Read anuak Maak 2 Bible Online

Maak 2 - anuak bible

Maak 2

¹'Ba køøre na døø Jecu yi Kapernaam ki køør nïne møøk, awaac ni eni nutö poge.

²Ni ö jiyi mo thööth kaagø, ni tïme ni bäŋ kany rømge yie, këël dhi øtø wøk. Ni eni køpa luum Jwøk jïge.

³Kanyøgø jø møøk aö baŋe, ni ge käära dhaanhø mo obäp mo käära jiyi aŋweenni.

⁴'Ba na jootge gøøni ni ge ba maar thur buute kiper lwaak, wï øtø apätge ki kanya cuŋ Jecu yie. 'Ba na nø japge gø, pëëm mana en ŋata näk obäpi yie alwärge piny.

⁵'Ba na ö Jecu na neen ŋäädhe marge, ena köö jï ŋata näk obäp, «Wääda, raay moï awec.»

⁶'Ba kaace da dïpööye mo ciik Jwøk mo opï piny, ni cäänge ki cwïnyge,

⁷na «?Aŋø na cään nyeni na enø nø? Mare ajaany. ?Aŋa na doo wec raay? ?Aŋø, paa Jwøk keere?»

⁸'Ba na ŋäyi ya Jecu ki cwïnye ni ge cäänö ki cwïnyge, aput caan jïge, na «?Aŋø ni cäänu na enø nø ki cwïnynyu en?

⁹?A mane ni jööta eni na doo caanø jï ŋati no obäp en, ni ‹Raayï awec,› wala ki man caani, ni ‹Ö maal, ni lwørï pëëmï ni cäädhï.›?

¹⁰'Ba kiper nee ŋäyu nø, ni Wär Dhaanhø[2] jïre da teek bäät piny ki man wec raay,» ena köö jï ŋata näk obäp, na «A cäänna ïïni,

¹¹ö maal ni lwørï pëëmï, ni ciï paac.»

¹²Ni put ŋatøgø ö maal ni lwør pëëm ni aa wøk nyïmge bëët. Kanyøgø nø, yïthge arëëm bëët, ni jiemge Jwøk, ni köge, ni «Bäŋ gïn mo ewa kwøŋ neen mo nëëna gïn.»

¹³'Ba Jecu acäŋ aa wøk bäät Puul Galili. Ni ö lwaaki bäre ni cooŋge rege buute, ni pwöny geni.

¹⁴'Ba na pööth nyïm, Libay wär Alpia ajoode no opï piny kar ajwäk. Ni kööe jïgø, «Ö køøra.» Ni put Libay ö maal, ni läp køør gø.

¹⁵'Ba na ö Jecu na pï piny kar cam yi øt Libay, jiy mo thööth ma jø ajwäk ki jø raay gena pï piny ki eni ki bääge na aciel. Kiper jiy thööth moa läp køøre.

¹⁶'Ba dïpööye mo ciik Jwøk moa näk jø Paricith na neenge eni, ni eni cämö ka jø raay ki jø ajwäk, gena köö jï bääge, na «?Aŋø ni wø cäme ni mädhe na aciel ki jø ajwäk ki jø raay en?»

¹⁷'Ba na wïnynyi ya Jecu ena köö jïge, ni «Jø wø dëëtge jööt ba many akïïm, 'ba beege jø wø tuu. A ba ööi naa cwøla jøøa beyø, 'ba a öönynya jø raay.»

¹⁸'Ba kanyøgøøni bääk Jøøn ki jø Paricith gena lämö ki lam-wödö. 'Ba jiy aöö ni köge jï Jecu, na «?Aŋø ni wø wöt bääk Jøønni ki bääk jø Paricith en, ni bäägï ba wödö?»

¹⁹Ni kö Jecu jïge, na «?Aŋø, wëët nywöm wø wödö ni cø nyakøø poot ena dïge? Ge ba doo maara wödö kany wø poode ni cø nyakøø poot ena dïge.

²⁰'Ba nïne oööi, kanyo ö cø nyakøøe noo lwøri dïge. 'Ba cäŋöca nø, beeye cäŋo wötge yie.

²¹«Bäŋ dhaanhø mo doo rap thääŋ abïï mo nyään dëër abïï mo otøp. Ni näk mo tïïe tïïö, räbi mana nyään ree jëëe wøk dëër abïïna näk otøp, ni tïme na jeeø mana raac døc.

²²Ni bäŋ ŋat mo doo kïtha køøŋ nyïïomøki mo nyään yïth opïc pëëne mo otøp. 'Ba ni näk mo tïïe tïïö, køøŋ nyïïomøki opïyögø cööte cöötö, ni øc køøŋe piny ni ränynye, ko opïyögø na aciel. 'Ba køøŋ nyïïomøki mo nyään wø rømi ko opïc pëëne mo nyärö.»

²³'Ba dïcäŋ aciel ma cäŋ jwömö, Jecu aay ni cäädhi ka dï pwöth beel. 'Ba kanya cääthge, bääge atägö ki man tøcge wïth beel.

²⁴Ni kö jø Paricithi jïgø, «?Neenï, aŋø ni ö bäägï ni tïïcge gïn mo ba doo tïïö ki cäŋ jwömö en?»

²⁵'Ba ena köö jïge, na «?Aŋø, gïna tïïc Deebiti, käru kwaanø bäre bäre, kanya cänne na 'nägi ya käci, ki jøøa cäädhö ki eni?

²⁶Ena døny Øt Jwøk kanya bëët Abiethaar na Kwääy Lam Mana Dwøŋ, na cam muuga näk nyuuthe, na näk ba doo beer jï dhaanhø jaak ki man cam gø, 'ba beege dïlämme keerge ni wø cam gø, ni ö eni ni mooc jøøa cäädhö ki eni thuwø.»

²⁷Ni kööe jïge, ni «Cäŋ jwömö tïïc kaper dhaanhø, ni paa dhaanhø na tïïc kiper cäŋ jwömö.

²⁸'Ba Wär Dhaanhø beeye Kwäärö, ni këël cäŋ jwömö bëënna eni.»