Read anuak Maak 6 Bible Online

Maak 6 - anuak bible

Maak 6

¹'Ba Jecu aay kaace ni ci paac mana näk poge. Ni ö bääge ni läpge køøre.

²'Ba na tïme na cäŋ jwömö ena tägö ki pwöc yi øt acooŋ lam. 'Ba jøøa thööth na wïny pwöc mare, yïthge athäŋŋö, ni köge, ni «?Nyeni gïï ni thööth ii, ee joodø kaa? ?A teeŋ leec wïc mo nyïëdi na wëëk eni? ?A teeŋ tïïe mo nyïëdi mo døøŋŋø na wii cere?

³?Aŋø, paa eni na dïjëëth opämi? ?Eni paa o Meeri, na näk cöök Jeemeth, ki Jöce, ki Juudac, ki Cayman? ?A nyïïmenni moa näk mään bäŋ wø bëëdö kany ki øøni?» Ni taakge gïr gø.

⁴'Ba Jecu aköö jïge, ni «Nyikuŋ Jwøk bäŋ wø bëëdö ni ba wøør, 'ba tiirra paac mana näk poge, ki dï tuuŋge, ki yi paare kiree noo ba wøøri yie.»

⁵'Ba eni ba maar tïïö ki tïïc mo dwøŋ kaace, 'ba beeye man cïp ceŋŋe bäät jiy mo nøk keerge mo tuu, ni jöön dëëtge.

⁶Ni rëëm yie kiper mana kärge jïëy. Ni caath dï mïëri ni pöö.

⁷Køøre Jecu nyïïatwieta näk apaar kurriiø acwöl baŋe, ni täge ki man jääŋ ge wøk na ariiø ariiø, ni mooc ge ki teek bäät juuga reyø.

⁸Ni kööm geni ni kär dee gïn käärge kiper wääth marge, 'ba tiirra athøre. Ni bäŋe keewa, ko opïri, ki gwel mo käärge ki yïth opïcge.

⁹'Ba ge doo käära wac kööde jaak, ni bäŋe ŋat rwömö ka abïïe ariiø.

¹⁰Ni kööe jïge, ni «Øtø mano wäro dønynyu yie, wäru putu bëëte kaaca, këël mano tïŋŋu.

¹¹'Ba ni näk da paac mou ba pänhnhe, ni kweerge ki man wïnyge maru, tør tietu wär teeŋŋu kanyo aayu nee tïme na nyuudhi dëëtge.»

¹²Kanyøgø gena aay, ni køpge gø, ni jiy cwïnyge dege løø.

¹³Ni riemge anäge wøk mo thööth, ni ö jiyi mo thööth moa tuu ni wïïr dëëtge ki maaw, ni jöön dëëtge.

¹⁴'Ba gïnögø awïny nyeya ma Eerat, kiper nyeŋ Jecu atïmö ni ŋäc. 'Ba jø møøk aköö, ni «Jøøn na näk dïlööy na nyuudhi atïŋ maal ki yi thøø. Ni beeye tiere gø ni tïme ni da teek bääte ki man tïïe ki gïï mo rëëma ec enø.»

¹⁵'Ba møøk aköö, ni «Beeye Ilaaja.» Ni kö møøki, ni «Ena nyikuŋ Jwøk mo caala nyïïkuk Jwøk moa cääŋŋe.»

¹⁶'Ba na wïnynyi ya Eerati, ena köö, ni «Jøøn na wïïe ŋula wøk atïŋ maal ki yi thøø.»

¹⁷Kiper Eerat beeye na jääk baŋ Jøøn ni mak gø, ni twöc gø ni kïth gø øt twöc ki køør Eerödia, cï owänni ma Pilip, na nywøm Eerati.

¹⁸Kiper Jøøn atïmö ni cäänö ki Eerat, ni kööe, ni «Ba doo beer jïrï ki man bëëdï ki cï owäru.»

¹⁹Ni ö Eerödia ni männe ki Jøøn, ni manynya man 'näk gø. 'Ba kär løny jïre.

²⁰Kiper Eerat lwäär ki Jøøn, ni ŋääe ni Jøøn a dhaanhø mo beer, ni ena dhaanh Jwøk mo ena kur keere, ni bëët Eerati ni gwøga gø. 'Ba kanya wara wïny luum Jøøn, wïïe wø wïïrö, 'ba yie wø poot met thuwø ki man wïny gø.

²¹'Ba dïcäŋ aciel jöö ree ajabe, kanya ö Eerati na cwøl jaae moe, ki kwääc jø leny moe, ki dïbwöthe mo Galili, baŋ cam cäŋa nywøli yie.

²²Kiper kanya ö nyi Eerödia yi øtø, na miele, yi Eerat adøøc mo met ki wëëte. Ni ö nyeya ni kööe jï nyakøønnøgø, ni «Wär a pëënynyï ki gïno miitï jaak. Mëëga ïïni.»

²³Ni kööŋe jïgø, ni «Gïno pëënynyï aani ki gø jaak, omëëga ïïni, këël ni näk mo ï manynya thääŋ buya.»

²⁴Ni ö nyaanøgø ni aa wøk, ni pëëny menni, na «?Agïnaŋø noo pëënynya?» Ni kö menni, ni «Pëëny wï Jøøn na näk dïlööy na nyuudhi.»

²⁵Ni put døny baŋ nyeya ni rwäänhnhö ni pëëny gø ni kööe, na «A manynya ïïni man mëëgï a wï Jøøn na näk dïlööy na nyuudhi kany ennø, ni ena ya athäänh.»

²⁶'Ba nyeya cwïnye apädhö døc. 'Ba kiper mana näk eno nø kööŋ nyïm wëëte, ena tïmö ni ba many man wiil luumme na caane jï nyakøønnøgø.

²⁷Ni ö nyeya ni put dïkuri jääŋŋö man wø en tïï 'näki cere, ni cïpe ki dwøl, ni «Wï Jøøn kälï.» Ni cøøe, ni ŋul wï Jøøn wøk øt twöc,

²⁸ni käl wï gø ki ya athäänh ni mëëgi nyakøønnøgø. Ni ö nyakøønnøgø ni mëëk gø menni.

²⁹'Ba gïnögø na wïnynyi ya bääk Jøønni gena öö ni kälge dëëre ni kïthge gø yi bwörö.

³⁰Ni ö nyïïatwieli ni duuge baŋ Jecu ni caange gïïa tïïcge ki pwöc bëët moa pööge ki gø jïgø.

³¹Ni kööe jïge, ni «Ööu wøk kur keeru kany mo bäŋ paac, ni jwömmu dëëtu ki mo thiinh.» Kiper jiy atïmö ni wïdö, ni tïm Jecu ki bääge ni bäŋ caa jïge këël ki man cämge.

³²Ni aacge ki jääy ni ge cøøa kany mo bäŋ paac, ge keerge.

³³'Ba kanyøgøøni gena neen jiyi mo thööth ni ge aay, ni ŋecge ge, ni reŋge ki wøk, ni ge käla yïth mïëri bëët, ni kwøŋge pïï kaace ni Jecu ki bääge poodi.

³⁴'Ba na ïnh Jecu wøk, lwaak mo päl ajoode, ni päth cwïnye ki gïrge, kiper na tïmge ni ge caala dïëk mo bäŋ dïkwääy jïge. Ni täge ki man pwöny geni ki luup mo thööth.

³⁵'Ba na tïm pinynyi na abøøya, bääge aö baŋe ni köge, ni «Man a paap, ni caa onø pöödhö.

³⁶Wëëk lwaak wääth, nee cige paac ki mïëyö thenh thenh ni en ŋää paac yøø, nee dëëtge ŋëëmge ki gïn camge.»

³⁷'Ba aløøe jïge, ni kööe, ni «Uuni, mooyu geni ki gïn camge.» Ni köge jïgø, «?Aŋø, ciwa ni ŋëëwa ki muunni ma kar gwel ma dïpe ariiø, nee mëëk geni nee camge?»

³⁸Ni kööe jïge, na «?A muunni adïï ni en jïïu? Cou ni neennu ge.» 'Ba na nø jootge gø, gena köö, ni «Nuta muunni abïïc ki rec ariiø.»

³⁹Kanyøgø jiy aköömme bëët, ni pïge piny na akääŋi yi luuma mar.

⁴⁰Køøre gena pï piny na akääŋi, na akääŋi møøk a dïpa, ni møøk a pïërabïïc.

⁴¹Ni lwør muuga näk abïïc ki reya näk ariiø, ni neen maal ni gwïëth ge, ni pøt muugögø ni mëëk ge bääŋi, nee cïïmge nyïm jøøgø. Ni pääŋ reya näk ariiø dïge bëët.

⁴²Ni cämge bëët ni jäŋge.

⁴³Ni ö bääŋi ni jïtge ki yïth gupe apaar kurriiø mo päŋ ki thäk muunni ki thäk rec moa kwanyge piny na dhäthö.

⁴⁴'Ba jøøa cam mugögø, kwään cwøw beege kume abïïc.

⁴⁵'Ba kanyøgøøni Jecu bääge aput köömmö nee ethge yi jääy nee kwøŋge ci nyïme løøga yi Betheeda, kanya poode ni wëëga lwaak keethø.

⁴⁶'Ba na nø daak ree buutge, ena aa bäät kïdi kuna läme.

⁴⁷'Ba na tïm pinynyi na wäär, jääy oløny ni ena dï naam, ni dööŋŋa eni keere bäät ageela.

⁴⁸Ni neen bääge ni geno ööl døc ki kïïö, kiper jamø atïmö ni kwönna bäätge. 'Ba kanya tïm kar øwi ni cään, Jecu aö baŋge, ni cäädhi ka bäät pïï. 'Ba eni manynya man pöödhe ki buutge.

⁴⁹'Ba na ö bääge na jootge eni ni cäädhi ka bäät pïï, ena caarge ni tïpö, ni rëëtge.

⁵⁰Kiper ena jootge bëët, ni bwøkge. 'Ba kanyøgø ena put luupö ki geni, ni kööe, ni «Magu cwïnynyu. Man a aani. Käru lwäyö.»

⁵¹Ni eth yi jääy buutge, ni ö jame ni cuŋŋe. Ni rëëm yïthge døc.

⁵²Kiper gïr muunni kär ci cwïnyge døøc. 'Ba cwïnyge wø poot teek.

⁵³'Ba na ö Jecu ki bääge na nø kathge løøga, gena mäk piny yi ŋööm jø Genedharet, ni cwöthge jääy piny dhi waath.

⁵⁴'Ba na öge wøk ki yi jääy, Jecu aput jiyi ŋec,

⁵⁵ni ŋwiecge dï paac bäre, ni täk jiyi ki man kälge jiy moa tuu no opïël yïth pëëne moge, kany wø wïnyge eni ni eni ena yie.

⁵⁶'Ba kany wø ci Jecu yie, nee ena yïth mïëri moa therø ki yïth päänye, wala dï paac, jiy moa tuu wø pïëlge kwör ŋïëw, ni kwaacge eni këël ki man gutge deŋ abïïne keere jaak. 'Ba jøøa gut gø bëët, dëëtge adøø karge.