Read anuak Maak 9 Bible Online

Maak 9 - anuak bible

Maak 9

¹Køøre Jecu aköö jïge, na «Adïëri møn a caana gø jïïu, ni da jø møøk mo cuŋŋö kany mo thøø ba jootge këël kanyo neenge buc Jwøk ni ööi ka teek.»

²'Ba na tïme na køør nïne abïciel, Jecu Piter ki Jeemeth ki Jøøn akäle, ni bwøth geni wï kïdi mo bäär, ge keerge, ni røøe nyïmge.

³Ni ö abïïe moe ni tïmge ni ŋwaŋŋi ni tar døc, ni bäŋ dïpïnyi bäät piny ma abïïge doo täyö ki tayøce.

⁴Ni ö Ilaaja ki Modhe ni nyoothge dëëtge jïge kaace, ni ge cäänö ki Jecu.

⁵Ni kö Piterri jï Jecu, ni «Dïpööy, beer døc kiree na enø kany. Beerra man tïïwa ka abïle adäk, aciel kiperï, na aciel kiper Modhe, ni maya kiper Ilaaja.»

⁶Kiper atïmö ni bäŋ gïn mo ŋääe mo caane, kiper na tïmge ni ge lwäär døc.

⁷Ni ö pöölö ni neejïïm bäätge. Ni ö dwølli ki yi pööllögø ni kööe, ni «Man beeye Wääda na mëëra ki gø. Wïnynyu luumme.»

⁸'Ba ki nyi kany mo thiinh na lwïthge, bäŋ dhaanhø mo ege joodø buutge këët, 'ba beeye Jecu keere.

⁹'Ba kanya duuge piny ki bäät kïdi, gena kööm Jecu ni kööe, ni «Gïna jootu en, kär dee ŋat caannu gø jïre, këël mano tïŋ Wär Dhaanhø maal ki yi thøø.»

¹⁰'Ba gïnögø akange cwïnyge keerge, ni pëënyge dëëtge, ni «?Tier tïŋ maal ki yi thøø agïnaŋø?»

¹¹Ni pëënyge eni, na «?Aŋø ni wø kö dïpööye mo ciik Jwøk ni Ilaaja doo kwøŋa öö turu?»

¹²Ni kööe jïge, ni «Ilaaja kwøŋa öö møn, ni dwøga jammi bëët kwörge. ?'Ba agïnaŋø na göör kiper Wär Dhaanhø thuwø? Beeye ni eni gïï mo leth mo thööth dee jwørø ni caanni.

¹³'Ba a cäänna uuni, ni Ilaaja anø öö, ni ö jiyi ni tïïcge gïïa met yïthge ki ge dëër gø, keda mana gööri kipere.»

¹⁴'Ba Jecu ki bääge na pïïcge buut bääŋi møga, lwaak mo päl ajootge buutge, ki dïpööye mo ciik Jwøk mo pïëmö ki geni.

¹⁵'Ba na ö lwaaki na jootge Jecu, yïthge aput thäŋŋö, ni reŋge baŋe ni määthge gø.

¹⁶Ni ö Jecu ni pëëny geni, no «?U pïëmu ŋø?»

¹⁷'Ba aløk dhaanhe acielli jïre dï lwaak, «Dïpööy, wääda akäla baŋï, kiper dëëre da jwøk mo raac mo otïïc gø ni ba cäänö.

¹⁸Ni kany wø mak eni, wø gøøe piny, ni ö bööyö wøk ki dhee, ni mööta lage, ni tale ni teek. 'Ba bäägï apëënynya nee riemge wøk, 'ba kär maar lønyø jïge.»

¹⁹Ni løgi ya Jecu jïge, ni «?U na beenhnhø mo bäŋ ŋäädhe jïïu en, a këël kany mo nyïëdi nø noo beeda ki uuni? ?Naa këël kany mo nyïëdi noo maa cwïnya ki uuni? Kälu eni baŋa.»

²⁰Ni kälge nyilaal baŋe. 'Ba na ö jwøøgø na joot Jecu, nyilaal aput meeyø, ni päth yïth ŋøøm, ni rweenynye jaak, ni bööyö onikum dhee.

²¹Ni ö wänni ni pëënynyi ya Jecu, na «?A kany mo nyïëdi na täk gïnni dëëre?» Ni kööe, ni «Käla thïnhö ki gø.

²²Ni eni wø leeŋe maac ki yïth pïï cooth, ni 'näga gø. 'Ba ni näk da gïn mo løny ki man tïïyï gø, cwïnyï pädhe nø ki canwa, ni kønyï wa.»

²³'Ba Jecu aköö jïgø, na «?Aŋø, köö ïïni, ni ‹Ni näk da gïn mo løny ki man tïïyï gø›? Jammi bëët wø lønynya jï ŋat wø jïëy ni ŋäädhe.»

²⁴Ni put wää nyilaalli köö, ni «Aana jïëy ni ŋäädha. 'Ba køny a ki ŋäädhe mara ni poot thiinh en.»

²⁵'Ba na ö Jecu na neen lwaak ni ge läänna kanya ciel, jwøa raac ajooe, ni kööe jïgø, «Ï na jwøa näk ba luubö na miiŋ, a köömma ïïni, ö wøk dëëre, ni ba cäŋï ci dëëre këët.»

²⁶'Ba na nø rëëde ni meec gøøni ni raac døc, ena ö wøk, ni ö nyilaalli ni tïme kede othøw. Kiper manøgønø, jiy mo thööth aköö, ni «Eno thøw.»

²⁷'Ba Jecu cer nyilaal amaae ni tïŋ gø maal, ni cuŋŋe.

²⁸'Ba na nø døny Jecu yi øtø, ena pëëny bääge kur keere, na «?Aŋø na ba lønye jïwa ki man riemwa anäŋŋögø wøk?»

²⁹Ni løk gø jïge, ni «Teeŋ gïnögø ba maar lønyø ki man riemi wøk ki gïn mør jaak, 'ba beeye lam keere.»

³⁰Køøre Jecu ki bääge gena tïŋŋö kaace ni ge cøra dï Galili. Ni eni ba many man ŋäyi ya ŋat mørri,

³¹kiper na bëëde ni eni pwönynya bääge, ni köö jïge, ni «Wär Dhaanhø ocïp ceŋ jiy, ni 'näkge gø. 'Ba no nø 'näkge gø, noo tïme na køør nïne adäk, eno ö maal.»

³²'Ba bääge, tier luumma caane kär ci cwïnyge, ni ge lwäär ki man pëënyge eni.

³³Køøre Jecu ki bääge gena ö yi Kapernaam. 'Ba kanya enge yi øtø, eni bääge apëënynye, na «?Agïnaŋø na pïëmu øtjöö kipere?»

³⁴'Ba gena lïŋö. Kiper kanya cääthge waŋjöö, gena pïëmö ge keerge, na aŋa ni kare dwøŋŋa eni.

³⁵Kanyøgø Jecu apï piny ni cwøl geni, ge na näk apaar kurriiø, ni kööe jïge, ni «Ŋato wäro many man tïme ni ena nyïm, wär dëëre dwøk cään, ni ena ŋat wø tïny jiy bëët.»

³⁶Ni lwöte ki nyilaal mo thiinh, ni cïp gø dïge. 'Ba na tïŋ gø ni maa gø kööre, ena köö jïge,

³⁷ni «Ŋat wäro pänh nyilaal mo caala man ki nyeŋŋa, eni pänhnha aani. Ni ŋat wäro pänh aani, ba pänh aani, 'ba pänhnha eni na jääŋ aani.»

³⁸'Ba Jøøn aköö jïre, «Dïpööy, waana jïtö ki ŋat mør mo rëëmma wøk ka anäge ki nyeŋŋï, ni mänwa gø, kiper mana ba en dïïø.»

³⁹'Ba Jecu aköö, ni «Kär mänu. Kiper bäŋ dhaanhø mo doo tïïö ki gïn mo dwøŋ ki nyeŋŋa, mo doo cäŋa öö ni laar nyeŋŋa waac ki gïn mo raac.

⁴⁰Kiper ŋat wø ba män ki øøni, ena kurø.

⁴¹'Ba adïëri møn, a caana gø jïïu, ni ŋato wäro mooc uuni ka athöönh pïï mo maathu kiper na nägu mo Krictø, mano mëëk eni ba doo kääŋö bäre bäre.

⁴²«'Ba ŋato wäro wëëk nyilaal aciel bääyö dëët moi ni therø ii no ojïëy ni ŋääthge aani en, doo beerra eni kiper ŋatøgø ki man twöö kïn guur mo dwøŋ døc ŋute, ni leeŋi yi naama dwøŋ.

⁴³'Ba ni näk cerï beeye wø wëëk ïïni bääyö, ŋul wøk. Kiper beerra eni jïrï ki man ciï yi kwøw na dïbat ciel, ki mana di ï leeŋ yi maac kar ajäla na näk maaa näk bäŋ cuŋŋe ki ceŋŋï riet.[6]

⁴⁴

⁴⁵'Ba nee tierï beeye wø wëëk ïïni bääyö, ŋul wøk. Kiper beerra eni jïrï ki man ciï yi kwøw na ŋwøl, ki mana di ï leeŋ yi maac kar ajäla ki tietï riet.

⁴⁶

⁴⁷'Ba nee waŋï beeye wø wëëk ïïni bääyö, göön wøk. Kiper beerra eni jïrï ki man ciï yi buc Jwøk ki waŋ aciel, ki mana di ï leeŋ yi maac kar ajäla ki nyeŋŋï riet,

⁴⁸ni beeye kany wø ba thøw twöŋi yie mo wø cam jiy, ni maac man wø waaŋ geni bëëdö ni ba 'näk.

⁴⁹Kiper jiy bëët otïmö ni law ki maac.[7]

⁵⁰Acäbö met. ?'Ba ni näk ma acäbö lawe obänhnhö, lawe ocäŋu gø dwøk kare nidïï? Bëëdu ni dëëtu da acäbö, ni mëërru ki røgu ni bëëdu ki bëët-mëër.»