Read anuak Luk 18 Bible Online

Luk 18 - anuak bible

Luk 18

¹'Ba kanyøgø, Jecu bääge acäänne ki luubö mo keda leer ni nyootha gø jïge ni ge doo lämö cooth, ni cwïnyge ba jøøm.

²Ni kööe, ni «Da pääny mør mo yie da kwääy løøk, ŋat mo ba lwäär ki Jwøk, mo bäŋ luum dhaanhø mør mo ŋääe.

³'Ba paanøca da cï thøø mo cäädhö baŋe cooth, ni cäänö ki gø, ni ‹Ŋøl nyimänna wøk.›

⁴«'Ba ena kwøŋ kweeyø. Na näk køøre cään, dëëre acäänne keere, ni kööe, ni ‹Këël na ba lwäära ki Jwøk, ni bäŋ luum dhaanhø mør mo ŋääa,

⁵cï thøønhnhi keere, ŋunna ŋunnö kiper na ööl aani. Kanymør a jøøm ki wääthe cooth.› »

⁶Kanyøgønø, Kwäärö aköö, na «?Aŋø, gïna caan kwääy løøki mana raac, käru wïnynyö?

⁷?A Jwøk nø, jiye na jiere ba ŋunne, jø wø jwöŋi ïthe ki wärre ki cääŋŋe? ?Dëëre gaale gaalø ki gïrge?

⁸A cäänna uuni, ge laare ka ŋunnö. ?'Ba, kanyo ö Wär Dhaanhe, da ŋäädhe mo joode joodø bäät piny?»

⁹Ni ö Jecu ni cäŋ luummi caannø thuwø ni keda leer jï jø møøk, jøøa näk dëëtge ege jiemø keerge ni beyø geni, ni jøøŋge jø møga.

¹⁰Ni kööe, ni «Da jiy ariiø mo oaa Øt Jwøk Mana Dwøŋ kuna lämge. Dhaanhø aciel a ŋat Paricith, 'ba maya, ŋat ajwäk.

¹¹Kanyøgø ŋat Paricith acuŋŋö ni läm dëëre keere na enøgø, ni kööe, ni ‹Jwøk, ïïna pwøa kiper na ba caala jø møga bëët, na näk dïmute, ki jøøa reyø, ki jø lugi, naa ba caal ŋat ajwäk manøgø.

¹²Kiper a wø wödö ki kwöre ariiø ki yi jwøk, naa cïpö ki paac wïth jammi na jëëthe røk gïï wø jooda bëët.›

¹³«'Ba ŋat ajwäk na cuŋŋö kany mo bäär, këël wïïe käre tïŋ maal, 'ba kööre apwöde ni kööe, ni ‹Jwøk, køny aani na ŋat raay en.›

¹⁴«A cäänna uuni, ni ŋatøgø aaa paare no ojïëö ni mare beer, ni kwier maya. Kiper jiy bëët mo wø døøc dëëtge mo døøŋŋø, odwøk piny. 'Ba ŋat wø døøc dëëre mo can, otïïc ni dwøŋ.»

¹⁵Kanyøgø jiy atïmö ni känna baŋ Jecu ko obwöre, nee ge mule. 'Ba na jooti ya bääŋi, gena jookge.

¹⁶'Ba gena cwøl Jecu baŋe, ni kööe, ni «Weyu obwöre nee öge baŋa, ni ba mänu ge. Kiper teeŋ obwöre moøgø nø, buc Jwøk a marge.

¹⁷Adïëri møn, a caana gø jïïu, ni ŋato wäro ba jïëc buc Jwøk kaamar nyilaal, ba doo dønynya yi gø.»

¹⁸Kanyøgø Jecu apëëny kwäärö mørri, ni kööe, ni «?Dïpööy mana beer, agïnaŋø noo tïïa, kiper nee kwøw mana näk adïëri mo bäŋ cuŋŋe jooda?»

¹⁹'Ba adwøk Jecu jïgø, na «?Aŋø ni cwølï aani naa beer en? Bäŋ ŋat mo beer, 'ba beeye Jwøk keere.

²⁰Gïïa cem Jwøki ŋäyï, ni ‹Kärï kännö ki luk. Kärï nägö ki dhaanhø. Kärï kwätö. Kärï cäänö ki tööt. Wøør wäru ki meru.› »

²¹Ni kööe, ni «Gïïögø bëët yaa gwøø, këël ki mana käla thïnhö.»

²²'Ba Jecu na wïny gïnögø, aköö jïgø, ni «Gïrpiny aciel poot kärï tïïö. Dwøk gïïo en jïrï bëët pwödhö, ni pääŋŋï gwetge jï jøøa can, ni ööï ni cäädhï køøra. 'Ba ïïno jïti ki jap kwär maal.»

²³'Ba na wïny gïnögø, cwïnye apädhö, kiper eno kwär døc na bëëde.

²⁴'Ba jïre aneen Jecu, ni kööe, ni «Døny buc Jwøk teee ki teek mo nyïëdi jï jøø no okwär yøø.

²⁵Ka adïëri møn, doo jööta eni jï athïrööl ki man dønye ki waŋ lïlmu ki man ö ŋat mo okwärri ni døny buc Jwøk.»

²⁶'Ba jøøa wïny gïnögø aköö, na «?Aŋa nø, noo maar piem?»

²⁷Ni kö Jecu, ni «Gïn wø ba løny jï jiy, løny ki jï Jwøk.»

²⁸'Ba Piter aköö, ni «Neenï, waani mïëcwa awiiwa piny, ni caathwa køørï.»

²⁹Ni kö Jecu jïge, na «Adïëri møn, a caana gø jïïu, ni bäŋ dhaanhø mo paac ee wiiø, wala dhaagø, wala nyïïmenni, wala jøøa nywøl gø, wala obwöre kiper nyeŋ buc Jwøk,

³⁰mo ba jïti ki gïï mo thööth yi pinyi en, ki kwøw mana näk adïëri mo bäŋ cuŋŋe yi piny mano ööi.»

³¹Ni ö Jecu ni käl bääge na näk apaar kurriiø, ni kööe jïge, ni «Neennu, kawaane ø cøøa yi Jerucalem, 'ba jammi bëët moa göör nyïïkuk Jwøki kiper Wär Dhaanhø othur karge.

³²Kiper eno cïp ceŋ juurre, ni buui, ni tïïge dëër gø ki gïn mo raac døc, ni ŋuutge bäät gø ki laaw,

³³ni pwötge gø, ni 'näkge gø. 'Ba noo tïme na ri dää nïne, eno ö maal.»

³⁴'Ba røk luupögø, bäŋ gïrpiny aciel mo oci cwïnyge, kiper luummögøøni tiere atïmö no okanø ki geni, ni kucge tier gïna caane.

³⁵'Ba na tïm Jecu ni kare cään ki Jerikö, da ŋat ma cwør mo opï piny thääŋ jöö ni kwääö.

³⁶Kanyøgø na wïny tiet lwaak ni cäädhö ki buute, ena pëëö, ni «?Man agïnaŋø?»

³⁷Ni caange gø jïgø, ni «Jecu nyï Nadhareth beeye ni pöödhi en.»

³⁸Ni rëëde døc, ni «Jecu Nyikwaar Deebit, køny canna!»

³⁹'Ba ena jook jøøa en nyïm, ni ge caana gø jïre, nee lïŋe. 'Ba beeye mana rëëde døc nø, ni «Nyikwaar Deebit, køny canna!»

⁴⁰Ni cuŋ Jecu, ni cïpe ki dwøl, ni käli jïre. 'Ba na ö buute ena pëënynye, ni kööe,

⁴¹na «?Agïnaŋø ni manynyï nee tïïa jïrï?» Ni dwøk gø, ni «Kwäärö, wëëk nyeŋŋa døø karge.»

⁴²Ni kö Jecu jïgø, ni «Nyeŋŋï døøge karge. Ŋäädhe marï dëërï adwøk kare.»

⁴³Ni put nyeŋŋe døø karge, ni läp køør Jecu, ni jiema Jwøk. 'Ba na ö jiyi bëët na neenge gïnögø, Jwøk apwøcge.