Read anuak Maak 16 Bible Online

Maak 16 - anuak bible

Maak 16

¹'Ba na thum cäŋ jwömö, Meeri Magdalin, ki Calöme, ki Meeri mii Jeemeth, gena ŋëëö ki mäth wïïr, kiper nee ge cige nee dëër Jecu wïïrge ki gø.

²'Ba na tïm pinynyi na amöölla cøøn ki täk tïïc,[20] gena møøl bäät bwörö kanya tuul cäŋŋi.

³Ni ge cäänö keerge, na «?Aŋa noo ŋïël kïdi wøk tïn dhi bwörö kiperø?»

⁴'Ba na lwïthge, kïdi ajootge no onø ŋïël ŋääe, këël na bëëde na kïdi mo dwøŋ døc.

⁵'Ba na dønyge yi bwörö, nyen mo poot na wøp ajootge no opï piny kur cwïïc, no oruyö ka abïï mo tar mo ŋwaŋŋi døc. Ni lwäcge døc.

⁶Ni kööe jïge, ni «Käru lwäyö. Ŋääa, nou manynya Jecu nyï Nadhareth, ŋata gur bäät jaadha no odëëdö. Ena tïŋ maal. Eni tøør kany. Neennu kanya pïëlge gø yie.

⁷'Ba cou ni caannu gø jï bääge ki Piter, ni eni cøøa nyïmmu yi Galili. Eno jootu kaace, keda mana caan gø jïïu.»

⁸Ni öge wøk ki yi bwörö ni reŋge, kiper dëëtge atïmö ni kwanynyi, ni wïthge rege noodø. 'Ba bäŋ gïn mo ege caanø jï dhaanhø mør, kiper mana tïmge ni ge lwäär. (Maak 16:9-20 tøør ki dhi Gïrïïk yïth weet Maak møøk moa cääŋŋe.) [

⁹'Ba dïcäŋa ö Jecu maal ka amöölla cøøn ki täk tïïc, dëëre akwøŋ nyuth Meeri Magdalin, ŋata riem anäga näk abïriiø wøk dëër gø.

¹⁰Ni ö Meeri ni cøøe ni køp gø jï jøøa bëëdö ki eni, kanya bëëtge ni ge kïmmö ni ge jwöŋö.

¹¹'Ba na wïnyge gø ni Jecu ocäŋ kwøwø, ni eno nø joot Meeri, ge kär jïëy ki mare.

¹²'Ba køør manøgø, Jecu dëëre acäŋ nyoothø ki kïdö mør jï jiy ariiø dëët bääge, mo cäädhö dï paac.

¹³Ni ö jøøgø ni døøge baŋ bääge møga ni køpge gø jïge. 'Ba marge kärge jïëö.

¹⁴'Ba na näk ŋääe cään, Jecu dëëre acäŋ nyuth bääge na näk apaar kurciel ki dëëtge, ni ge ena kar cam, ni cään geni kiper mana teek cwïnyge ni kärge jïëy. Kiper luumma caan jøøa neen gø køør mana ö maal kärge jïëö.

¹⁵Ni kööe jïge, ni «Cou ni caathu dï piny bäre, ni køpu luumma nyään na met jï jiy bëët.

¹⁶'Ba ŋato wäro jïëy ni ŋäädhe ni lwøi na nyuudhi, opiem. 'Ba ŋato wäro ba jïëy ni ŋäädhe, ojääl.

¹⁷'Ba ŋïïce moi ocäädhi ki jø wø jïëy ni ŋääthge. Anäge oriemge wøk ki nyeŋŋa, ni cäänge ki dhøgi mo nyärö,

¹⁸ni kwaanyge thwöre. 'Ba ni näk da gïr thøø mo maathge, bäŋ gïn mo tïïe dëëtge. Ni kïthge ceŋge bäät jø täwe, ni jöön dëëtge.»

¹⁹'Ba kanyøgønø, na ö Kwäärö ma Jecu na nø cääne ki bääge, ena kïth maal, ni pï bäät cwïï Jwøk.

²⁰Ni aacge ni køpge luumma nyään na met yïth mïëri bëët, ni Wuuö tïïö ka geni, ni nyootha gø ni luummögø ni wø køpge beeye adïëri ki køør ŋïïce mo wø cäädhi ki gø na aciel. Enøgønø.]