Read anuak Maak 4 Bible Online

Maak 4 - anuak bible

Maak 4

¹'Ba dïcäŋ aciel Jecu acäŋ tägö ki pwöc bäät Puul Galili. Ni ö lwaaki mo päl ni cooŋge rege buute. Kiper manøgønø, ena eth yi jääy, ni pï piny yie yi naam. Ni ö lwaaki bäre ni en bäät ageela.

²Ni pwöny geni ki jammi mo thööth ki ri leere. 'Ba na pööe, ena köö jïge,

³«Neennu, da dïpïïdhi mo oaa wøk kuna pïïthe ni mare jør.

⁴'Ba na jude, nyeŋ köödhi møøk apäth thääŋ jöö, ni ö wenynyi ni öge ni camge ge bëët.

⁵Ni ö köödhi møøk ni päthge yi ŋöömö mo tiere da kïdi, kany mo bäŋ ŋöömö mo päl yie. Ni laarge tuu wøk, kiper mana tïme ni bäŋ ŋöömö mo päl.

⁶'Ba na rieny cäŋŋi, gena waaŋ ni talge, kiper mana tïmge ni bäŋ lweedi jïge.

⁷'Ba köödhi møøk apäth yïth koodhi. Ni ö koodhi ni døøŋge, ni bøøcge ge. Ni kärge jïtö ki nyeŋ.

⁸'Ba köödhi møøk apäth yi ŋöömö mo beer. Ni døøŋge ni meetge rege, ni känge ki nyeŋ. Ni møøk käla nyeŋ ma pïëradäk ni møøk käla pïërabïciel, ni kän møga ki dïpa.»

⁹Ni kööe, ni «Ŋat mo jïre da ïdhi mo wïnye ki ge, beerra man cek ïthe.»

¹⁰'Ba na dööŋ Jecu keere, jøøa en buute ki bääŋi moa näk apaar kurriiø, ena pëënyge kiper tiet leere.

¹¹Ni kööe jïge, «Beeye uuni na wëëk luumma näk tiere okwøŋ kan kiper buc Jwøk. 'Ba ki jï jøøa en wøk, jammi bëët caan kaamar leere,

¹²« ‹kiper nee neenge møn, 'ba tier gø ba jootge. Ni wïnyge gø møn, 'ba tier gø ba kwanyge. Kiper kanymør dëëtge dege løø ni wëën geni.› »

¹³Ni kööe jïge, na «?Aŋø, tier leer man käru kwanyø? ?Leere bëët tietge okwanynyu ge nidïï?

¹⁴Dïpïïdhi piitha luum Jwøk.

¹⁵'Ba bëët jø møøk caala köödhi moa päth thääŋ jöö, kanya piith luubö yie. 'Ba kany wø wïnyge luubö, Ceethan wø laara öö ni käl luubö wøk mana piith cwïnyge.

¹⁶Kaawat manøgø thuwø, bëët jø møøk caala köödhi moa jør yi ŋöömma näk tiere da kïdi, ni beege jø wø laar jïëy ki met ec kany wø wïnyge luum Jwøk.

¹⁷'Ba jïge bäŋ lweedi, ni bëëtge ki kany mo thiinh keere. 'Ba køøre kany wø ö gïï mo lethi ki caannø wø täkge kiper luummögø, ge wø laara døø cään.

¹⁸'Ba bëët jø møøk caala köödhi moa jør yïth koodhi. Ni beege jø wø wïny luubö,

¹⁹'ba jap piny ni wø lääŋŋi, ki mëëc kwär, ki many jammi møga wø cøøa yie, ni bøøcge luubö, ni ba jïtge ki nyeŋ.

²⁰'Ba köödhi moa jør yi ŋöömma beer beege jø wø wïny luum Jwøk, ni jïëcge gø, ni känge ki nyeŋ. Ni møøk käla pïëradäk, ni møøk käla pïërabïciel, ni kän møga ki dïpa.»

²¹Ni kö Jecu jïge, na «?Aŋø, lamba wø käli kaper nee kïth tier dak wala tier pëëm, ni patha bäät tharabëëta?

²²Kiper bäŋ gïn mo doo kanø ni ba cäŋ nyoothø. Ni bäŋ gïn mo okanø, ni ba cäŋ käl wøk yi tar.

²³'Ba nee da ŋat mo jïre da ïdhi mo wïnye ki ge, beerra man cek ïthe.»

²⁴Ni cäŋ köö jïge, ni «Cegu ïthu døøc ki gïn wïnynyu en. Rumi man wø cïpu, beeye rumi mano duu baŋu, ni moo cïp jïïu ocäŋ meetø.

²⁵Kiper ŋat wø jïre dagø, møøk ocäŋ cïpö jïre. Ni ŋat wø jïre bäŋgø, këël man wø en jïre, di lwørø.»

²⁶Ni kööe, ni «Buc Jwøk keda dhaanhø mo jøra köödhi piny,

²⁷ni buude jaak ki wärre ki cääŋŋe, ni ö köödhi ni täkge ki tuuö, ni døøŋge, ni tucge kuue.

²⁸'Ba piny jammi nywøla e keere. Dïkwøŋ piith na luum. Køøre ŋøøk ki wïc. Køøre wïc kännö ki nyeŋ beel ma karge.

²⁹'Ba kanyo ciek beelli, wää pwödhö caakïïn wø pute ka kwany, kiper na tïme na kac.»

³⁰Ni kööe, ni «?Buc Jwøk a døø gø päärö ki ŋø, wala a leer mane na døø lwørø kipere?

³¹Eni caala waŋ kunhnhö mo thiinh døc, ni thiinhnha eni dï köödhi bëët mo wø piith yïth ŋøøm.

³²'Ba kany wø piidhi, ni døøŋŋe, wø tïmö ni dwøŋŋa eni dï jenni bëët moa en ya ajïniina, ni jïte ki bäädi mo døøŋŋø døc, ni tïm wec maalli ni bëëdö tïmme.»

³³Ni caan luum buc Jwøk jïge ki yïth leere mo thööth ma yøøgønø, keda mana bëëtge ni løny jïge ki man wïnyge gø.

³⁴Ni bäŋ gïn mo ee caanø jïge ni ba caane na leer. 'Ba tiet jammi bëët apare jï bääge kur keerge.

³⁵'Ba dïcäŋöca kiree, kanya tïm pinynyi na abøøya, Jecu aköö jï bääge, «Beerra man aaø løøga.»

³⁶Ni wecge lwaak ni cige yi jääy ni putge cøø ki eni na icenø. 'Ba da jïëthe møøk ma acøø ki geni.

³⁷Ni ö atuunne ni put cöödö, ni tïm pï athage ni pänynya yi jääy, ni jääy oløny ni manynya man pääŋe.

³⁸'Ba eni ena thar jääy no obutö, no othäänhö ki thänhi. Ni ö bääge ni jiecge gø ni köge ki eni, «?Dïpööy, bäŋ gïn lääŋŋï ni näk mo ø thøw?»

³⁹Ni pääe ni jook jamø, ni cään naam, ni «Cuŋŋï, ni lïŋï!» Ni cuŋ jame, ni put pinynyi nibäc.

⁴⁰Ni kööe jï bääge, na «?Aŋø ni lwäyu en? ?Jïïu bäŋ ŋäädhe?»

⁴¹Ni ö geni ni lwäcge ki lwär mo dwøŋ, ni cäänge yïthakicge keerge, na «?A teeŋ dhaanhø mo nyïëdi en, ni këëlla jamø ki naam leŋa luumme?»