Read anuak Maak 1 Bible Online

Maak 1 - anuak bible

Maak 1

¹Täk luumma nyään na met mar Jecu Krictø na näk O Jwøk,

²keda mana gööri ya nyikuŋ Jwøki ma Aydheea, na kööe, ni «Neenï, a jääŋŋa nyïïatwiel mara nyïmï, ŋato jiiŋ jöörï nyïmï.

³Ni da dwør dhaanhø mør mo cwödö ŋää paac, ni ‹Jiiŋŋu jöör Wuuö Jwøk, ni tïïyu uutjïëthe moe ni thïïŋ.› »

⁴Jøøn na näk dïlööy na nyuudhi ree anyoodhe ŋää paac, ni køpa luum lwøk jiy na nyuudhi na en ri løk cwïny, kiper raac jiy nee wec Jwøki.

⁵Ni ö jø mïëc Judia bëët ni öge wøk baŋe, ki jø Jerucalem bëët. Ni ö geni ni lwøgi ya eni na nyuudhi yi Naam Jördan, ni køpge raacge.

⁶Kar kaagø, Jøøn käära abïï mo ocwääc ka jïëc athïrööl, ni kaw ee twöö piere, ni cama bäänyö ki maar kïc.

⁷Ni køp gø, ni «Køøra da dhaanhø mo öö mo dwøŋŋa eni ki aani, ni këël thøøth waye ba doo mïërö jïra ki man pïïa piny ni päda ge wøk tiete.

⁸Aani, dëëtu lwøa ka pïï na nyuudhi, 'ba eni dëëtu olwøe na nyuudhi ki Jwïëc Jwøk na en kur keere.»

⁹'Ba ki yïth nïrögøøni, Jecu aöö ki yi Nadhareth yi ŋööm Galili, ni lwøgi ya Jøønni na nyuudhi yi Naam Jördan.

¹⁰'Ba kanya ö Jecu wøk ki yïth pïï, maal aput raŋ ni ree ee jabø, ni neen Jwïëc Jwøk ni ööa piny bääte kaamar akuuru.

¹¹Ni ö dwølli ki maal, ni kööe, ni «Ïïna Wääda na mëëra ki gø, na met yia ki marï.»

¹²Ni ö Jecu ni puti ya Jwïëc Jwøki bwøth paap.

¹³Ni bëëde paap ki nïne ma pïëraŋween, ni pääny Ceethanni päänynyö. Ni eni bëëdö na aciel ki lääc paap. Ni ö nyïïatwiet maalli ni tïnyge gøøni.

¹⁴'Ba kanya nø twöc Jøøn, Jecu aluuny ö yi Galili, ni køpa luum Jwøk na nyään na met.

¹⁵Ni kööe, ni «Kanya wäŋŋi athur kare, ni buc Jwøk kare acäännö. Løgu cwïnynyu ni jïëyu luumma nyään na met, ni ŋääthu gøøni.»

¹⁶'Ba kanya cääth Jecu bäät Puul Galili, eni Cayman ki coki ma Andaru ajoode, ni ge lëëŋö ka ajääp yi naam, kiper gena dïbïth rec.

¹⁷Ni kö Jecu jïge, ni «Ööu ni caathu køøra. Uuno tïïa na dïbïth jiy.»

¹⁸Kanyøgø ajääpi moge aputge wec, ni läpge køøre.

¹⁹'Ba na ci Jecu nyïm mëëth, eni Jeemeth o Dhebedi ki coki ma Jøøn ajoode, ni ge ena yi jääge, ni ge kwuö ka ajääpi.

²⁰Ni put geni cwøl. Ni wiige wääge ma Dhebedi yi jääy ki jø tïïc, ni caathge køøre.

²¹Kanyøgø gena ci yi Kapernaam. 'Ba na tïme na cäŋ jwömö Jecu aput ci øt acooŋ lam, ni pööe.

²²'Ba jiy yïthge arëëm ki pwöc mare, kiper na pwöny geni na ŋat mo jïre da teek, ni ba caal dïpööye mo ciik Jwøk.

²³'Ba øt acooŋ lam marge da dhaanhø mo dëëre da jwøk mo raac.

²⁴Ni ö eni ni put köö ki dwøl mo päl, na «?Agïnaŋø noo tïïyï ki waani, ï na Jecu nyï Nadhareth? ?Ï ööa kuna raanynyï waani? Ï ŋääa, ni ïïna ŋata en kur keere, na näk mar Jwøk.»

²⁵'Ba ajook Jecu, ni kööe, ni «Lïŋï, ni ööï wøk ree.»

²⁶Ni ö jwøøgøøni na raac enø, ni meec gø ni ö wøk dëëre, ni rëëdö ki dwøl mo päl.

²⁷'Ba geni yïthge arëëm bëët, ni pëënyge dëëtge keerge, ni köge, ni «?Man agïnaŋø? ?Pwöc mo nyään? Këël juuga reyø aköömme ki teek, ni leŋge dwøre.»

²⁸Ni put gïre wïnyö dï mïëc Galili bëët.

²⁹'Ba kanya öge wøk ki yi øt acooŋ lam, Jecu ki Jeemeth ki Jøøn aput ci po Cayman ki Andaru.

³⁰'Ba mii cï Cayman obutö ni tuu ka adïrïgi, ni putge gø caan jï Jecu.

³¹Ni ööe ni mak cer gø, ni tïŋ gø maal, ni puti ya adïrïgi wec. Ni ö nyijøøgø ni tïny geni.

³²'Ba na näk abøønynyøgø na päth cäŋŋi, jøøa tuu bëët ki jøøa dëëtge da anäge akälge baŋ Jecu.

³³Ni ö jø paaci bëët ni cooŋge rege dhi øtø.

³⁴Ni ööe ni køny jiy mo thööth moa näk dëëtge da teeŋ ŋwiili mo thööth, ni riem anäge wøk mo thööth. Na anäge käre wëëk cäänö, këël na ŋäcge eni.

³⁵'Ba ni piny poot na amöölla døc ni piny cøl, Jecu apäy ni aa paap kany mo bäŋ jiy yie, ni läme kaace.

³⁶'Ba Cayman ki jøøa en buute gena ci kuna manyge eni.

³⁷'Ba na jootge gø, gena köö jïre, «Jiy bëët caya ïïni.»

³⁸Ni kööe jïge, ni «Beerra man cøø mïëri møga, nee luum Jwøk køba kaace thuwø; kiper beeye gïna ööa kipere.»

³⁹Ni caath dï Galili bäre, ni køpa luum Jwøk yïth uut acook lam moge, ni riem anäge wøk.

⁴⁰Ni ö ŋat mo ree da dhøøbø[1] ni ö baŋ Jecu, ni kwaya gø, ni këël cøŋŋe piny, ni kwac gø, «Ni näk mo ïïno jïëy, dëëra diï dwøga kare.»

⁴¹'Ba na päth cwïnye ki gïre, cere arwaak baŋ gø ni mul gø, ni kööe jïgø, «Aana jïëy, dëërï døø kare!»

⁴²Ni ö dhøøbe ni put aay dëër ŋatøgø, ni tïm dëëre ni pøøth.

⁴³Ni cem gø døøc, ni put gø wëëk wääth,

⁴⁴ni caan gø jïgø, ni «Kär dee gïn caanï jï ŋat mør. 'Ba ciï, ni nyoothï dëërï jï dïlämi, ni cïpï ko olämi mana caan Modhe kiper døøn dëërï kare ni wø näk ŋïï jï jiy.»

⁴⁵'Ba ena aay ni put tägö ki man car gø jaak, ni køpa gø jï jiy bëët. Kiper manøgø nø, Jecu atïmö ni ba maar ö dï pääny ni ree ee nyoodhø, 'ba bëëdö yïth mïëri moa en wøk. Ni ö jiyi baŋe ki yïth mïëri bëët.