Read anuak Luk 17 Bible Online

Luk 17 - anuak bible

Luk 17

¹Kanyøgø Jecu aköö jï bääge, ni «Gïï wø wëëk dhaanhø bääyö öö, ni ba kääŋi. 'Ba otïmö ni raac jï ŋat wø öge ki baŋe.

²Doo beerra eni kiper ŋatøgø ki man twöö kïn guur ŋute, ni leeŋi yi naama dwøŋ, ki man wëëk aciel dëët moi ni therø ii bääyö.

³Gwøgu rou. Ni näk coku obääyö, joogï; 'ba ni näk mo wïïe caare caarø, wär wëënnï.

⁴'Ba ni näk eni bääyö dëërï kwöre abïriiø ki dïcäŋ aciel ni cäŋ duu baŋï kwöre abïriiø ni kööe, ni ‹Wïïa acaara,› wär wëënnï.»

⁵'Ba kanyøgø nyïïatwieli aköö jï Kwäärö, ni «Meet ŋäädhe marwa.»

⁶'Ba Kwäärö aköö, no «Doo na jïïu da ŋäädhe mo caala nyi waŋ kunhnhö mo thiinh døc, doo maar lønyø jïïu ki man köömmu jaadhi en, ni ‹Puth riï wøk kany, ni piidhï riï yi naama dwøŋ,› ni dee luummu leŋø.

⁷«?Da dhaanhø dïïu mo jïre da laŋŋø mo purö wala kwaaya dïëk mo doo köö jïgø kanyo ööe ki yi pwödhö, ni ‹Put pöönhnhö nø, ni pïï piny kar cam›?

⁸?Bäŋ doo köö jïgø, ni ‹Jiiŋ cam mara ni kïthï abïïk tïïc dëërï ni tïnynyï aani këël mano cäma ni mädha; køøre nø, ïïno cämö ni mädhï.›?

⁹?Eni laŋŋøgø dee pwøø kiper mana tïïc gïna caan jïre?

¹⁰'Ba uuni thuwø, kany wø nø tïïyu gïï wø caan jïïu bëët, wäro wø kööu, ni ‹Waana laaŋe mo bäŋ gïrwa, 'ba wa tïïya tïïa näk owii ceŋwa cøøn.› »

¹¹'Ba Jecu na aae ni cøøa Jerucalem, ena cør yïthakic Cameria ki Galili.

¹²'Ba na pïïe paac mør, jiy apaar mo dëëtge da dhøøbø[13] arøømmø ki eni, ni cuŋge kany mo bäär,

¹³ni tïŋge döötge maal, ni köge, ni «Kwäärö, Jecu, køny canwa.»

¹⁴'Ba na neen geni, ena köö jïge, ni «Cou ni nyoothu dëëtu jï dïlämme.» 'Ba kanya aacge, dëëtge adøø karge ni beyø.

¹⁵Kanyøgø dhaanhø aciel dïge na joot gø ni dëëre odøø kare, aduuö, ni eni pwøya Jwøk ki dwøl mo päl.

¹⁶Ni päth tiet Jecu, ni pwøc gø. 'Ba nyenøgø, ena nyï Cameria.

¹⁷'Ba kanyøgønø, Jecu aköö, na «?Aŋø, patha jiy apaar na bëëde na dëëtge køny? ?Age abïŋween?

¹⁸?Aperŋø ni bäŋe dhaanhø aciel mo oduuö ni pwøc Jwøk, ni tïme ni duua ŋati keere na jur en?»

¹⁹Ni kööe jïgø, ni «Ö maal ni ciï ki jöörï. Ŋäädhe marï dëërï adwøk kare.»

²⁰'Ba kanya ö jø Paricithi na pëënyge Jecu ki kany ö buc Jwøki yie, adwøge jïge, ni «Buc Jwøk ba ööi ki ŋïïce mo di neenø.

²¹Ni jiy ba doo köö, ni ‹Neennu, beeye eni en,› wala ‹Eni ice.› Kiper buc Jwøk ena dïïu.»

²²Ni kööe jï bääge, ni «Cääŋŋe oööi, kanyo manynyu Wär Dhaanhø nee jootu ki dïcäŋ aciel keere, 'ba eni ba jootu.

²³'Ba geno köö jïïu, ni ‹Neennu, eni ena kanyøce,› wala ‹Neennu, eni ena kany.› Kär nou cøø ni reŋŋu køørge.

²⁴Kiper cäŋ Wär Dhaanhø otïmö kaamar agaackøth ni wø nigaaŋ ni meeny maal ki løøk aciel ni këët løøk maya.

²⁵'Ba eni gïï mo thööth mo leth okwøŋ jwør ni kwieri jø pinyi en.

²⁶'Ba nïr Wär Dhaanhø otïmö kaamar nïr Nöa na bëëde.

²⁷Kiper jøøka na bëëtge, ge cämö, ni ge mädhö, ni ge nyöömö, ni wëëkge nyïïge nywøm, këël dïcäŋa ö Nöa na døny yi jääy, ni ö jwïëe ni dïïr wïthge bëët.

²⁸Kaawat manøgø thuwø, yïth nïr Løøt, jiy abëëdö ni ge cämö ni ge mädhö, ni ge ŋëëö ni dwökge pwöth, ni ge pïïdhö ki caammi, ni gëëtge ki uudi.

²⁹'Ba dïcäŋa døny Løøti wøk ki yi Cødam, maac mo lïëth døc apänhnhö ki maal ni dïïr wïthge bëët.

³⁰'Ba otïmö kaawat manøgø dïcäŋo nyooth Wär Dhaanhø yie.

³¹'Ba dïcäŋöca, ŋato en wï øtø, ni jape ena yi øtø, kär nee døøa piny kuna lwør ge. Ni ŋato en yi pwödhö thuwø, kär nee døøa paac.

³²Caarru wïthu ki gïr cï Løøt.

³³'Ba ŋato wäro gwøk jwïëye, onyääe; 'ba ŋato wäro nyääk jwïëye, ogwøe.

³⁴'Ba a cäänna uuni, ni wäänöca kiree, cwøw ariiø oen bäät pëëm aciel. Aciel okäl, ni wec maya.

³⁵Ni da mään ariiø mo öödö na aciel. Aciel okäl, ni wec maya. [

³⁶Ni cwøw ariiø oen yi pwödhö. Aciel okäl, ni wec maya.»][14]

³⁷'Ba gena köö jïgø, «?A kaa, Kwäärö?» Ni kööe jïge, ni «Kany wø näk da dëël mo othøw yie, cøre wø kuuta yie.»