Read anuak Maak 12 Bible Online

Maak 12 - anuak bible

Maak 12

¹Kanyøgø Jecu atägö ki man cään geni ki luup mo keda leer, ni kööe, ni «Da dhaanhø mør mo opïïdhö ki pwöth omøki, ni ciel gø ki ciel, ni tïïe ki kany bii nyïïomøki yie, ni gëëde ki øt koor, ni cïp pwöthögø ceŋ jø puur, ni aa paac mør.

²'Ba kanya päŋ dwäde mo kac, eni laŋŋe ajääŋ baŋ jø puur moøgø, nee käde baŋge ki nyïïjer pwöthögø.

³'Ba laŋŋøgø amakge ni pwötge gø, ni wëëkge gø døø ki ceŋŋe jaak.

⁴Ni ö wää pwöthögø ni cäŋ jääk baŋge ki laŋŋø mør, ni moocge wï gø ki ŋwellø, ni päätge gø.

⁵Ni cäŋ mørø jääŋŋö, ni 'näkge gø. Ni tïïcge laaŋe møøk mo thööth na enøgønø, ni møøk pwötge pwödö, ni 'näkge møøk.

⁶«'Ba eni poot da wääde ma aciel, ŋata mëëre ki gø. Køøre cään, wääde manøgø ajääŋ baŋge, ni kööe, ni ‹Wääda wøørge wøørø.›

⁷«'Ba jø puur gena cäänö yïthakicge keerge, ni köge, ni ‹Man beeye lwiidhø. Beerra man nääø gø, nee pwödhö tïme na marø.›

⁸Ni makge gø ni 'näkge gø, ni leeŋge gø wøk ŋää pwödhö.

⁹«?'Ba agïnaŋø nø noo tïïc wää pwöthögø? Eni öö ni 'näk jø puur moøgø, ni cïp pwöthögø ceŋ jø møøk.

¹⁰?Aŋø, gïn käru kwaanø yi wëël Jwøk? na köö, «ni ‹Kïdi mana kwier dïgëëte, atïmö na kïn gøøt mana pere letha eni na mak øtø.

¹¹Ni gïnögø tïïya Wuuö Jwøki, ni beeye gïn mo rëëma ec ki nyeŋŋø.› »

¹²Ni tïm dïbwöthe mo jø Juuth ni ge manynya man makge Jecu, 'ba ge lwäär ki lwaak. Kiper ajootge ni tier leeya caane geela geni. Køøre ena wecge ni aacge kaace.

¹³Køøre dïbwöthe mo jø Juuth, jø Paricith møøk ki jic Eerat møøk ajääŋge baŋ Jecu, kiper nee eni bïthge ki luupe.

¹⁴Ni öge ni köge jïgø, «Dïpööy, ŋäcwa ni ïïna dhaanhø miï caana adïëri, ni jiy raŋï ka waŋ aciel, ni bäŋ kwör jiy mo døøŋŋø mo ŋäyï. 'Ba ï pöö ka jöör Jwøk na adïëri. ?Beeye gïn mo beer ki man cïpö ka ajwäk jï Cidhar,[12] wala ba beer?

¹⁵?Wa doo cïpö, wala kärwa cïpö?» 'Ba na joot atatge, ena köö jïge, na «?Aŋø ni päänynyu aani en? Kännu jïra ki gwelø, nee neena.»

¹⁶Ni känge ka aciel. Ni kööe jïge, ni «?Man a kïdö mar ŋa ni nyeŋŋe oput göör tiere en?» Ni köge jïgø, ni «Beeye Cidhar.»

¹⁷Ni kö Jecu jïge, «Dwøgu japa näk jap Cidhar baŋ Cidhar, ni dwøgu japa näk jap Jwøk baŋ Jwøk.» Ni rëëm yïthge ki gø.

¹⁸Kanyøgø jø Cajucith ni wø köö ni bäŋ duun wøk ki yi thøø, møøk aö baŋ Jecu, ni pëënyge eni ni köge,

¹⁹ni «Dïpööy, Modhe waana göönne ki ciik, ni ‹Ni näk mo dhaanhø coki othøw, ni dööŋ cïïe wøk, 'ba jïre bäŋ nyilaal, ŋatøgø cïmädhi dee lwørø, ni dee wï coki nywølø.›

²⁰'Ba da jak ma nyïïmëëe abïriiø. Mana dwøŋ anyöömmö ki dhaagø, ni thøøe ni bäŋ nyilaal mo ee nywølø.

²¹Ni ö nyena käl køøre, ni lwør dhaaŋŋøgø, ni thøøe, ni bäŋ obwöre mo ee nywølø. Ni ö dääge ni poode na enøgønø thuwø,

²²këël mana ö geni karge bïriedi ni thøwge, ni bäŋ nyilaal mo ege nywølø. 'Ba na tïme na køøre cään, dhaagø aläw thøø thuwø.

²³?'Ba kanyo duu jiyi wøk ki yi thøø nø, dhaagø manøgø otïme ni ena cï ŋa? Kiper ena bëëdö na dhaagø jï jagøgø karge bïriet.»

²⁴Ni kö Jecu jïge, na «?Aŋø, patha gïn en na wëëk u rwäänyö ki jöö, kiper mana kuyu weet Jwøk, ki teek Jwøk bëët?

²⁵Kiper kanyo duu jiyi wøk ki yi thøø, røkge ba nywømge, ni bäŋ nyïïge mo wëëk nywöm. 'Ba ge tïmö ni ge caala nyïïatwiet maal.

²⁶'Ba nee kiper tïŋ jiy maal ki yi thøø, ?käru kwaanø yi wëël Modhe kanya no ocaanø kiper abuŋŋö, kanya kö Jwøki jïgø, ni ‹Aana Jwø Eeberam ni näga Jwø Aydhak, ni näga Jwø Jeekap›?

²⁷Eni paa Jwø jøøa näk othøw, 'ba ena Jwø jøøa kwøw. Uuna bääyö kiree.»

²⁸'Ba dïpööy aciel mar ciik Jwøk aöö, ni wïny döötge ni ge pïëmö yïthakicge keerge. 'Ba na joot Jecu ni luup ee løø jïge na karge, Jecu apëënynye, na «?A ciik mane na pere letha eni dï moa cem bëët?»

²⁹Ni løgi ya Jecu, ni «Ciik mana pere letha eni beeye en, ‹Wui, u na jø Icriel, wïnynyu! Wuuö Jwøk na näk Jwøø bee eni keere na Jwøk.

³⁰Niï doo mëër ki Wuuö Jwøk na näk Jwøï ki cwïnyï bäre, ki jwïëyï bäre, ka acaayï bäre, ki teegï bäre.›

³¹Ni rietge beeye en, ni ‹Ï doo mëër ki ŋat mør kaawat man wø mëërï ki dëërï.› Bäŋ ciik mørø këët mo kaala ciik moï.»

³²Ni kö ŋatøgø jïgø, ni «Kare møn, dïpööy. Acaanï na adïëri ni Wuuö Jwøk beeye eni keere, ni bäŋ mør, 'ba beeye eni.

³³Ki man mëërö ki eni ki cwïny bäre, ka acaara bäre, ki teek bäre, ni mëërö ki dhaanhø mør keda man wø mëër dhaanhe ki dëëre, letha pere døc ki man cïp olämme mo wø waaŋ bäre ki teeŋ olämme møga.»

³⁴'Ba Jecu na joot gøøni ni luubö ee dwøgø na kare, ena köö jïgø, ni «Karï ba bäär ki buc Jwøk.» 'Ba køør manøgø, bäŋ ŋat mo cwïnye ee maar mak ki man cäŋ gø pëënynyö ki pïëc.

³⁵'Ba kanya pöö Jecu yi kal mar Øt Jwøk Mana Dwøŋ, ena köö, ni «?Dïpööye mo ciik Jwøk kany wø köge, ni ‹Krictø beeye O Deebit,› tiere aŋø?[13]

³⁶Kiper Deebit ki dëëre ena cäänö ki køør mana nyooth Jwïëc Jwøki na en kur keere, ni kööe, «ni ‹Wuuö Jwøk aköö jï Kwääya, ni «Pï bäät cwïïa, këël mano cïba nyïïmännï tietï.» ›

³⁷Eni, ena cwøl Deebiti ki dëëre ni Kwäärö. ?Ena dee cäŋ tïmö na wääde nidïï nø?» Ni ö lwaaøgø ni päl enø ni wïnyge dwøre ni mïn yïthge.

³⁸'Ba Jecu na pööe, ena köö, ni «Gwøgu rogu ki dïpööye mo ciik Jwøk, jø wø yïthge met ki käär abïïe mo beyø, ni wø many määth kwör gath,

³⁹ni wø yïthge met ki bëëtö kwör bëëte moa beyø geni yïth uut acook lam, ki kwör ajieme kwör caammi,

⁴⁰jø wø cam uut määr thuunhnhi, ni wø lämö ki lam mo bäär ni nyootha rege. 'Ba geno jïti ka ajäla mo dwøŋŋa eni.»

⁴¹Kanyøgø Jecu ena pï piny nyïm gïn wø cïp muuce yie, ni neeta lwaaøgø kanya kïthge muuce yi gø. Ni ö jiyi mo thööth mo okwär ni kïthge yi gø ki gwel mo thööth.

⁴²Ni ö dhaage ma cï thøø ni kïth yi gø ki mïlïïne ariiø, ni beege thäŋ gwel.

⁴³'Ba Jecu bääge acwöl baŋe, ni kööe jïge, na «Adïëri møn, a caana gø jïïu, ni nyijøøgø ni can na cï thøø enø, acïpö ki gwel mo kaala mo jøøgø bëët na cïpö yi gïn wø cïp muuce yie.

⁴⁴Kiper geni bëët, ge lwöta ri moa thööth na en jïge. 'Ba nyijøøgø, këël na cane, moa en jïre bëët akïth yi gø, ni beege japa dee bëënnö bëët.»