Read anuak Mathiew 5 Bible Online

Mathiew 5 - anuak bible

Mathiew 5

¹'Ba kanya ö Jecu na neen lwaak, ena eth maal kö kïdi. 'Ba na pï piny, bääge aö baŋe.

²Ni pwöny geni, ni kööe,

³«Gwïëth en bäät jø wø ŋäc can marge nyïm Jwøk, kiper buya käl maal beeye marge.

⁴«Gwïëth en bäät jø wø kïmmi, kiper cwïnyge di cømø.

⁵«Gwïëth en bäät jø wø mwöl, kiper piny owëëk geni.

⁶«Gwïëth en bäät jø wø näk owär kiper bëënynyö marge kaamar dhaanhø mo onäk käci ki riew, kiper geno wëëk jäŋö.

⁷«Gwïëth en bäät jø wø kunyö, kiper geno køny.

⁸«Gwïëth en bäät jø wø cwïnyge tar, kiper Jwøk neenge neenø.

⁹«Gwïëth en bäät jø wø tïïc bëët-mëër, kiper geno cwøl ni nyïï Jwøk.

¹⁰«Gwïëth en bäät jø wø caanni ki køør bëëtö marge na beer nyïm Jwøk, kiper buya käl maal beeye marge.

¹¹«Gwïëth en bäätu kany wø ö jiyi wø janyge uuni, ni caange uuni, ni kïthge bäätu ki teeŋ luup bëët moa reyø mo patha adïëri kiper nyeŋŋa.

¹²Yïthu mïnge ni kanynyu, kiper gïno mëëk uuni maal dwøŋ. Kiper nyïïkuk Jwøk moa kwøŋ bëëtö nou poodi, acaan jiyi na enøgønø.

¹³«Uuna acäbö mar piny. ?'Ba ni näk ma acäbö lawe obänhnhö, lawe ocäŋ døø kare nidïï? Bäŋ gïn mo røme ki gø këët, 'ba tiirra man weti ni nyøri ya jiyi ki tietge.

¹⁴«Uuna tac piny. Paac mo ogeer bäät thuur ba maar kan.

¹⁵Ni bäŋ ŋat mo nyep lamba ni kïth gø tier dak, 'ba wø cïbe bäät tharabëëta, ni ö taye ni meeny yi øtø bäre.

¹⁶Wär tayu wëëgu rieny na enø nø nyïm jiy, nee tïïe mou na beyø nee neenge, ni jiemge Wääu ni en maal.

¹⁷«Kär nou caara gø naa ööa kuna raanynya ciik Jwøk ki luup moa køp nyïïkuk Jwøki. A ba ööi naa raanynya geni, 'ba a ööi naa wëëga ge thur karge.

¹⁸Kiper adïëri møn, a cäänna uuni, ni këël kanyo räny maalli ki piny, thääŋ piil ciik Jwøk mo thiinh ba doo rwäänyö, këël mano thur jammi moa wäŋŋi bëët karge.

¹⁹'Ba ŋat wäro raany ciik aciel mana thiinhnha eni dëët moa näk ocemø, ni pwöny jiy na enø nø ki gø, eno cwøl ni thiinhnha kare yi buya käl maal. 'Ba ŋat wø tïïc geni ni pööe ki geni, eno cwøl ni dwøŋŋa kare yi buya käl maal.

²⁰Kiper a cäänna uuni, ni näk bëënynyö maru, bëënynyö mar dïpööye mo ciik Jwøk ki mar jø Paricith ba kaale, u ba doo døny yi buya käl maal na bäre bäre.

²¹«Awïnynyu na caani jï jø acääŋŋe, ni ‹Kärï nägö ki dhaanhø. 'Ba ŋat wäro nägi, eni di pëënynyö kar løøk.›

²²'Ba aani, a caana gø jïïu, ni ŋat wø gooti ki coki, eni di pëënynyö kar løøk; ni ŋat wäro jaany coki, eni pëëny kwääc løøe pëënynyö; ni ŋat wäro köö, ni ‹Ïïna bøøl,› eni cøøa yi maac kar ajäla.

²³Kiper manøgønø, ni näk mo olämi marï cïbï bäät gïn wø cïp olämme bääte, ni parï wïïï kaace ni cöögu cwïnye da gïrpiny ki ïïni,

²⁴wii olämi marï buut gïn wø cïp olämme bääte, ni kwøŋï ci kuna døøu kanya ciel ki cöögu. Køøre nø, ïïno ööi ni cïpï olämi marï.

²⁵Wärï laar møør bäät ŋat mo manynya løøk ki ïïni ni tïïyï gø na nyawadu, kanyø poodu nou cäätha kar løøk, kiper nee eni ni pee ïïni kar løøk enø, niï ba cïp cer dïŋut luup, ni ö dïŋut luupi ni cïp ïïni cer ŋat koor, ni ö ŋat koorri ni kïth ïïni øt twöc.

²⁶Adïëri møn, a caana gø jïrï, niï bäŋ doo ööa wøk na bäre bäre këël mano coolï mïlïïn mana näk odööŋ.

²⁷«Awïnynyu na caani, ni ‹Kärï kännö ki luk.›

²⁸'Ba aani, a caana gø jïïu, ni ŋat wø neen dhaagø ni ee parø ki cwïnye, onø kännö ki luk ki gø ki cwïnye.

²⁹Ni näk waŋ cwïïï beeye wø wëëk ïïni bääyö, göön wøk, ni wetï gø. Kiper beerra eni ki man räny thääŋ dëërï mør, ki mana di dëërï bäre leeŋ yi maac kar ajäla.

³⁰'Ba ni näk cer cwïïï beeye wø wëëk ïïni bääyö, ŋul wøk, ni wetï gø. Kiper beerra eni ki man räny thääŋ dëërï mør, ki mana di dëërï bäre ci yi maac kar ajäla.

³¹«'Ba ocaanø thuwø, ni ‹Ŋat wäro kwier cïïe, wär gööde jïgø ki wëël apääk.›

³²'Ba aani, a caana gø jïïu, ni ŋato wäro kwier cïïe jaak, ni paa kiper käp, tïïya cïïe na ŋat luuy. Ni ŋato wäro nywøm dhaagø mo opääö ki cwøre, mare luk ki gø.

³³«Na awïnynyu thuwø na caani jï jø acääŋŋe, ni ‹Kärï kööŋ ki kööŋ mo patha adïëri. 'Ba gïn wø kööŋï kipere ki nyeŋ Wuuö Jwøk, wär put tïïc.›

³⁴'Ba aani, a caana gø jïïu, ni käru kööŋ na bäre bäre. Käru kööŋ ŋëët maal, kiper maal beeye wälu mar Jwøk.

³⁵Käru kööŋ ŋëët piny, kiper piny beeye køøm tiete. Käru kööŋ ŋëët Jerucalem, kiper Jerucalem beeye pääny nyeya mana dwøŋ.

³⁶Ni ba kööŋŋu ŋëët wïthu, kiper ba løny jïïu ki man tïïyu jëënnö aciel ni tar wala cøl.

³⁷'Ba dwøl man wø caannu wär bëëde kare, nee maru jïëy wala maru kweer. 'Ba ni näk mo kööŋ meedu bääte, maneca käla baŋ ŋata raac.

³⁸«Awïnynyu na caani, ni ‹Waŋ cool ka waŋ, ni lëëö cool ka lëëö.›

³⁹'Ba aani, a caana gø jïïu, ni kär kwörï coolï dëër ŋat mo tïïö ki gïn mo raac dëërï. 'Ba ni näk da ŋat mo dhööŋa ïïni ki thääŋ cwïïï, løk thääŋŋï maya jïre thuwø.

⁴⁰'Ba ni näk da dhaanhø mo manynya løøk ki ïïni ni lwør koothi marï, wär abïïno en tiere mëëk eni thuwø.

⁴¹'Ba ni näk da ŋat mo maga ïïni ki teek ki man käärï tëër mare ki yi kiïlömethër aciel, wär käärï jïre ni cäädhï ki yïth kiïlömethërri ariiø.

⁴²Mooc ŋato kwac ïïni, ni ba mänï ŋat mo manynya mäyö baŋï.

⁴³«Awïnynyu na caani, ni ‹Ï doo mëër ki wadu, ni mänï ki nyïïmännï.›

⁴⁴'Ba aani, a caana gø jïïu, ni mëërru ki nyïïmännu, ni lämu kiper jø wø caan uuni,

⁴⁵kiper nou tïmu ni uuna wäät Wääu ni en maal. Kiper eni cäŋ mare wø wëëge tuulö bäät jøøa wïnni ki jøøa mwöl, ni jääŋ køth bäät jøøa beyø ki jøøa reyø.

⁴⁶?'Ba ni näk mou mëër ka jø wø mëër ki uuni keerge, agïnaŋø noo duue jïïu? ?Aŋø, këëlla jø ajwäk, ge ba bëëdö ka bëëtö ma enøgønø thuwø?

⁴⁷?'Ba ni näk mou määtha nyïïmëëgu keerge, agïnaŋø na beer na tïïyu na kaallu jø møga ki gø? ?Aŋø, këël juurre, ge ba bëëdö ka bëëtö ma enøgønø thuwø?

⁴⁸Kiper manøgønø, u doo bëëdö ni bëëtö maru bäre beer, kaawat man bëët Wääu ni en maal ni bëëtö mare bäre beer.