Read anuak Luk 20 Bible Online

Luk 20 - anuak bible

Luk 20

¹'Ba dïcäŋ aciel ni Jecu pöö ki jiy yi Øt Jwøk Mana Dwøŋ ni køpa luumma nyään na met, kwääc laam, ki dïpööye mo ciik Jwøk ki jaae gena öö,

²ni köge jïgø, ni «Caanï jïwa, ?a teega ŋø ni wø tïïyï gïïögøøni ki gø? ?Na aŋa na wëëk teegøgø ïïni?»

³'Ba aløøe jïge, no «U pëënynya pëënynyö ki pïëc aciel thuwø. Wär løgu jïra.

⁴?Lwøk mar Jøøn na nyuudhi, käla maal na bëëde, wala käla baŋ jiy?»

⁵'Ba luummögø aløøŋge dïge keerge, ni ge caana gø, ni «Noo caanø gø, ‹Ni käla maal,› eni köö, ‹?Na aŋø na ba jïëyu ni ŋääthu eni?›

⁶'Ba noo caanø gø, ni ‹Käla baŋ jiy,› jiy bëët ø këërge këërö ki kïte, kiper geno jïëy ni Jøøn a nyikuŋ Jwøk na bëëde.»

⁷Kanyøgø nø, adwøkge ni kanya käl yie kucge.

⁸Ni kö Jecu jïge, «'Ba aani thuwø, teek man wø tïïa gïïögø ki gø, ba caana jïïu.»

⁹Kanyøgø luummi ni keda leer en acaane jï jiy, ni kööe, ni «Da dhaanhø mør mo opïïdhö ki pwöth omøki, ni cïp pwöthögø ceŋ jø puur, ni aa paac mør ni ruue.

¹⁰'Ba na päŋ dwäde mo kac, eni laŋŋe ajääŋ baŋ jø puur moøgø, nee eni moocge ki nyïïjer pwöthögø. 'Ba ena pwöt jø puur moøgø, ni wëëkge gø døø ki ceŋŋe jaak.

¹¹Ni cäŋ jäägö ki laŋŋø mør. Ni cäŋge gø pwötö, ni tïïge dëëre ki gïn mo raac døc, ni wëëkge gø døø ki ceŋŋe jaak.

¹²Ni cäŋ dääge jääŋŋö. 'Ba manøgø dëër gø amoocge ki ŋwiili, ni leeŋge gø wøk ŋää pwödhö.

¹³«Kanyøgø nø, wää pwödhe aköö, na ‹?Agïnaŋø noo tïïa? Wääda na mëëra ki gø jääŋŋa jääŋŋö. Kanymør owøørge.›

¹⁴«'Ba na jooti ya jø puurri moøgø, gena cäänö yïthakicge keerge, ni ‹Man beeye lwiidhø. Beerra man nääø gø, nee olaawi tïmge na moø.›

¹⁵Ni leeŋge gø wøk ŋää pwödhö, ni 'näkge gø. ?'Ba agïnaŋø nø noo tïïc wää pwöthögø ki geni?

¹⁶Eni öö ni 'näk jø puur moøgø ni cïp pwöthögø ceŋ jø møøk.» 'Ba na wïnyge gïnögø, gena köö, «Wui, gïnögø kär tägö!»

¹⁷Ni raŋ jïge, ni kööe, na «?A luummi no ogöörö na ennø en, tiere agïnaŋø? «ni ‹Kïdi mana kwier dïgëëte, atïmö na kïn gøøt mana pere letha eni na mak øtø.›

¹⁸'Ba jiy moo päth bäät kïnnögø otøyi ni tïmge na thäŋi. 'Ba noo näk mo pätha bäät dhaanhø, ŋatøca oŋiidhe.»

¹⁹'Ba yi caannøca kiree, dïpööye mo ciik Jwøk ki kwääc laam, ge manynya man makge Jecu, kiper aŋäcge ki cwïnyge ni luumma caane ni keda leer, geela geni. 'Ba gena lwäyö ki jiy.

²⁰Kanyøgø nø, ena neetge døc, ni jääkge ki jiy ni cøøkge rege ni keda gena jiy mo marge adïëri, nee jïtge ki luubö mo makge gø ki gø ri gïïo care, nee kïthge nyïm kwääc paac, ŋat wø ŋøl luup, na en teeki cere.

²¹Ni pëënyge eni, ni «Dïpööy, ŋäcwa niï cäänö niï pöö ka adïëri, ni jiy raŋï ka waŋ aciel, 'ba ï pöö ka jöör Jwøk na adïëri.

²²?Beeye gïn mo beer jïwa ki man cïpwa ka ajwäk jï Cidhar,[15] wala ba beer?»

²³'Ba cwøk marge ŋääe, ni kööe jïge, «Nyuunhnhu aani ki gwelø. ?Man a kïdö mar ŋa, ni nyeŋŋe oput göör tiere en?»

²⁴Ni dwøkge gø, ni «Beeye Cidhar.»

²⁵Ni kööe jïge, ni «Dwøgu japa näk jap Cidhar baŋ Cidhar, ni dwøgu japa näk jap Jwøk baŋ Jwøk.»

²⁶Ni tïme ni ba maar lønyø jïge ki man makge gø nyïm jiy ri gïna caane. 'Ba yïthge athäŋŋö ki luumma dwøge, ni putge lïŋö.

²⁷'Ba jø Cajucith ni wø köö ni bäŋ duun wøk ki yi thøø, møøk aö baŋ Jecu,

²⁸ni pëënyge eni ki pïëc, ni köge, ni «Dïpööy, Modhe waana göönne ki ciik, ni ni näk mo dhaanhø coki othøw, ni jïre da dhaagø, 'ba jïre bäŋ nyilaal, ŋatøgø cïmädhi dee lwørø, ni dee wï coki nywølø.

²⁹'Ba da jak ma nyïïmëëe abïriiø. 'Ba mana dwøŋ anyöömmö ki dhaagø, ni thøøe ni bäŋ nyilaal mo ee nywølø.

³⁰Ni ö dhaaŋŋøgø ni dööŋe ki nyena käl køøre,

³¹ni pïïe ri dääge, këël mana thumge ki thøø karge bïriedi bëët, ni bäŋ jiy mo ege nywølø.

³²Køøre dhaaŋŋøgø athøw thuwø.

³³?'Ba kanyo duu jiyi wøk ki yi thøø nø, eno tïme na cï ŋa nø? Kiper ena bëëdö ki jagøgø karge bïriet, na dhaagø jï ŋati man nø.»

³⁴'Ba Jecu aköö jïge, ni «Jø pinyi en, ge nyöömö, ni wëëkge nyïïge nywøm.

³⁵'Ba jiy moo jïëc ni rømø ki ciin yi piny mano ööi ki duun wøk ki yi thøø, røkge ba nywømge, ni bäŋ nyïïge mo wëëk nywøm.

³⁶Ni ge ba maar thøø këët, kiper ge röömi ka nyïïatwiet maal, ni gena nyïï Jwøk, na nyïï duun wøk ki yi thøø.

³⁷'Ba këël Modhe nyootha gø ni jiy duua wøk ki yi thøø, yïth luupa caan ki ya abuŋŋö, kanya cwøl Wuuö Jwøk ni Jwø Eeberam, ni näk Jwø Aydhak, ni näk Jwø Jeekap.

³⁸Kiper eni paa Jwø jøøa näk othøw, 'ba ena Jwø jøøa kwøw. Kiper jiy bëët kwömma eni.»

³⁹'Ba aløk dïpööye mo ciik Jwøk møøk jï Jecu, ni «Dïpööy, acaanï na kare.»

⁴⁰Kiper gena tïmö ni cwïnyge ba maarge mak këët ki man pëënyge gø ki pïëc.

⁴¹'Ba Jecu aköö jïge, ni «?Jiy a dege köö nidïï, ni Krictø beeye O Deebit?

⁴²Kiper Deebit ki dëëre ee caanø yi Wëël Dut Pwøc, «ni ‹Wuuö Jwøk aköö jï Kwääya, ni «Pï bäät cwïïa,

⁴³këël mano tïïa nyïïmän moï na køøm tietï.» ›

⁴⁴?'Ba ni näk eno nø cwøl Deebiti ni Kwäärö na enønø, a dee cäŋ tïmö na wääde nidïï?»

⁴⁵Ni cään bääge, ni wïny jiyi bëët wïnynyö,

⁴⁶ni «Gwøgu røgu ki dïpööye mo ciik Jwøk, jø wø yïthge met ki käär abïïe mo beyø, ni yïthge met ki määth yïth kwör gath, ni wø many kwör bëëte moa beyø geni yïth uut acook lam, ki kwör ajieme kwör caammi,

⁴⁷jø wø dar uut määr thuunhnhi, ni wø lämö ki lam mo yie bäär ni ge nyootha rege. 'Ba geno jïti ka ajäla mo dwøŋŋa eni.»