Read anuak Mathiew 9 Bible Online

Mathiew 9 - anuak bible

Mathiew 9

¹Køøre Jecu aeth yi jääy ni ŋut løø poge.

²Kanyøgøøni jiy akän baŋe ki ŋat mo obäp, mo opïël bäät pëëm. 'Ba kanya ö Jecu na neen ŋäädhe marge, ena köö jï ŋata näk obäp, ni «Mak cwïnyï, wääda, raay moï awec.»

³'Ba jak ma dïpööye mo ciik Jwøk acäänö ki cwïnyge, ni «Nyeni janynya Jwøk.»

⁴'Ba kanya ö Jecu na nø ŋäc luumma en cwïnyge, ena köö, na «?Aŋø ni caru gïï mo reyø ki cwïnynyu en?

⁵?A mane ni jööta eni na doo caanø, beeye, ni ‹Raay moï awec,› wala ki man caani, ni ‹Ö maal, ni cäädhï›?

⁶'Ba kiper nee ŋäyu nø ni Wär Dhaanhø jïre da teek bäät piny ki man wec raay,» ena köö jï ŋata näk obäp, ni «Ö maal, ni lwørï pëëmï, ni ciï paac.»

⁷Ni ö ŋatøgø maal ni ci paac.

⁸'Ba kanya ö lwaaki na neenge gïnögø, gena lwäyö, ni jiemge Jwøk, na cïp teeŋ teek ma enønø jï jiy.

⁹'Ba kanya ö Jecu na pöödhe ki kaace, nyen mør ma ŋat ajwäk mo cwøl ni Mathiew ajoode no opï piny kar ajwäk. Ni kööe jïgø, «Ö køøra.» Ni ö maal ni läp køøre.

¹⁰'Ba kanya ö Jecu na pï piny kar cam yi øt Mathiew, jiy mo thööth ma jø ajwäk ki jø raay aöö, ni pïge piny buut Jecu ki bääge.

¹¹'Ba na ö jø Paricithi na neenge gïnögø, gena köö jï bääge, na «?Aŋø ni cäm dïpööyi maru ki jø ajwäk ki jø raay en?»

¹²'Ba kanya ö Jecu na wïny gø, ena köö, ni «Jø wø dëëtge jööt ba many akïïm, 'ba beege jø wø tuu.

¹³Cou ni kwanynyu tier gïna caan Jwøki na kööe, na ‹A manynya mëër, ni kaala olämme.› Kiper a ba ööi naa cwøla jøøa beyø, 'ba a öönynya jø raay.»

¹⁴Kanyøgø bääk Jøøn aö baŋ Jecu, ni köge, na «?Aŋø ni wø tïïwa ki lam-wödö ki jø Paricith en, ni bäägï ba wödö?»

¹⁵'Ba adwøk Jecu jïge, na «?Aŋø, wëët nywöm doo kïmmö ni cø nyakøø poot ena dïge? 'Ba nïne oööi, kanyo ö cø nyakøøe noo lwøri dïge. Kanyøca nø, beeye noo wötge.

¹⁶Bäŋ dhaanhø mo doo rap thääŋ abïï mo nyään dëër abïï mo otøp. Kiper räbi, kanyo nyøøny dëëre, ree jëëe wøk dëër abïï, ni tïme na jeeø mo raac døc.

¹⁷Ni bäŋ køøŋ nyïïomøki mo nyään mo kïth yïth opïc pëëne mo otøp. Ni näk di tïïö, opïri cöötö, ni øc køøŋ nyïïomøki piny, ni ö opïri ni ränyge. 'Ba køøŋ nyïïomøki mo nyään wø kïtha yïth opïc pëëne mo nyärö, ni ö geni ni bëëtge ni geno gwøø karge riet.»

¹⁸'Ba kanya poode ni Jecu cäänna bääk Jøøn na enønø, kwäärö mør mar øt acooŋ lam adunynyö ni këël cøŋŋe piny nyïm Jecu, ni kööe, ni «Nyaara athøw kawaane en. Ööï ni kïthï cerï bääte, nee kwøe.»

¹⁹Ni ö Jecu maal ki bääge ni läp køør gø.

²⁰'Ba kanyøgø dhaagø mo oööl remø mo cwïër dëëre ki cwiiri apaar kurriiø aöö ki ŋää Jecu ni gut deŋ abïï gø.

²¹Kiper ocaar nyijøøgø ki cwïnye, ni «Këël maa guta deŋ abïïne keere, dëëra jöönnö.»

²²'Ba kanya ö Jecu na løk ree ni neen gøøni, ena köö, «Nyaara, mak cwïnyï. Ŋäädhe marï dëërï awëëk jöönnö.» Ni put dëër nyijøøgø døø kare.

²³'Ba kanya pïïc Jecu po kwäärö manøgø, jø wø jwöŋi ko opele ki lwaak mo göö ko oduuru ajoode,

²⁴ni kööe, ni «Aayu, kiper nyilaari kär thøw, 'ba mare niine.» Ni ö jøøgø ni ŋeethge bäät gø.

²⁵'Ba kanya nø cöör lwaak wøk, ena ci yi øtø, ni mak cer nyilaal, ni ö nyilaalli maal.

²⁶Ni ö gïr gïnögø ni wïnye dï paanøce bäre.

²⁷'Ba kanya ö Jecu na pöödhe ki kaace, jak ma ariiø ma cööye aläp køøre, ni ge rëëdö døc, ni «Wui, Nyikwaar Deebit, køny canwa!»

²⁸'Ba na døny øtø, jagøgø na cööye yøø aö baŋe. Ni kö Jecu jïge, ni «?You ŋäädhö ni løny jïra ki man tïïa gïnögø?» Ni dwøkge gø jïgø, ni «Yaa, Kwäärö.»

²⁹Kanyøgø nyeŋge amule, ni kööe, «Otïïc jïïu kaawat man ŋääthu gø enø.»

³⁰Ni ö nyeŋge ni døøge karge. Ni ö Jecu ni kööm geni døøc, ni «Kär dee ŋat caannu gø jïre.»

³¹'Ba na aacge, gïr Jecu acaange dï paanøgø bäre.

³²'Ba kanya nø tïŋ jagøgø na ariiø yøø, nyen mør mo ba cäänö mo dëëre da anägö akäl baŋ Jecu.

³³'Ba na nø riem anägö wøk, nyena näk ba cäänö aput cäänö. Ni ö lwaaki ni rëëm yïthge, ni köge, ni «Bäŋ gïn mo nëëna gïn mo okwøŋ neen dï Icriel cøøn.»

³⁴'Ba jø Paricith aköö, ni «Eni anäk wø riem wøk ka teek kwääy anäge.»

³⁵Ni ö Jecu ni caath dï mïëri bëët, moa døøŋŋø ki moa therø, ni pöö yïth uut acook lam moge, ni køpa luumma nyään na met mar buc Jwøk, ni kunyö ki teeŋ täwe bëët ki teeŋ ŋwiili bëët.

³⁶'Ba na neen lwaak, cwïnye apädhö ki gïrge, kiper ge wïïrö jaak, ni bäŋ ŋat køny geni, ni ge bëëdö kaamar dïëk mo bäŋ dïkwääy jïge.

³⁷Kanyøgø bääge aluumme, ni «Pwödhö aciek døc, 'ba jø tïïc nøk.

³⁸Kiper manøgønø, kwaayu Wää pwöthögø no ociek enø, nee jääk yi pwödhö mare ki jø tïïc.»