Read anuak Mathiew 26 Bible Online

Mathiew 26 - anuak bible

Mathiew 26

¹'Ba kanya ö Jecu na thöör luupögø bëët ki caan, ena köö jï bääge,

²ni «Ŋäyu ni noo tïme na køør nïne ariiø beeye cäŋ mano wøør cäŋ Cäŋa Pööth Thøøe Yie. 'Ba Wär Dhaanhø ocïp ceŋ jiy nee 'näk bäät jaadha no odëëdö.»

³Kanyøgø kwääc laam ki jaae, gena cuuŋö yi øt Kwääy Lam Mana Dwøŋ na cwøl ni Keepa,

⁴ni määnyge ki jöö, kiper nee Jecu makge mëëth ki piny nee 'näkge.

⁵'Ba gena köö, ni «Paa kanyo poot jiyi kar ajwöm-cam, kiper nee bäŋe dïŋaŋ mo tägi dï jiy.»

⁶'Ba kanya en Jecu yi Bethani po Cayman, ŋata kwøŋ bëëtö ni dëëre da dhøøbø,[31]

⁷dhaagø mør aö baŋe ni käädö ki riia mo ena yi wïlli mo ŋeew ka gwel mo thööth døc, ni køny gø wï Jecu, ni Jecu ena kar cam.

⁸'Ba kanya ö bääge na neenge gïnögø, gena gootø, ni köge, na «?Aŋø ni raany riia en?

⁹Kiper maarøgøøni doo dwøga pwödhö ki gwel mo thööth, ni mëëk gwete jøøa can.»

¹⁰'Ba Jecu na ŋäc gïnögø aköö jïge, na «?Aŋø ni ööllu dhaagø en? Kiper ena tïïö ki gïn mo beer døc jïra.

¹¹Kiper jøøa can wø ena dïïu cooth. 'Ba aani, a ba en dïïu cooth.

¹²'Ba kiper mana køny maari dëëra, gïnögø tïïe ni jiiŋŋa aani kiper kanyo koony aani.

¹³Adïëri møn a cäänna uuni, ni kanyo wäro køp luumma nyään na met yie bäät piny bäre, gïna tïïc dhaagø manøgø enø, wø wäro caan ni parra wïc ki eni.»

¹⁴Køøre dhaanhø aciel ki røk jøøa na apaar kurriiø mo nyeŋŋe Juudac Ickarïët, aci baŋ kwääc laam,

¹⁵ni kööe, na «?Agïnaŋø noo mëëgu aani ni näk mo Jecu cïba ceŋŋu?» Ni moocge eni ki gwel ma pïëradäk.

¹⁶Køøre nø, ena put bëëtö ni määnyö ki jöö man cïp Jecu ceŋ jøøgø ki gø.

¹⁷'Ba kanya tïme na dïcäŋ mana dïkwøŋ mar ajwöm-cam mar Møga Näk Ree Bäŋ Thømmø, bääŋi aö baŋ Jecu, ni köge, na «?A kaa ŋø ni manynyï nee jiiŋwa jïrï, kiper niï cämï yie ki cam cäŋ Cäŋa Pööth Thøøe Yie?»

¹⁸Ni kööe, ni «Cou pääny baŋ dhaanhø mør kaace, ni caannu gø jïre ni dïpööy aköö, ni ‹Kanya no owäŋŋö kipera kare acäännö. Cäŋa Pööth Thøøe Yie wøøra wøørø ki bääŋi 'moa paarï.› »

¹⁹Køøre bääge gïnögø atïïcge kaawat mana caani ya Jecu jïge, ni jiiŋge cam cäŋ Cäŋa Pööth Thøøe Yie.

²⁰'Ba kanya tïm pinynyi na wäär, Jecu apï piny lak cam ki bääge na näk apaar kurriiø.

²¹'Ba kanya cämge, Jecu aköö, na «Adïëri møn, a caana gø jïïu, ni dhaanhø aciel dïïu aano cïp ceŋ nyïïmän.»

²²Ni ö bääge ni bwøk cwïnyge døc, ni täkge ki man pëënyge eni no oceele oceele, ni «?Beeye aani, Kwäärö?»

²³Ni dwøgi ya Jecu jïge, ni «Ŋata cwïnynyö ki aani na aciel ya athäänh, aano cïp ceŋ nyïïmän.

²⁴'Ba ennø, Wär Dhaanhø aay keda mana gööri kipere. 'Ba otïmö ni raac døc jï ŋato cïp Wär Dhaanhø ceŋ nyïïmän. Doo beerra eni kiper ŋatøce ki mana ba dii nywølø.»

²⁵Kanyøgø Juudac ŋata ŋeew ree ki Jecu aköö, ni «?Beeye aani, Dïpööy?» Ni dwøgi ya Jecu jïre, na «Acaanï na kare.»

²⁶'Ba kanya pootge ni ge cämö, Jecu alwötö ki møø, ni gwïëth gø, ni pøt gø, ni mëëk gø bääŋi, ni kööe, ni «Lwørru ni cammu gø. Man beeye dëëra.»

²⁷Ni lwør athöödhi. 'Ba na nø dwøk met ec, amëëk geni, ni kööe, ni «Mäthu, u bëët.

²⁸Kiper man beeye remma mar luumma tuut ki jiy, nee køny piny kiper jiy mo thööth nee raay wëënni.

²⁹'Ba a cäänna uuni, naa ba mäthi ki pï nyïïomøki këët, këël kanyo cäŋa gø maathø yie ni nyään ki uuni yi buc Wära.»

³⁰'Ba kanya lønyge ki wär duut Jwøk, gena aa wøk ni cige bäät Kïn Ølip.

³¹Kanyøgø Jecu aköö jïge, ni «Dïwääni u bëët a weyu wiiø kiper gïno tägi dëëra. Kiper ogöörö, ni ‹Aani dïkwääy ogøøa, ni ö dïëki ma pïïth ni keethge.›

³²'Ba kanyo tïŋ a maal, a cøøa nyïmmu Galili.»

³³Ni ö Piterri ni kööe jï Jecu, ni «Këël bääŋi bëët ï dege wiiø kiper gïno tägi dëërï, aani, ï ba wiia na bäre bäre.»

³⁴'Ba adwøk Jecu jïre, na «Adïëri møn, a caana gø jïrï, ni dïwääni ni gwienø poot kär köök, riï mooŋï mooŋø ki aani kwöre adäk naa kuyï.»

³⁵Ni kö Piterri jïre, ni «Këël maa thøw ki ïïni na aciel, ï bäŋ daa mooŋø.» Ni ö bääŋi bëët ni caange teeŋ gïnögø thuwø.

³⁶Kanyøgø Jecu ki bääge gena ci kany mo cwøl ni Gecemeni. Ni kööe jï bääge, ni «Pïïu piny kany dïturu, kany pooda naa cøø kuna läma kaace.»

³⁷Køøre eni Piter, ki wäät Dhebedi karge riet alwøre ni aae ki geni. 'Ba ena tïmö ni kïmmö ni cwïnye opädhö døc.

³⁸Kanyøgø ena köö jïge, ni «Cwïnya peek døc, naa manynya thøø. Dööŋŋu kany nou kuru.»

³⁹Køøre ena ci nyïm mëëth ni leeŋ ree piny ni läme ni kööe, na «Awuuö, ni näk mo løny, wëëk maath athöödhi man[32] pöödhö bääta. 'Ba paa ki køør mana manynya, 'ba beeye ki køør mana manynyï.»

⁴⁰Ni duu baŋ bääŋi moe, ni cwän geni ni geno butö. Ni kööe jï Piter, na «?Aŋø, ba løny jïïu ki man kuru ki aani ki yi caa aciel?

⁴¹Kuru ni lämu, kiper nou ba päänynyi. Kiper jwïëy wø jïëy møn, 'ba dëël jääk.»

⁴²Ni cäŋ døøgø ri rietge ni läme ni kööe, na «Awuuö, ni näk maath athöödhi man ba maar pöödhö, ni ba kääŋi ki man mädha ki gø, tïïc mana manynyï.»

⁴³Ni cäŋ duuö ni cwän bääge ni geno butö, kiper nyeŋge atïmö ni da niine.

⁴⁴Kanyøgøøni gena cäŋ weyø ni aae ni läme ri dääge, ni poot cara luupögø.

⁴⁵Køøre ena duu baŋ bääŋi moe ni kööe jïge, na «?Aŋø, u poot ni uuno butö, nou jwöma rou en? Neennu, kanya wäŋŋi kare acäännö, ni Wär Dhaanhø cïba ceŋ jø raay ennø.

⁴⁶Ööu maal. Ö aaø nø. Neennu, ŋato cïp aani ceŋ nyïïmän kare acäännö ki man ööe.»

⁴⁷'Ba kanya poot Jecu ni cäänö, Juudac na en røk jøøa näk apaar kurriiø aöö ni køøre da lwaak mo päl mo ge käädö ko opëëlle ka athøre, ni ge käla baŋ kwääc laam ki jaae.

⁴⁸'Ba kanyøgø Juudac, ŋata cïp Jecu ceŋ nyïïmänne, ocïpö jïge ki ŋïï, ni kööe, ni «Ŋato dhee nuuma beeye ŋatøca. Wär magu.»

⁴⁹Ni put ö baŋ Jecu ni kööe, ni «Ïïna määth, Dïpööy.» Ni nuum dhi gø.

⁵⁰'Ba Jecu aköö jïgø, ni «?Nyawat, aŋø, ï öömï ŋø kany?» Køøre gena öö ni gäämge Jecu ni makge gø.

⁵¹Kanyøgø dhaanhø aciel røk jøøa bëëdö ki Jecu, cere arwaak baŋ opëëllö mare ni wöth gø wøk, ni gøøc laŋ Kwääy Lam Mana Dwøŋ, ni cëë ïth gø wøk.

⁵²'Ba Jecu aköö jïre, ni «Dwøk opëëllö marï kare. Kiper jiy bëët mo wø kwaany opëëllö, onäk ko opëëllö.

⁵³?Aŋø, iï caarø ni ba løny jïra ki man kwaa Wära, ni put jääŋ baŋa ki nyïïatwiet maal mo thööth mo ba løny ki kwaan?

⁵⁴?'Ba ni näk mo beeye enøgønø, weet Jwøk moa köö ni gïn tägi en doo tägö na enøgønø, a dege thur karge nidïï?»

⁵⁵'Ba kar kaagø Jecu aköö jï lwaak, na «?Aŋø, u ööa baŋa kaawat man wø ci baŋ kuu, nou käära opëëlle ka athøre kiper naa magu? Aani, a wø bëëdö yi kal mar Øt Jwøk Mana Dwøŋ naa pöö cooth, 'ba a käru maa.

⁵⁶'Ba gïnögø bäre tägi kaper nee luupa göör nyïïkuk Jwøki thurge karge.» Kanyøgø bääŋi bëët Jecu awecge ni reŋge.

⁵⁷Ni ö jøøa mak Jecu ni kälge Jecu nyïm Keepa na näk Kwääy Lam Mana Dwøŋ, kanya cuŋ dïpööye mo ciik Jwøk ki jaae yie.

⁵⁸'Ba Piter aläp køør gø ni ree ee jädhö kany mo bäär mëëth, këël mana pïïe yi kal mar Kwääy Lam Mana Dwøŋ. Ni døny yi kal ni pï piny buut dïkuye, naa aŋuun luubö neene.

⁵⁹'Ba kanyøgø kwääc laam ki kwääc løøe bëët, gena määnyö ki luubö mo patha adïëri mo kïthge bäät Jecu nee eni 'näkge.

⁶⁰'Ba këël mana ö jiyi mo thööth na caange luup mo patha adïëri kipere, bäŋ gïn mo ege joodø. 'Ba na tïme na køøre cään, jak ma ariiø aö nyïm,

⁶¹ni köge, ni «Nyeni aköö, ni ‹Løny jïra ki man nyaa Øt Jwøk Mana Dwøŋ piny ni cäŋa gø geerrø ki nïne adäk.› »

⁶²Ni ö Kwääy Lammi Mana Dwøŋ maal, ni kööe ka atade, na «?Aŋø, bäŋ gïn mo løgï? ?Agïnaŋø ni car jøøgø dëërï enø?»

⁶³'Ba Jecu alïŋö jaak. Ni ö Kwääy Lammi Mana Dwøŋ ni kööe jïgø, na «A köömma ïïni ki nyeŋ Jwøa kwøw, caanï jïwa ki man näk mo bee ï na Krictø, na näk O Jwøk.»

⁶⁴Ni dwøgi ya Jecu jïre, na «Acaanï na kare. 'Ba a cäänna uuni, ni køør man en, Wär Dhaanhø oneennu no opï bäät cer cwïï Jwøk na en teeki jïre, ni ööi ka bäät pøøl mo maal.»

⁶⁵Kanyøgø Kwääy Lam Mana Dwøŋ abïïe moe ajeeye, ni kööe, ni «Mare beeye ajaany! ?Aŋø ni poot manynyø lïŋŋe møøk këët en? Ajaany mare anø wïnynyu.

⁶⁶?Agïnaŋø ni caarru kipere?» Ni dwøgi ya jiyi jïre, ni «Eni rømi ka thøø!»

⁶⁷Kanyøgø gena ŋuut nyeŋŋe ki laaw, ni døøŋge gø, ni ö møøki ni dhööŋge eni,

⁶⁸ni ge köö, ni «Caanï jïwa, ï na Krictø. ?Aŋa na gøøc ïïni?»

⁶⁹'Ba Piter opï piny wøk dï kal. Ni ö nyaan ma ŋat tïïc baŋe, ni kööe, ni «Ïïni thuwø, ï bëëdö ka Jecu nyï Galili.»

⁷⁰'Ba dëëre amooŋe nyïm jøøgø bëët, ni kööe, ni «Luumma caanï enø kuua.»

⁷¹'Ba na nyiik dhi kal, ena joot nyaan mørri ma ŋat tïïc thuwø, ni kö nyaanøgø jï jøøa cuŋŋö kaace, ni «Nyeni en bëëdö ka Jecu nyï Nadhareth na aciel.»

⁷²Ni cäŋ dëëre mooŋŋø ni kööŋe, ni «Ŋatøgø kuua.»

⁷³'Ba køøre ki nyi kany mo thiinh, jøøa cuŋŋö kaace anyänh buut Piter ni köge jïre, na «Adïëri møn, ï ena dï jøøgø thuwø, kiper ïïna ŋecwa ki cäänö marï niï cäänö ka cäänö mar jø Galili.»

⁷⁴Kanyøgø Piter atägö ki man cwöl acïëni bääte, ni kööŋe, ni «Ŋatøgø kuua.» Ni put gwienø köö.

⁷⁵Ni ö Piterri ni par wïïe ki gïna caan Jecu, ni «Dïwääni ni gwienø poot kär köök, riï mooŋï mooŋø ki aani ki kwöre adäk naa kuyï.» Ni ci wøk ni jwöŋe ni keeya yie.