Read anuak Maak 14 Bible Online

Maak 14 - anuak bible

Maak 14

¹'Ba kanyøgø oløny ni dööŋŋa nïne ariiø kiper cäŋ Cäŋa Pööth Thøøe Yie, ka ajwöm-cam mar Møga Näk Ree Bäŋ Thømmø. 'Ba kwääc laam ki dïpööye mo ciik Jwøk ge caya jöö man makge Jecu ki gø mëëth ki piny, nee 'näkge.

²'Ba gena köö, ni «Paa kanyo poot jiyi kar ajwöm-cam, kiper nee bäŋe dïŋaŋ mo tägi dï jiy.»

³'Ba kanya en Jecu yi Bethani po Cayman, ŋata kwøŋ bëëtö ni dëëre da dhøøbø, ni eni ena kar cam, dhaagø mør aö baŋe ni käädö ki riia mo ena yi wïlli mo ŋeew ka gwel mo thööth døc. Ni ö dhaaŋŋøgø ni jap dhi gø, ni køny gø wï gø.

⁴'Ba jø møøk mo ena kaace gena cäänö yïthakicge ni geno gootø, ni köge, na «?Aŋø na raany maari jaak en?

⁵Kiper maarøgøøni doo dwøga pwödhö ki gwel mo kaala dïpe adäk ni mëëk gwete jøøa can.» Ni jookge dhaaŋŋøgø døc ni geno gootø.

⁶'Ba Jecu aköö, ni «Weyu dhaaŋŋøgø. ?Aperŋø ni ööllu gø en? Kiper ena tïïö ki gïn mo beer døc jïra.

⁷Kiper jøøa can wø ena dïïu cooth, ni løny jïïu ki man tïïyu gïï mo beyø jïge kanyo wäro manynyu gø. 'Ba aani, a ba en dïïu cooth.

⁸Eni, gïna näk løny jïre ki man tïïc gø, atïïe. Eni kwøŋa dëëra wïïr kiper kanyo koony aani.

⁹Adïëri møn, a caana gø jïïu, kanyo wäro køp luumma nyään na met yie bäät piny bäre, gïna tïïc dhaagø manøgø enø, wø wäro caan ni parra wïc ki eni.»

¹⁰Kanyøgøøni Juudac Ickarïët, na näk dhaanhø aciel ki røk jøøa näk apaar kurriiø, aci baŋ kwääc laam nee Jecu cïp ceŋge.

¹¹'Ba na wïnyge gø, yïthge amïnnö, ni buukge jammi moo mëëkge eni. Ni ö eni ni put määnyö ki jöö man cïp Jecu ki gø.

¹²'Ba dïcäŋa täk ajwöm-cam mar Møga Näk Ree Bäŋ Thømmø, ni beeye kany wø 'näkge nyidier Cäŋa Pööth Thøøe Yie, bääk Jecu aköö jïgø, na «?A kaa noo wëëgï wa ciin yie nee jiiŋwa jïrï, kiper niï cämï yie ki cam cäŋ Cäŋa Pööth Thøøe Yie?»

¹³Ni jääŋ bääge ariiø, ni kööe jïge, ni «Cou pääny. 'Ba ŋat mo tïëdö ki pïï ki dak orøømmi ki uuni. Wäru läpu køøre.

¹⁴'Ba kanyo døny yie, wäru kööu jï wää paaci, ni ‹Dïpööy aköö, ni «Øt wëël mara en kaa, mano cäma yie ki cam cäŋ Cäŋa Pööth Thøøe Yie ki bääga?» ›

¹⁵'Ba uuno nyuunhnhe ki yi øtø mo laac maal bäät pööki, mo onø peeth. Kanyøce nø, wär jiiŋŋu kiperø.»

¹⁶Ni ö bäägögø ni tïŋge ni cige pääny, ni jootge gø keda mana caan gø jïge. Ni jiiŋge cam cäŋ Cäŋa Pööth Thøøe Yie.

¹⁷'Ba na tïm pinynyi na wäär, Jecu aöö ki bääge na näk apaar kurriiø.

¹⁸'Ba kanya enge kar cam ni ge cämö, Jecu aköö, na «Adïëri møn, a caana gø jïïu, ni dhaanhø aciel dïïu aano cïp ceŋ nyïïmän, ŋat mo wa cämö ki gø ennø.»

¹⁹Ni bwøk cwïnyge, ni täkge ki man pëënyge eni no oceele oceele, na «?Aŋø, beeye aani?»

²⁰'Ba ena köö jïge, ni «Beeye dhaanhø aciel dïïu, u na apaar kurriiø, ŋat cweny møø ya athäänh ki aani na aciel en.

²¹Kiper Wär Dhaanhø aay keda mana gööri kipere. 'Ba otïmö ni raac døc jï ŋato cïp Wär Dhaanhø ceŋ nyïïmän. Doo beerra eni kiper ŋatøce ki mana ba dii nywølø.»

²²'Ba kanya pootge ni ge cämö, Jecu alwötö ki møø, ni gwïëth gø, ni pøt gø, ni mëëk gø geni, ni kööe, «Lwørru. Man beeye dëëra.»

²³Ni lwöte ka athöödhi. 'Ba na nø dwøk met ec, amëëk geni, ni mäthge dëër gø bëët.

²⁴Ni kööe jïge, ni «Man beeye remma mar luumma tuut ki jiy, ni køny piny kiper jiy mo thööth.

²⁵Adïëri møn, a caana gø jïïu, naa ba mäthi ki pï nyïïomøki këët, këël kanyo cäŋa gø maathø yie ni nyään yi buc Jwøk.»

²⁶'Ba na nø lønyge ki wär duut Jwøk, gena aa wøk ni cige bäät Kïn Ølip.

²⁷Ni kö Jecu jïge, ni «Uuni bëët a weyu wiiø. Kiper ogöörö, ni ‹Aani dïkwääy dïëk ogøøa, ni ö dïëki ni keethge.›

²⁸'Ba kanyo tïŋ a maal, a cøøa nyïmmu yi Galili.»

²⁹'Ba Piter aköö jïgø, ni «Këël bääŋi bëët ï dege wiiø, ba doo løny jïra.»

³⁰Ni kö Jecu jïgø, na «Adïëri møn, a caana gø jïrï, ni dïcäŋi, yi wäär man, ni gwienø poot kär köök kwöre ariiø, riï mooŋï mooŋø ki aani ki kwöre adäk naa kuyï.»

³¹'Ba Piter aŋwöyö døc, ni «Këël maa thøw ki ïïni na aciel, ï bäŋ daa mooŋø.» Ni ö geni bëët ni cäänge na enøgønø.

³²'Ba Jecu ki bääge gena ci kany mo cwøl ni Gecemeni. Ni kööe jï bääge, ni «Pïïu piny kany, kanyo pooda naa lämö.»

³³Ni lwør Piter ki Jeemeth ki Jøøn, ni aae ki geni, ni tïm cwïnye no opädhö døc, ni eni kïmmö.

³⁴Ni kööe jïge, ni «Cwïnya peek døc naa manynya thøø. Dööŋŋu kany ni kuru.»

³⁵'Ba na ci nyïm mëëth ree aleeŋ piny ni läme, ni nee løny ki man bødhe ki kanya wäŋŋi.

³⁶Ni kööe, «Abba, Awuuö, jammi bëët lønynya jïrï. Wëëk maath athöödhi[15] man pöödhö bääta. 'Ba paa ki køør mana manynya, 'ba beeye ki køør mana manynyï.»

³⁷Ni duue ni cwän bääge ni geno butö. Ni kööe jï Piter, ni «?Cayman, ïïno butö? ?Ï bäŋ doo maara kurö ki yi caa aciel?

³⁸Kuru ni lämu, kiper nou ba päänynyi. Kiper jwïëy wø jïëy møn, 'ba dëël jääk.»

³⁹Ni cäŋ aay ni läme, ni nøøya luupa kwøŋ carø.

⁴⁰Ni cäŋ duuö ni cwän bääge ni geno butö, kiper nyeŋge atïmö ni peek døc ki niine, ni tïmge ni bäŋ gïn mo ŋäcge mo maarge løk jïre.

⁴¹'Ba Jecu acäŋ duuö ri dääge ni kööe jïge, no «?U poot ni uuno butö en, nou jwöma rou? Manøgø päl nø. Kanya wäŋŋi aöö. Wär Dhaanhø cïba ceŋ jø raay ennø.

⁴²Ööu maal nøø aa nø. Neennu, ŋato cïp aani ceŋ nyïïmänna aløny ni öö.»

⁴³'Ba kanya poot Jecu ni cäänö, Juudac na en røk jøøa näk apaar kurriiø aöö, ni køøre da lwaak mo käädö ko opëëlle ka athøre, ni ge käla baŋ kwääc laam ki dïpööye mo ciik Jwøk ki jaae.

⁴⁴'Ba Juudac, ŋata cïp Jecu ceŋ nyïïmänne, ocïpö jïge ki ŋïï, ni kööe, ni «Ŋato dhee nuuma beeye ŋatøca; wär magu ni källu gø ni you koorø døc.»

⁴⁵'Ba na pïïe, ena put ci baŋ Jecu, ni kööe, «Dïpööy.» Ni nuum dhi gø.

⁴⁶Ni ö jøøgø ni gäämge Jecu ni makge gø.

⁴⁷'Ba dhaanhø aciel dï bääk Jecu mo cuŋŋö kaace, opëëlle awöth wøk, ni gøøc laŋ Kwääy Lam Mana Dwøŋ, ni cëë ïth gø wøk.

⁴⁸'Ba Jecu aköö jïge, na «?Aŋø, u ööa baŋa keda man wø ci baŋ ŋat ageem, nou käära opëëlle ka athøre kiper naa magu?

⁴⁹Aani, cooth a wø bëëdö ka uuni naa pöö yi kal mar Øt Jwøk Mana Dwøŋ, ni käru a maa. 'Ba gïïögø tägi kaper nee weet Jwøk thurge karge.»

⁵⁰Ni ö bääŋi bëët ni wecge Jecu ni reŋge.

⁵¹'Ba da nyen mo poot na wøp mo käära aleeŋŋa keere, mo cäädhö køør Jecu, ni ö eni na magi ya jøøgø.

⁵²'Ba ena reeŋø ki dëëre, ni ö abïïne ni dööŋe ceŋ jøøgø.

⁵³Køøre Jecu akïthge nyïm Kwääy Lam Mana Dwøŋ. Ni kwääc laam bëët, ki jaae, ki dïpööye mo ciik Jwøk dëëtge ege cooŋø.

⁵⁴'Ba Piter aläp køør gø ni ree ee jädhö kany mo bäär mëëth, ni døny yi kiir Kwääy Lam Mana Dwøŋ. Ni eno pï piny ki dïkuye, ni juŋö ki maac.

⁵⁵'Ba kanyøgø, kwääc laam ki kwääc løøe bëët, gena määnyö ki luubö mo kïthge bäät Jecu, kiper nee eni 'näk. 'Ba bäŋ gïn mo ege joodø.

⁵⁶Kiper jiy mo thööth aöö ni kïthge bääte ki luup tööt jaak. 'Ba luupge atïmö na gwääe.

⁵⁷Ni ö jø møøki maalø ni kïthge bääte ki luup tööt, ni köge,

⁵⁸na «Awïnywa ni eni köö, ni ‹Aani, Øt Jwøk man en na tïïc ki ceŋ, onyaa piny ni geera mør ki nïne adäk mo ba tïïc ka ceŋ.› »

⁵⁹'Ba këël na cäänge na enøgønø, luupge poot na gwääe.

⁶⁰Køøre Kwääy Lam Mana Dwøŋ aput ö maal dïge, ni pëëny Jecu, ni «?Aŋø, bäŋ gïn mo løgï kiper gïïögø ni car jøøgø dëërï enø?»

⁶¹'Ba ena lïŋö ni bäŋ gïn mo ee dwøgø. Ni cäŋi ya Kwääy Lammi Mana Dwøŋ pëënynyö, «?Bee ï na Krictø, O Jwø wø pwøc?»

⁶²Ni kö Jecu, ni «Beeye aani. 'Ba Wär Dhaanhø oneennu no opï bäät cer cwïï Jwøk na en teeki jïre, ni eni öö ki yïth pøøt maal.»

⁶³Kanyøgø Kwääy Lam Mana Dwøŋ abïïe moe ajeeye, ni kööe, na «?Aŋø ni poot manynyø lïŋŋe møøk këët en?

⁶⁴Ajaany mare anø wïnynyu. ?Agïnaŋø ni caarru kipere?» Ni ö geni bëët ni jäälge gø ni mare rømi ka thøø.

⁶⁵Ni täk jø møøki ki ŋuut bääte ki laaw, ni twöcge nyeŋ gø, ni døøŋge gø, ni ge köö jïgø, «Caan ŋata gøøc ïïni!» Ni käli ya dïkuye ni dhööŋge dhööŋŋö.

⁶⁶'Ba Piter kanya en yi kal, nyakøø aciel mo ena dëët nyïïakuk wø tïny Kwääy Lam Mana Dwøŋ acur buute.

⁶⁷'Ba na neen Piter ni jøŋa dëëre ki maac, jïgø aneene, ni kööe, «Ïïni thuwø, ï ena buut Jecu nyï Nadhareth.»

⁶⁸'Ba Piter dëëre amooŋe, ni kööe, «Aani, gïnö ni caanï enøgø tiere kuua; bäŋ gïn mo ŋääa kipere.» Ni aa dhi kal.

⁶⁹'Ba ena cäŋ nyakøønnøgø jootø, ni täge ki man cäŋ gø caannø jï jøøa cuŋŋö kaace, ni «Nyeni en, ena dïge.»

⁷⁰'Ba ree acäŋ mooŋŋø. 'Ba køøre ki kany mo thiinh, jøøa cuŋŋö kaagø acäŋ köö jï Piter, na «Adïëri møn ï ena dïge, kiper ïïna nyï Galili.»

⁷¹Kanyøgø Piter atägö ki man cwöl acïëni bääte, ni kööŋe, ni «Ŋatø ni cäänu kipere enø kuua.»

⁷²Ni put gwienø nwöyö ki köö. Ni ö Piterri ni put wïïe par ki gïna caan Jecu jïre, ni «Dïwääni ni gwienø poot kär köök kwöre ariiø, riï mooŋï mooŋø ki aani ki kwöre adäk naa kuyï.» Ni päth cwïnye døc ni jwöŋe.