Read anuak Luk 1 Bible Online

Luk 1 - anuak bible

Luk 1

¹Kawaane jiy mo thööth anø tägö ki man göörge gïïa tïïc Jwøki na nø thur karge dïwa,

²ni göörge ka køør luup moa wïnyge baŋ jøøa neen gïïögø ki nyeŋge na nut dïkwøŋ kanya täk gïïögø, na køpge gø.

³'Ba ï na nyigwaak[1] ma Thïëpöla, yaa caarø, ni doo beer jïra thuwø ki man gööda ki wëëlö jïrï ki køør mana bëëda naa neeta tiet gïïögø døøc ki kanya täkge yie, ni gööra ni yaa cïïmmö,

⁴nee adïëri mar gïïa pwöny ïïni ki ge nee ŋäyï.

⁵'Ba ki yïth nïr Eerat na bëëdö na nyeny Judia, kaaca da dïlämi mo nyeŋŋe cwøl ni Dhekaraya, na käl dhi øt Abaaja.[2] Eni jïre da dhaagø mo käla dëët jø dhi øt Aran, mo nyeŋŋe cwøl ni Ilidhabeth.

⁶'Ba gena jiy mo beyø nyïm Jwøk karge riet, ni ge caatha køør moa näk ocem Wuue ki ciik moe bëët, ni bäŋ gïn mo ege baaø rege.

⁷'Ba jïge bäŋ nyilaal, kiper Ilidhabeth bwøc, ni geno nø jalø karge riet.

⁸'Ba kanya tïm tïïci ni ena ceŋ dïlämme mo dhi øtø mana käl Dhekaraya yie, ni Dhekaraya tïïö na dïlämi nyïm Jwøk,

⁹døny Øt Jwøk Mana Dwøŋ mar Wuuö ki nyep gïï wø jïcge ŋwääi ni met, apäth cere, keda man wø tïïc dïlämme.

¹⁰'Ba lwaa dhaanhø bäre lämö wøk yi kar caanna nyep gïï wø jïcge ŋwääi ni met.

¹¹'Ba kanyøgøøni nyïïatwiel maal mar Wuuö dëëre anyoodhe jï Dhekaraya ni cuŋŋa bäät cwïïc kar gïn wø waaŋ gïï wø jïcge ŋwääi ni met bääte.

¹²'Ba na ö Dhekaraya na neen gø, ena bwøk ni jït cwïnye ki lwär.

¹³'Ba nyïïatwiel maal manøgø aköö jïgø, ni «Kärï lwäyö, Dhekaraya, kiper lam marï awïnynyi. 'Ba cïïï ma Ilidhabeth ojïti ki nyilaal ma cïïŋŋö.[3] 'Ba nyeŋŋe ocwølï ni Jøøn.

¹⁴'Ba yiï omïnni ni kanynyï, ni ö jiyi mo thööth ni mïn yïthge kanyo lwaarø ki gø.

¹⁵Kiper eno tïmö na ŋat mo dwøŋ nyïm Wuuö Jwøk, ni eni ba mädhö ki køøŋ nyïïomøki wala køøŋø mo keec. 'Ba eno bëëdö ni päŋ ki Jwïëc Jwøk na en kur keere, ki mano täge ni ena yi menni.

¹⁶'Ba eni wäät Icriel mo thööth oløø baŋ Wuuö Jwøk na näk Jwøk marge.

¹⁷'Ba eno cäädhi nyïm Wuuö Jwøk ki teeŋ bëët Ilaaja ki teek mare, ni løø cwïny wëëe baŋ obwöre moge, ni løø wïth jøøa wïthge teek baŋ acaac jøøa marge beyø, ni tïïc jiy na jiy mo ojiiŋŋø kiper Wuuö Jwøk.»

¹⁸'Ba Dhekaraya aköö jï nyïïatwiel maal manøgø, ni «?Gïnögø oŋääa gø nidïï? Kiper aana jaal, ni cïïa onø jalø thuwø.»

¹⁹'Ba aløk nyïïatwiel maalli jïre, ni «Aana Geebriel, ni wø cuŋŋi nyïm Jwøk; naa jääŋŋi kaper niï cäänna, naa køpa luummi ni met en jïrï.

²⁰'Ba neenï, ïïno bëëdö niï lïŋö, niï ba maar luupö, gøøc dïcäŋo thur gïïögø karge, kiper na kärï luupa jïëö, luupo thur karge dïcäŋo näk kare.»

²¹'Ba jiy abëëdö ni ge køya Dhekaraya, ni thäŋ yïthge kiper mana ruue Øt Jwøk Mana Dwøŋ.

²²'Ba na ö wøk, ena tïmö ni ba maar luubö ki geni, ni ŋecge gø ki man näk mo da gïn mo ee neenø baŋ Jwøk yi Øt Jwøk. Ni luube ki ge ki lweete ni put bëëtö ni ba cäänö.

²³'Ba kanya thum nïr tïïci mare, ena døø paare.

²⁴'Ba køør nïrögø, cïïe ma Ilidhabeth agämmö ki dhaanhø, ni ö eni ni kan dëëre ki dwäde abïïc, ni kööe,

²⁵ni «Wuuö Jwøk gïn atïïe dëëra na enønø, kanya nyooth met ec mare jïra, ni wëënna laac wïc mara dï jiy.»

²⁶'Ba na tïme na køør dwäde abïciel, nyïïatwiel maal ma Geebriel ajääŋ Jwøki yi pääny Galili na cwøl ni Nadhareth,

²⁷baŋ nyakøønna näk omiek dïcwøø mo cwøl na Jocep, na käl dhi øt Deebit. 'Ba nyeŋ nyakøønnøgø cwøl ni Meeri.

²⁸Ni ö Geebriel ni ö baŋ Meeri ni kööe, «Ïïna määth, ï na mëër Jwøki ki gø. Wuuö ena buutï.»

²⁹'Ba Meeri yie athäŋŋö døc kanya wïny luummögø, ni cääne ki cwïnye, ni man a teeŋ määdhe mo nyïëdi cøøn.

³⁰'Ba nyïïatwiel maal aköö jïgø, ni «Kärï lwäyö, Meeri, kiper ïïna jïtö ki mëër baŋ Jwøk.

³¹'Ba neenï, yiï ojïti ki dhaanhø ni lwaarï ki gø na cïïŋŋö, 'ba nyeŋŋe ocwølï ni Jecu.

³²'Ba kare otïmö ni dwøŋ, ni cwøli ni O Jwøa Dwøŋ ni en Maal. 'Ba eno wëëk Kwäärö ma Jwøk wäl kwari ma Deebit,

³³ni ö jø dhi øt Jeekap ni bëën eni na bäre bäre, ni bëët buye ni bäŋ cuŋŋe.»

³⁴'Ba Meeri aköö jï nyïïatwiel maal, ni «?Gïnögø otäge nidïï, kiper jïra bäŋ dïcwøø?»

³⁵Ni kö nyïïatwiel maalli jïgø, ni «Jwïëc Jwøk na en kur keere öö bäätï, ni ö teek Jwøa Dwøŋ ni en Maal ni rïëp ïïni. Kiper manøgønø, nyilaaro lwaarø ki gø, ocwøl ni ena kur keere na O Jwøk.

³⁶'Ba neenï, wadu ma Ilidhabeth na näk onø jalø ajïtö ki dhaanhø thuwø ma cïïŋŋö. 'Ba man beeye bïcier dwäde jïre, eni na wara cwøl ni bwøc.

³⁷Kiper bäŋ gïn mo dhäthi jï Jwøk.»

³⁸Ni kö Meeri, ni «Kare møn, a ena cer Wuuö Jwøk; beerra man täge dëëra kaawat mana caanï enø.» Ni ö nyïïatwiel maalli ni aae buut gø.

³⁹'Ba yïth nïrögø Meeri aö maal, ni aae ni rwäänhnhö, ni cøøa po kïte, pääny mo ena Judia.

⁴⁰Ni ci po Dhekaraya, ni määth Ilidhabeth.

⁴¹'Ba na ö Ilidhabethi na wïny määdhe mar Meeri, nyilaal apäär maal yi gø. Ni ö Ilidhabethi ni pääŋe ki Jwïëc Jwøk na en kur keere.

⁴²Ni put köö ki dwøl mo päl, ni «Bee ï na gwïëth dï mään, ni gwïëth ena dëër nyey ni en yiï enø.

⁴³?Aŋø, gïn owëëk aani nidïï, ki man ö mii Kwääya na dee ö baŋa?

⁴⁴Kiper ennø, kanya wïnynya määdhe marï kiree, nyilaal ni en yia en, aput päär maal ni yie omïnnö.

⁴⁵Ni meta yi nyaana jïëy, ni mana caan Wuuö jïre doo thura kare.»

⁴⁶Ni kö Meeri, ni «Aani, jwïëya jiema Wuuö,

⁴⁷ni ö cwïnya ni mïnne ki Jwøk na näk Pïëmi mara.

⁴⁸Kiper eni canna, a na laŋŋe, aneene. 'Ba kawaane, køør man en nø, beenhnhe bëët aano cwølge ni beeye aani na gwïëth.

⁴⁹Kiper eni na teek, gïï mo døøŋŋø atïïe jïra, 'ba eni, nyeŋŋe ena kur keere.

⁵⁰Ni ö mëërri mare ni wø ba jøøl ni bëëde bäät jø wø lwäär ki eni, ni ö ki ri beenhnhi nø, ni pööth ri beenhnhø maya.

⁵¹Eni bade bäär ni teege ee nyoodhø, ni keeth jø wø töödö ki yïth cwïnyge.

⁵²Eni jøøa kwörge døøŋŋø wø dwøge piny ki bäät wäle moge, ni røøny jøøa can.

⁵³Ni ö eni ni cïp gïï mo beyø jï jøøa näk obup, ni cöör jøøa näk okwär wøk ki ceŋge jaak.

⁵⁴'Ba eni jiye ma jø Icriel akønye, ni eni nyootha mëër mare,

⁵⁵kaawat mana caan gø jï kwäyø, ni beeye Eeberam ki nyïïkwaaye, këël bäre bäre.»

⁵⁶Ni ö Meeri ni bëëde ki Ilidhabeth ki kany mo jïtö ki dwäde adäk, ni døø paare.

⁵⁷'Ba kanyøgø kar lwaar apïï dëër Ilidhabeth, ni lwaare ki nyilaal ma cïïŋŋö.

⁵⁸Ni ö jøøa en buute ya atut ki tuuŋge ni wïnyge gø ni ena nyuunh Wuue ki køny mo dwøŋ døc, ni mïn yïthge ki eni na aciel.

⁵⁹'Ba na tïme na bäc nïne, gena ö kuna daŋge nyilaal. Ni ge manynya man cakge nyeŋ gø ni Dhekaraya kaamar wänni.

⁶⁰'Ba mii nyilaal aköö, ni «Patha eni. Eno cwøl ni Jøøn.»

⁶¹'Ba gena köö jïgø, ni «Bäŋ dhaanhø aciel dëët tuuŋu mo ocwølø ki nyeŋŋøgø.»

⁶²Ni cäänge ki wää gø ki lweetge, ni ge pëënynya eni, ki man näk mo nyeŋ nyilaal ocak gø na ŋa.

⁶³Ni ö eni ni pëëny gïn wø gööt bääte, ni göör gø, ni «Nyeŋŋe Jøøn.» Ni rëëm yïthge bëët.

⁶⁴'Ba kanyøgø dhee ree aput jap, ni pät leebe, ni cäänne ni pwøya Jwøk.

⁶⁵Ni ö jøøa en buute bëët ya atut ni jït cwïnyge ki lwär. Ni ö tiet mïëc Judia bëët moa en bäät kïte ni tïmge ni ge caana gïr gïïögø.

⁶⁶'Ba jøøa wïny gïïögø bëët akange cwïnyge, ni köge, ni «?Nyilaarøgø otïme na ŋø?» Kiper mana bëët cer Wuue bääte.

⁶⁷Ni ö wänni ma Dhekaraya ni päŋe ki Jwïëc Jwøk na en kur keere, ni caan luumma nyooth Jwøki jïre, ni kööe,

⁶⁸ni «Pwøc en jï Kwäärö Jwøk, Jwø Icriel, kiper ena lïïmmö ni wïïl jiye wøk,

⁶⁹ni thïïŋŋe ko oteeø na dïpïëmi kiperø, yi po dhaanhnhe ma Deebit,

⁷⁰keda mana caan gø dhøk nyïïkuk moe na en kur keerge ya acääŋŋe cøøn,

⁷¹ni ø doo piemø ceŋ nyïïmännø, ki ceŋ jøøa män ki øøni bëët,

⁷²nee mëër mare nyoodhe jï kwäyø, ni lääŋŋa luumme na en kur keere na tuude ki geni,

⁷³ni beeye kööŋ mana kööŋe ki gø jï kwarø ma Eeberam,

⁷⁴nee ø pieme ceŋ nyïïmännø, nee lønyø jïïø ki man tïnynyø eni ni bäŋ lwär,

⁷⁵nøø bëëdö ni ø ena kur keerø, ni marø beer nyïme ki yïth nïne 'moø bëët.

⁷⁶'Ba ï na nyilaal, ïïno cwøl ni ïïna nyikuŋ Jwøa Dwøŋ ni en Maal, kiper ïïno cäädhi nyïm Wuuö niï jiiŋŋa uutjïëthe moe,

⁷⁷niï nyutha jiye pïëm man piem geni ki gø, kiper mano wec raay moge,

⁷⁸ki køør met yi Jwøk marø na jwør can marø, ni ö bäätø ki maal kaawat man wø cööt øwi,

⁷⁹nee tar cïbe jï jø wø bëëdö yi muudhö, ni bëëdö dhi thøø, ni bwøth øøni ki waŋjöör bëët-mëër.»

⁸⁰Ni ö nyilaalli ni piidhe ni tïme ni cwïnye da cer; ni eni bëëdö paap këël dïcäŋa nyooth ree jï jø Icriel.