Read anuak Maak 7 Bible Online

Maak 7 - anuak bible

Maak 7

¹'Ba kanyøgøøni jø Paricith ki dïpööye mo ciik Jwøk møøk moa öö ki yi Jerucalem, rege acooŋge buut Jecu.

²'Ba ajootge ni bääge møøk ge cämö ni ceŋge ba waany, ni tiere beeye ni kärge lwøø ki køør kööŋŋö.

³Kiper jø Paricith ki jø Juuth bëët bäŋ wø cämö ni näk mo ceŋge kärge lwøø ki køør kööŋŋö mar jøøa døøŋŋø.

⁴'Ba kany wø duuge ki kar ŋïïw, ge ba cämö ni näk ceŋge kärge lwøø ki køør kööŋŋö manøgø. 'Ba da kööŋŋe møøk mo thööth mo wø gwøkge gwøø, teeŋ ka peny athööthe, ki dääe, ka athääe.

⁵'Ba kanyøgø Jecu apëëny jø Paricithi ki dïpööye mo ciik Jwøk, ni köge, na «?Aŋø ni ö bäägï ni bëëtge ni kööŋŋö mar jøøa døøŋŋø ba gwøkge, ni ge cämö ka ceŋ mo ba waany en?»

⁶Ni köö Jecu jïge, na «Gïru acaan Aydheea na kare, u na jø atade, kaa mana gööri, «ni ‹Jøøi ii a wø wøørge ka lëëpge, 'ba cwïnyge karge bäär ki aani.

⁷Naa wø wøørge ka wödö mo oballe jaak, ni ge pöö ka pwöc jiy ni keda luum Jwøk.›

⁸Uuni, mana cem Jwøki aweyu, ni magu kööŋŋö mar jiy.»

⁹Ni kööe jïge, «Uuna jïtö ki jöö ma wøp man kwierru mana cem Jwøki ki gø, kiper nee kööŋŋö maru gwøgu.

¹⁰Kiper Modhe aköö, ni ‹Wøør wäru ki meru.› Ni ‹Ŋato cäänö ki gïn mo raac dëër wänni wala menni wär eni 'näk.›

¹¹'Ba u wø köö, ni løny jï dhaanhø ki man kööe jï wänni wala menni, ni ‹Køny mana diï joodø baŋa atïmö na Körban,› ni tiere beeye ni gïnöca onø tïmö na muuy jï Jwøk;

¹²ni manøgø, u mäna eni ni kär dee gïn tïïe jï wänni wala menni;

¹³nou raanynya luum Jwøk na enøgønø ki køør kööŋŋö maru ni wø wëëgu jiy. Nou bëëdö nou tïïya teeŋ gïïögønø mo thööth.»

¹⁴Køøre Jecu lwaak acäŋ cwøl baŋe, ni kööe jïge, ni «Wïnynyu pwöc mara, u bëët, ni kwanynyu tiere.

¹⁵Bäŋ gïn mo ööi ki wøk, mo dhaanhø dee maara raanynyø kiper mana døny yi dhaanhø, 'ba beege gïï wø ö wøk ki yi dhaanhø ni wø raany dhaanhø. [

¹⁶Nee da ŋat mo jïre da ïdhi mo wïnye ki ge, beerra man cek ïthe.»][3]

¹⁷'Ba Jecu, na nø wec jiy ni døny yi øtø, ena pëëny bääge ki tier leer manøgø.

¹⁸Ni kööe jïge, «?Aŋø, këël u thuwø, gïnögø tiere käru kwanyø? ?Käru joodø ni gïn wø ööi ki wøk ni wø døny yi dhaanhø, dhaanhø ba dee maara raanynyø?

¹⁹Kiper atïmö ni ba ci cwïnye, 'ba cøøa yie, ni pöötha wøk.» 'Ba na caan luummögø, eni caana gø, ni caammi bëët beyø.

²⁰Ni kööe, ni «Gïn wø ö wøk ki cwïny dhaanhø beeye wø raany dhaanhø.

²¹Ni beeye yi cwïny dhaanhø ni wø ö acaac raay ki yie, teeŋ ka käp, ki käw, ki 'näk, ki luk,

²²ki par jammi, ki rääö, ki cwøk, ki pär cwïny, ki keec, ki waac nyeŋ, ka atöör, ki bøøl.

²³Raayøgø bëët wø ööi ka yi cwïny, ni öge ni raanyge dhaanhø.»

²⁴Køøre Jecu atïŋŋö kaace ni ci yïth mïëc Tayar. Ni døny øtø mør, nee bäŋe ŋat mo ŋäc gø. 'Ba eni ba maar kan.

²⁵'Ba kanyøgøøni ena put dhaage mo dëër nyaare da jwøk mo raac wïnynyö, ni ö nyijøøgø ni päth tiet gø.

²⁶'Ba nyijøøgø beeye nyi jø Gïrïïk, mo nywølla Cayröpönicia. Ni ö nyijøøgø ni kwac Jecu kiper nee anägö riem wøk dëër nyaare.

²⁷'Ba Jecu aköö jïgø, ni «Wëëk obwöre cam dïkwøŋ, kiper paa gïn mo beer ki man käl møk obwöre ni leeŋi baŋ guu.»[4]

²⁸'Ba aløk nyijøøgø jïgø, «Beeye kare, Kwäärö. 'Ba këël guu wø poot cämö ki thäk caammi mo wø thenh thenh ni wø päth piny kar cam mar obwöre.»

²⁹Ni kö Jecu jïgø, ni «Kiper mana caanï enø, døø paac nø. Anägö anø ö wøk dëër nyaarï.»

³⁰Ni ö nyijøøgø ni aa paac, ni nwän nyilaal mare no obutö bäät pëëm, na anägö oaay dëëre.

³¹'Ba køør manøgøøni Jecu mïëc Tayar awiie, ni cøra yi Caydan, ni døø bäät Puul Galili, ni pïïe dï mïëc Dikapöla.

³²Ni ö jø møøki ni känge baŋe ki dhaanhø ma miiŋ mo leebe teek ki man cääne. Ni kwacge gø kiper nee ceŋŋe kïth bäät gø.

³³'Ba na nø käl gø wøk ki dï lwaak ni kïth gø kur keere, lweete akïth ïth gø, ni ŋuute ki laaw ni mul leep gø,

³⁴ni neen maal, ni jwïëe, ni kööe jïgø, ni «Epetha,» na näk tiere beeye, ni «Jap riï.»

³⁵Ni ö ïth ŋatøgø ni japge rege, ni pät leebe, ni cäänne ni dwøre wïnyö ni tiir.

³⁶Ni ö Jecu ni kööm geni, ni kär dee ŋat caange gïnögø jïgø. 'Ba kany wø kööm geni, ni kär caange, beeye man wø putge gø kaath ki caan.

³⁷Ni rëëm yïth jiyi døc, ni köge, ni «Eni jammi bëët atïïe na wøpe. Këël meŋŋe adøøc mo wïnyö, ni ö jøøa lëëpge teek ki man cäänge ni cäänge.»