Read anuak Luk 4 Bible Online

Luk 4 - anuak bible

Luk 4

¹'Ba Jecu aduuö ki yi Naam Jördan ni päŋ ki Jwïëc Jwøk na en kur keere, ni bwødhi ya Jwïëc Jwøki paap.

²Ni bëëde paap ki nïne ma pïëraŋween, ni pääny anägö päänynyö, ni bäŋ gïn mo ee camø yïth nïrögø. 'Ba na thum nïrögø, ena näk käci.

³Ni kö anägö jïgø, ni «Nee ïïna O Jwøk, kööm kïdi man nee tïme na møø.»

⁴Ni løgi ya Jecu jïgø, no «Ogöörö, ni ‹Dhaanhø ba doo kwøw ka cam keere.› »

⁵Ni kïthi ya anägö maal bäät kïdi ni nyuth gø buc piny bëët ki nyi kany mo thiinh,

⁶ni kööe jïgø, «Teek mar japøgø bëët ka ajiemge daa wëëga ïïni. Kiper omëëk aani, ni daa mëëga ŋato manynya jaak.

⁷Kiper manøgønø, ni näk maa wøørï wøørø nø, doo tïmö na moï.»

⁸Ni løgi ya Jecu jïgø, no «Ogöörö, «ni ‹Ï doo wøøra Wuuö Jwøk na näk Jwøï, ni beeye eni keere na diï tïnynyö.› »

⁹Ni ö anägö ni bwøth Jecu yi Jerucalem, ni wëëk gø cuŋŋö wï ocul Øt Jwøk Mana Dwøŋ, ni kööe jïgø, ni «Nee ïïna O Jwøk, leeŋ riï piny ki kany.

¹⁰Kiper ogöörö, «ni ‹Eni nyïïatwiet maal moe oköömme kiperï, niï koorge.

¹¹Ïïno jølge maal ki ceŋge, kiper nee tierï ba cwaanyï ri kïdi.› »

¹²Ni løgi ya Jecu jïgø, no «Ogöörö, ni ‹Kär Wuuö Jwøk na näk Jwøï päänynyï.› »

¹³'Ba kanya løny anägö ki car kwör päänynyö moøgø bëët, ena aay ni wec Jecu, këël mana dee cäŋ jïtö ki jöö.

¹⁴Køøre Jecu aduu yi Galili, ni eni teek ki ri Jwïëc Jwøk, ni ö gïre ni wïnye yïth mïëya en kaace bëët.

¹⁵Ni pööe yïth uut acook lam moge, ni bëëdö ni eno jiem jiyi bëët.

¹⁶Ni ö Jecu ni døø yi Nadhareth, kanya piidhi yie, ni ci øt acooŋ lam ki cäŋ jwömö keda man wø bëëde. Ni ö maal nee kwääne.

¹⁷Ni mëëk wëël Aydheea na näk nyikuŋ Jwøk eni; ni jap wëëlö, ni joot kanya näk ogöörö, na köö,

¹⁸ni «Jwïëc Wuuö Jwøk ena bääta, kiper aana jiere nee luumma nyään na met caana jï jøøa can. Ni jääŋ aani nee pät mar jøøa näk otwöö køba jïge, ki døøn nyeŋ karge jï cööye, ni päda jøøa näk odïïmö,

¹⁹ni køba cwiino ö Wuuö Jwøki noo nyooth met ec mare yie.»

²⁰Ni cïëk wëëlö, ni dwøk gø jï ŋata en weeli cere, ni pï piny. Ni ö nyeŋ jøøa en yi øt acooŋ lam bëët ni këëtge ree.

²¹Ni täge ki man caan gø jïge, ni «Dïcäŋi en wëëlli athur kare keda mana wïnynyu gø.»

²²Ni ö jiyi bëët ni pwøcge gø, ni yïthge orëëm ki luup moa met na ö wøk ki dhee. 'Ba gena köö, na «?Aŋø, ŋati paa o Jocep?»

²³Ni kööe jïge, «Ba kääŋi jïïu ki man parru leeyi jïra, na køp, ni ‹Ï na akïïm, køny riï. Gïïa wïnywa na tïïyï Kapernaam, tïïyï dï pou kany thuwø.› »

²⁴Ni kööe, na «Adïëri møn, a caana gø jïïu, ni bäŋ nyikuŋ Jwøk mo ojïëö dï poge.

²⁵'Ba ka adïëri møn, a caana gø jïïu, ni ya acääŋŋe yïth nïr Ilaaja da määr thuunhnhi mo thööth yi Icriel, kanya ö maalli na män køth ki cwiiri adäk ki dwäde abïciel, na jït paaci bäre ki meel mo dwøŋ.

²⁶'Ba Ilaaja bäŋ ŋat mo ii jääŋ baŋ gø dï määr thuunhnhi moøgø, 'ba beeye baŋ cï thøø keere mana en yi Dharepeth, yi po jø Caydan, na jääŋŋi baŋ gø.

²⁷Ni da jiy mo thööth yi Icriel mo dëëtge da dhøøbø[5] kanya bëët nyikuŋ Jwøki ma Ilaaca. Ni bäŋe ya aciel dïge mo dëëre odwøk kare, 'ba beeye Neeman keere na køny, na näk nyï Ciria.»

²⁸'Ba jøøa en yi øt acooŋ lam bëët, kanya wïnyge gïïögø, cwïnyge ajïtö ki gootø døc.

²⁹Ni öge maal ni cöörge Jecu wøk ki dï paac ni peege gø deŋ apala mana näk poge ogeer bääte, kiper nee cöörge piny ki bäät apala.

³⁰'Ba ena pöödhö ki dïge ni aae.

³¹Ni ö Jecu ni ci yi Kapernaam, paac mo ena yi Galili. Ni pwöny jiy ki cäŋ jwömö.

³²Ni rëëm yïthge ki pwöye, kiper pwöc mare yie da teek.

³³'Ba yi øt acooŋ lam manøgø da dhaanhø mo dëëre da jwøk mo raac, ni kööe ki dwøl mo päl,

³⁴ni «?Wui, ï na Jecu nyï Nadhareth, agïnaŋø noo tïïyï ki waani? ?Ï ööa kuna raanynyï waani? Ï ŋääa, ni ïïna ŋata en kur keere na näk mar Jwøk.»

³⁵'Ba ajook Jecu, ni kööe, ni «Lïŋï, ni ööï wøk ree.» 'Ba na nø gøyi ya jwøa raaci enø ki piny dïge, aö wøk dëëre, ni bäŋ gïn mo leth mo ee tïïö dëër gø.

³⁶'Ba geni yïthge arëëm bëët, ni cäänge yïthakicge keerge, ni «Man a teeŋ luumma ŋø! Këël juuga reyø aköömme ki teek, ni öge wøk!»

³⁷Ni ö gïre ni wïnye dï mïëyögø bëët.

³⁸'Ba Jecu aö maal, ni aa wøk ki yi øt acooŋ lam, ni ci po Cayman. 'Ba kanyøgø mii cï Cayman tuu ka adïrïgi mo teek. Ni kwacge eni kipere.

³⁹Ni gääŋe bäät gø ni jook adïrïgi, ni put adïrïgi aae dëër gø. Ni ö nyijøøgø ni put ö maal ni tïny geni.

⁴⁰'Ba kanya tïme ni cäŋ pätha piny, jiy akännö ki jiy mo tuu ki täwe ma teeŋi baŋ Jecu. Ni kïth ceŋŋe bäätge bëët, ni dwøk dëëtge kare.

⁴¹Ni ö anäge thuwø ni öge wøk dëët jiy mo thööth ni ge rëëdö, ni «Ïïni, ïïna O Jwøk.» 'Ba gena jooe ni ba wëëk ge cäänö, kiper ŋäcge ni beeye eni na Krictø.

⁴²'Ba na tïme na amöölla, Jecu aay ni ci paap kany mo bäŋ jiy. Ni ö jiyi ni manyge eni, ni öge baŋe, ni ge manynya eni man bëëde buutge ni ba aay.

⁴³'Ba Jecu aköö jïge, na «A cøøa kuna køba luumma nyään na met kiper buc Jwøk jï mïëri møga thuwø, kiper beeye gïnögø na jääŋ aani kipere.»

⁴⁴Ni tïme ni køpa luum Jwøk yïth uut acook lam mo Judia.