Read anuak Luk 13 Bible Online

Luk 13 - anuak bible

Luk 13

¹'Ba kanyøgø thuwø da jak møøk mo öö ni parge gïr jø Galili jï Jecu, ni beeye gïr jøøa 'näk Paylati ni kuur remge ki rem olämme moge.

²'Ba adwøge jïge, ni «?You caarø ni kadha rääc jø Galili moøgø ki jø Galili møga bëët, kiper gïna leth na pïï dëëtge na enøgønø?

³Jïre bäär. 'Ba a cäänna uuni, ni näk mo cwïnynyu ba løgu, u ränynyö bëët na enøgønø.

⁴?Wala gïr jøøa näk apaar ka abära, na päth øt pööki bäätge yi Caylööm ni 'näk geni, aŋø, you caarø ni kadha bääyö marge ki jøw møga bëët moa bëëdö yi Jerucalem?

⁵Jïre bäär. 'Ba a cäänna uuni, ni näk mo cwïnynyu ba løgu, u ränynyö bëët na enøgønø.»

⁶Kanyøgø Jecu luummi ni keda leer en aput caan, ni kööe, ni «Da nyen mør mo opïïdhö ko olaam yi pwöth jenni mare. Ni ööe ni caya nyey ri gø, 'ba bäŋgø mo ee joodø.

⁷Ni kööm ŋata en pwödhe cere, ni ‹Neenï, cwiiyi na adäk ii, a bëëdö naa cäädhö naa manynya nyey ro olaami en, 'ba bäŋgø mo jooda. Ŋøt piny. ?Aŋø na nyääk piny jaak en?›

⁸'Ba aløøe jïgø, ni ‹Kwäärö, wëëk bëëtö cwiini keere, nee tiere koonya ni kïtha gø ki wär.

⁹'Ba noo näk mo nywøl ki nyïëdi cwiino ööi, doo beer. 'Ba ni näk mo ba nywøl, oŋødï piny.› »

¹⁰'Ba dïcäŋ aciel ma dïcäŋ jwömö, Jecu apöö yi øt acooŋ lam mør.

¹¹'Ba kaace da dhaagø mør mo dëëre da jwøk mo raac, mo tuu ki cwiiri apaar ka abära, ni tïm kööre no okööm, ni ba maar lønyø jïre ki man rwiec dëëre.

¹²'Ba na jooti ya Jecu, acwøle, ni kööe jïgø, ni «Nyijøøe, ïïna wec täwï.»

¹³Ni kïth ceŋŋe bäät gø, ni put dëëre rwiec ni thïïŋ, ni pwøc Jwøk.

¹⁴'Ba ŋata näk kwääy øt acooŋ lam manøgø, ena gootø kiper mana ö Jecu na køny dhaanhø ki cäŋ jwömö, ni kööm jiy, ni «Da nïne abïciel mo tïïe doo tïïö yïthge, mou doo öö nou køny, ni patha cäŋ jwömö.»

¹⁵'Ba adwøk Kwäärö jïgø, ni «?U na jø atade, aŋø, da dhaanhø dïïu mo dhere wala arëëne bäŋ wø gøønye ki cäŋ jwömö ni køøl gø baŋ maath pïï?

¹⁶?A nyijøøi en na nyikwaar Eeberam no otwöy Ceethanni ki cwiiri apaar ka abära bëët yøø, a ba dii pädö nidïï ki cäŋ jwömö?»

¹⁷'Ba kanya caan gïnögø, nyïïmänne bëët wïthge alääö. Ni ö lwaae ni mïn yïthge ki gïïa beyø na tïïe bëët.

¹⁸Køøre Jecu aköö, ni «?Buc Jwøk caal ŋø? ?Na agïnaŋø na daa gø päärö ki gø?

¹⁹Eni caala waŋ kunhnhö mo thiinh døc, na käl dhaanhe ni piith gø yi pwöthe, ni døøŋŋe ni tïme na jaath, ni gëët wenynyi bääte ki uudi.»

²⁰Køøre Jecu acäŋ köö, ni «?Buc Jwøk opäära gø ki ŋø?

²¹Eni caala thømmø mo olwør dhaage ni kïth gø yi møø ma yïth rumme adäk këël mana wäny møø manøgø bäre.»

²²Ni ö Jecu ni tïŋ wääthe ni cøøa yi Jerucalem, ni caatha dï mïëri moa døøŋŋø ki moa therø, ni pöö.

²³'Ba nyen mør aköö jïgø, ni «?Kwäärö, beege jiy mo nøk keerge noo piem?» Ni kööe jïge,

²⁴ni «Magu rou døc ki man dønyu ki dhi kiir mana diiny. 'Ba a cäänna uuni, ni jiy mo thööth omany man dønyge yie, 'ba otïmö ni ba løny jïge.

²⁵Kanyo ö wää øte no ö maal, ni dëët øtø, uuno cuŋŋi wøk nou døøŋŋa dhi øtø, nou köö, ni ‹Kwäärö, japï jïwa.› 'Ba oduue jïïu, ni ‹Uuni, kanya ööu ki yie kuua.›

²⁶'Ba kanyøgøøni uuno köö, ni ‹Waana cämö ni mäthwa ki ïïni, ni pwönynyï waani dï powa.›

²⁷'Ba eno köö, na ‹A cäänna uuni, ni kanya ööu ki yie kuua. Daagu rou buuta, u bëët, u jø wø tïïc gïï mo reyø.›

²⁸'Ba kanyøce, nou jootu Eeberam ki Aydhak ki Jeekap ki nyïïkuk Jwøk bëët ni ge ena buc Jwøk, ni uuni ki dëëtu, uuno cöör wøk, uuno jwöŋi ni möötu lagu.

²⁹'Ba jiy oööi ki jï løø kur tuul-cäŋ, ki jï løø kur pänh-cäŋ, ki wï-piny, ki tier-piny, ni pïge piny kar cam yi buc Jwøk.

³⁰'Ba ka adïëri møn, jø møøk mo ena nyïm ennø, odøø cään, ni ö møøki mo ena cään ennø, ni pööthge maal.»

³¹'Ba ki nyi kanyøgø kiree, jak møøk ma jø Paricith aöö baŋ Jecu, ni köge jïgø, ni «Laar riï daak kany, kiper Eerat manynya man 'näk ïïni.»

³²Ni kööe jïge, ni «Cou ni caannu gø jï anyaayøce, ni ‹Neenï, a rëëmma wøk ka anäge, naa kunyö ki ŋwiili dïcäŋi ki diøø, 'ba noo tïme na dää nïne, tïïc mara othööra.›

³³'Ba a aay ki wäätha dïcäŋi, ki diøø, ka aruunnø man. Kiper nyikuŋ Jwøk ba doo nääö kanymør jaak, ni patha yi Jerucalem.

³⁴«Wui, Jerucalem, Jerucalem, ï wø nääŋ nyïïkuk Jwøk ni këërï jø wø jääŋŋi baŋï ki kïte. ?A kwöre adïï naa manynya man cooŋa nyïïï kanya ciel, kaawat man wø tïïc gwienø wø cooŋ nyïïe tiet bwöpe, nou kweeyø?

³⁵'Ba neennu, pou adööŋ jïïu no oränynyö. 'Ba a cäänna uuni, naa ba jootu këël mano kööu, ni ‹Gwïëth en jï ŋat ööi en ki nyeŋ Wuuö Jwøk.› »