Read anuak Maak 3 Bible Online

Maak 3 - anuak bible

Maak 3

¹'Ba dïcäŋ aciel Jecu acäŋ ci yi øt acooŋ lam. 'Ba da dhaanhø kaace mo cere obäp.

²Ni ö jiyi ni neetge gø, nee jootge ki man näk mo eni ŋatøgø kønye kønyø ki cäŋ jwömö, nee jïtge ki luubö mo kïthge bääte.

³Ni ö Jecu ni kööe jï ŋata näk cere obäp, ni «Ö nyïm kany.»

⁴Ni kööe jïge, na «?Agïnaŋø no orømø ki køør ciik Jwøk ki man tïïi ki cäŋ jwömö, beeye ki man tïïc gïn mo beer wala gïn mo raac? ?Beeye ki man piem jwïëy wala 'näk?» 'Ba gena lïŋö.

⁵Ni neen nyeŋge bëët ni eno gootø, ni cwïnye oränynyö kiper teek cwïnyge, ni kööe jï ŋatøca, «Rwiec cerï.» Ni rwiec cere, ni put cere døø kare.

⁶'Ba jø Paricith aaa wøk ni putge tudö ki luubö ki jic Eerat na aciel kipere ki jöö man 'näkge gø ki gø.

⁷'Ba Jecu adaa bäät Puul Galili ki bääge. Ni ö lwaa Galili mo päl ni läpge køøre. 'Ba jø møøk, kanya wïnyge japa tïïe bëët, gena ö baŋe ki yi Judia,

⁸ki Jerucalem, ki Idumia, ki løø Naam Jördan, ki Tayar ki Caydan ni tïmge na lwaak mo päl døc.

⁹Ni kööm bääge nee jääy jiiŋge jïre kiper lwaak na tïme ni päl, kiper nee eni ba decge.

¹⁰Kiper jiy mo thööth ee nø køny, ni tïm jøøa dëëtge da ŋwiili ni rïïya bääte, nee gutge.

¹¹'Ba kany wø ö jøøa näk dëëtge da juuga reyø wø jootge Jecu, ge wø pätha nyïme, ni ge rëëdö, ni «Bee ïïni na o Jwøk.»

¹²Ni kööm ge døc, nee eni ba nyoothge.

¹³'Ba Jecu aci maal bäät kïdi, ni cwøl jøøa manynye baŋe. Ni ci jøøgø baŋe.

¹⁴Ni jier jiy apaar kurriiø, jøøa tïïe na nyïïatwieli, nee bëëtge ki eni na aciel, nee jääŋ wøk kuna køpge luum Jwøk,

¹⁵ni jïtge ki teek ki man riemge anäge wøk.

¹⁶Ni beeye Cayman ŋata caae ni Piter,

¹⁷ki Jeemeth o Dhebedi, ki coki ma Jøøn, ni beege jøøa caae ni Böönerjith, na näk tiere beeye wäät määc køth,

¹⁸ki Andaru, ki Pilip, ki Barthølömu, ki Mathiew, ki Tøma, ki Jeemeth wär Alpia, ki Thadia, ki Cayman ŋat Keena,

¹⁹ki Juudac Ickarïët, ŋata cïp eni ceŋ nyïïmän. Køøre Jecu aci yi øtø.

²⁰Ni ö lwaaki ni cäŋge rege cooŋŋø. Kiper manøgø nø, Jecu ki bääge këël cam atïmö ni ba maar lønyø jïge.

²¹'Ba na wïnynyi ya tuuŋge, gena ci wøk kuna makge gø, kiper gena köö, ni «Ena tïmö na bøøl.»

²²Ni ö dïpööye mo ciik Jwøk moa öö ki yi Jerucalem, ni köge, ni «Dëëre da jwøa cwøl ni Bieldhebap, ni beeye teek kwääy anäge ni wø riem anäge wøk ki gø.»

²³Ni ö Jecu ni cwöl ge baŋe, ni caan gø jïge ka ageele, ni «?Ceethan a dii riem Ceethanni wøk nidïï?

²⁴Ni näk paac dëëre ee pääŋŋö keere, paanøgø ba doo maara bëëdö.

²⁵'Ba ni näk jø dhi øtø rege ege pääŋŋö keerge, dhi ødøca ba doo maara cuŋŋö.

²⁶'Ba ni näk Ceethan otïmö ni thïïŋa ree ri dëëre keere, ni pääŋ ree, eni ba doo maara cuŋŋö, 'ba cuŋ mare beeye ränynyö.

²⁷Kiper bäŋ dhaanhø mo doo døny øt ŋat mo teek kuna twier jap gø, ni näk ŋata teek käre kwøŋ mak ni twöc gø. 'Ba køøre nø, eni cøø møn ni twier øt gø.

²⁸Adïëri møn, a caana gø jïïu, ni jammi bëët owec Jwøki jï jiy, këël raay moge ki kwör ajaany bëët mo wø jätge ki ge.

²⁹'Ba ŋat wäro jany Jwïëc Jwøk na en kur keere, mare ba doo maara wec na bäre bäre. 'Ba eno jäälö ka ajäl bääyö mo bäŋ cuŋŋe;»

³⁰kiper na köge, ni «Dëëre da jwøk mo raac.»

³¹'Ba kanyøgø mii Jecu ki nyïïmenni aöö, ni cuŋge wøk, ni jääkge baŋe, ni cwøli.

³²'Ba lwaak na näk opï piny buute, gena köö jïre, ni «Meru ki nyïïmeru ge ena wøk, ni ge pëënynya ïïni.»

³³Ni løk gø, na «?Aŋa na mera ki nyïïmera?»

³⁴'Ba na raŋ jï jøøa näk opï piny buute, ena köö, ni «Jøøi ii beege mera ni näkge nyïïmera.

³⁵Ni ŋat wäro tïïc mana many Jwøki beeye coka ni näk mera.»