Read anuak Luk 19 Bible Online

Luk 19 - anuak bible

Luk 19

¹'Ba na pïïc Jecu Jerikö, ena cør dï gø.

²'Ba kanyøce da nyen mør mo nyeŋŋe Dhekiya, ma kwääy ajwäk, mo okwär.

³Ni eni manynya man joot Jecu man bëëde nidïï. 'Ba kär maar lønyø jïre kiper lwaak, kiper ena dhaanhø mo ciek.

⁴Kanyøgø ena reŋ nyïm, ni eth bäät jaath nee neene, kiper Jecu cøra jööröce.

⁵'Ba Jecu na pïïe kanyøce, alwïthö maal, ni kööe jïgø, ni «Dhekiya, laar ö piny, kiper a pïïa paarï dïcäŋi.»

⁶Kanyøgø ena laar ö piny, ni pänh gø ki met ec.

⁷'Ba na jooti ya jiyi, gena ŋurö bëët, ni «Ena cøøa nee tïme na wëël dhaanhø ma ŋat raay.»

⁸Køøre Dhekiya aö maal ni cuŋŋe, ni kööe jï Kwäärö, ni «Kwäärö, neenï, thäŋ jammi 'moa mëëga jøøa can. Ni näk da ŋat mo yaa mødø ki gïrpiny, dwøga dwøgø jïre na aŋween.»

⁹Ni kö Jecu jïgø, ni «Dïcäŋi paani apiem, kiper ŋati en beeye nyikwaar Eeberam thuwø.

¹⁰Kiper Wär Dhaanhø öönynya kuna many jøøa näk orwäänyö nee pieme.»

¹¹'Ba kanya pootge ni ge wïnynya gïïögøøni, Jecu luubö mør aput caan ni keda leer, kiper na tïme ni kare cään ki Jerucalem, no onø caar jiyi ni buc Jwøk puta nëënne.

¹²Kanyøgø ena köö, ni «Da nyen mør mo käla dhi øtø mo beer, mo oci paac mør mo kare bäär kuna røønyi na nyeya nee duue.

¹³Ni cwøl laage apaar, ni mooc ge ki gwel apaar ni caan gø jïge, ni ‹Gädhu ki gwetøgø këël mano ööa.›

¹⁴«'Ba jø poge män ki gø, ni jääkge køøre ki dhaanhø, ni köge, ni ‹Wa ba many nyenøgø nee tïme na nyeya powa.›

¹⁵«'Ba kanya duue no orøønyø na nyeya, ena cïpö ki dwøl nee laaŋe moa mooe ki gwel nee cwøl jïre, kiper nee buua moa jootge ri gath ŋääe.

¹⁶«Ni ö mana dïkwøŋŋi nyïme, ni kööe, ni ‹Kwäärö, gwellï na näk aciel, aduunnö ki gwel apaar møøk.›

¹⁷«Ni kööe jïgø, ni ‹Wøp døc, ï na laŋŋø mo beer. Kiper mana tïmï niï maar ka ŋääth ri gïna thiinh, mïëri apaar owëëk ïïni ni tïmge ni ena cerï.›

¹⁸«Ni ö rietge ni kööe, ni ‹Kwäärö, gwellï na näk aciel, aduunnö ka abïïc.›

¹⁹«Ni kööe jïgø, ni ‹Ïïni, mïërï abïïc oen cerï.›

²⁰«Køøre maya aöö, ni kööe, ni ‹Kwäärö, gwellï en, na kana ni yaa bääö ka abïï.

²¹Kiper aana lwäyö ki ïïni kiper ïïna dhaanhø mo dwørï teek, niï wø kwanya gïrpiny mo kärï kwøŋ cïp piny, niï wø kaya gïn mo kärï kwøŋ piith.›

²²«Ni kööe jïgø, ni ‹Ïïno jääla ki køør mana ö wøk ki dhiï, ï na laŋŋø mo raac en. ?Aŋø, ŋäyï cøøn ni aana dhaanhø mo dwøre teek, naa wø kwanya gïn mo kära kwøŋ cïp piny, naa wø kaya gïn mo kära kwøŋ piith?

²³?Aŋø nø, na ba kïthï gwella kany wø mac jammi yie, kiper kanya daa öö yie, gwella daa lwørø ni da wïïe?›

²⁴«Ni kööm jøøa cuŋŋö buute, ni ‹Lwørru gwelløgø cere, ni mëëgu gø ŋata jïre da gwel apaar.›

²⁵«'Ba gena köö jïgø, ‹Kwäärö, ŋatøgø oløny ni jïre da gwel apaar.›

²⁶«Ni kööe, na ‹A cäänna uuni, ni jiy bëët mo wø jïge dagø, møøk ocäŋ cïpö jïge. 'Ba ŋat wø jïre bäŋgø, këël man wø en jïre di lwørø.

²⁷'Ba mar jøø na nyïïmänna yøø, jøøa näk ba many aani naa tïma na nyeya poge, kälu kany, ni 'nägu ge nyïma.› »

²⁸'Ba Jecu na nø caan gïnögø, apööth nyïm, ni aa Jerucalem.

²⁹'Ba na tïm kare ni cään ki Bethpec ki Bethani buut kïnna cwøl ni Kïn Ølip, bääŋi ariiø ajääŋŋe,

³⁰ni kööe, ni «Cou paanø ni en nyïmmu enø. 'Ba kanyo dønynyu yie ennø, uuno jïti ki nya arëën mo otwöö piny, mo poot bäŋ dhaanhø mo oeth bääte. Wär pätu ni kälu gø kany.

³¹'Ba ni näk da ŋat mo pëënynya uuni, na ‹?Aŋø ni pätu gø en?› wäru kööu, ni ‹Kwäärö manynya gø.› »

³²Kanyøgø jøøa jääŋŋi aay ni jootge gø keda mana caan gø jïge.

³³'Ba kanya pätge nya arëën, wëëk gø aköö jïge, na «?Aŋø ni pätu nya arëën en?»

³⁴Ni dwøkge gø, ni «Kwäärö manynya gø.»

³⁵Ni kälge nya arëën baŋ Jecu, ni kïthge abïïkge bäät gø, ni iithge Jecu bäät gø.

³⁶'Ba kanya cäädhe ki bäät gø, jiy abïïkge apeethge waŋjöö.

³⁷'Ba na tïme ni kare cään ki kany wø løøc piny ki bäät Kïn Ølip, lwaa bääŋa päl enøgø, gena tägö ki man pwøcge Jwøk ki dwøl mo päl ni yïthge met kiper tïïe moa døøŋŋø bëët na jootge.

³⁸Ni köge, ni «Gwïëth en ri nyenynyi ni ööi en ki nyeŋ Wuuö Jwøk! Bëët-mëër en maal, ni ö ajiemmi ni en maalø bäre!»

³⁹'Ba jø Paricith møøk mo ena dï lwaaøgø gena köö jï Jecu, ni «Dïpööy, jook bäägï.»

⁴⁰Ni dwøk gø jïge, na «A cäänna uuni, ni näk mo jøøi ii lïŋö, këël kïte moi ii ki dëëtge doo rëëdö.»

⁴¹'Ba kanya ö Jecu na tïm kare ni cään na neen pääny, ena jwöŋö ki gïr gø,

⁴²ni kööe, ni «Beer kee jap wø käl bëët-mëër ŋäyu dïcäŋi en nø. 'Ba kawaane, geno mänö ki nyeŋŋu.

⁴³Kiper nïne oööi kanyo ö nyïïmännu noo diilge uuni yi kiir, ni bäŋ kany mo thiinh mo dønynyu wøk ki gø,

⁴⁴ni gøcge u ki piny, ni beeye uuni ki nyïïu. Ni bäŋ kïdi aciel mo dege wii bäät kïdi mør pou, kiper mana käru lïïmmö mar Jwøk ŋiiø mana lïïmme baŋu.»

⁴⁵Køøre Jecu adøny yi kal mar Øt Jwøk Mana Dwøŋ ni täge ki man riem jø wø gädhö ki jammi wøk.

⁴⁶Ni cääne ki ge, ni kööe, no «Ogöörö, ni ‹Øda doo bëëdö na øt lam.› 'Ba atïïyu na kar dïmute.»

⁴⁷Kanyøgø nø, ena tïmö ni pöö cooth Øt Jwøk Mana Dwøŋ. 'Ba kwääc laam, ki dïpööye mo ciik Jwøk, ki jøøa døøŋŋø wïth jiy, gena määnyö ki jöö man 'näkge eni ki gø.

⁴⁸'Ba bäŋ gïn mo ege joodø mo maarge tïïc, kiper na tïm jiyi bëët ni leŋa luupe.