot jwïïe ni kär öö, jiy abëëdö ni ge cämö ni ge mädhö, ni ge nyöömö, këël dïcäŋa ö Nöa na døny yi jääy,

³⁹ni bëëtge ni ööny jwïïö kucge këël mana ö jwïïe ni dïïr wïthge bëët. 'Ba ööny Wär Dhaanhø otïmö ni caala manøgø thuwø.

⁴⁰Kar kaaca, nee da jiy ariiø mo ena yi pwödhö, aciel okäl, ni wec maya.

⁴¹Nee da mään ariiø mo öödö bäät pany, aciel okäl, ni wec maya.

⁴²Kiper manøgønø, kuru. Kiper dïcäŋo ö Kwääyu yie kuyu.

⁴³'Ba ŋäyu gïn, onää wää øtø kanyo ö kuuwi yie ki wäär ee ŋääö, eni doo kurø, ni dee øde ba wëëk toor.

⁴⁴Kiper manøgønø, uuni thuwø, bëëdu ni røgu you jiiŋŋø. Kiper Wär Dhaanhø öö ri caa mo käru dïëdö.

⁴⁵«?Na a laŋŋø mane nø, ni wïïe leer mo maar ka ŋääth, ni cuumi kwääye bäät laaŋe mo wø tïïö bëët paare, nee cam marge nee wø mëëk ge kany wø näk ma kare?

⁴⁶'Ba laŋŋø mano nwän kwääye ni tïïö na enøgønø kanyo ööe, gwïëth oen jïre.

⁴⁷Adïëri møn, a caana gø jïïu, ni jape bëët owii cer ŋatøgø.

⁴⁸'Ba ni näk laŋŋø manøgø raac, ni kööe ki cwïnye, ni ‹Kwääya aruu,›

⁴⁹ni täge ki man pwöt laaŋe moa tïïö na aciel ki eni, ni cäme ni mädhe ki jø meeye,

⁵⁰kwääc laŋŋø manøgø oööi ki waŋcäŋ mo käre dïëdö, ki yi caa mo kuue,

⁵¹ni pwöt gø ki pöödö mo teek døc, ni kïth gø dï jø atade, kany wø jwöŋ jiyi yie ni ge mööta lakge.