Read anuak Luk 5 Bible Online

Luk 5 - anuak bible

Luk 5

¹'Ba dïcäŋ aciel Jecu acuŋŋö bäät Puul Genedharet,[6] ni tïm jiyi ni rïïya bääte kiper nee luum Jwøk wïnyge.

²Ni joot jïëthe ariiø yi naam. Ni dïbïth rec onø ö wøk yïthge, ni ge pïnyö ka ajääpi moge.

³Ni eth yi jääy aciel røkge, mana näk mar Cayman, ni pëëny gø nee jääy nyiik yi naam mëëth. Ni pï piny ni pwöny jiy ki yi jääy.

⁴'Ba kanya nø lønye ki pwöc, ena köö jï Cayman, ni «Nyiik jääy dï naam, ni leeŋï ajääpi moi, niï mägï.»

⁵'Ba aløk Caymanni, ni «Dïpööy, waana bïdhö ki wäär bäre, ni bäŋe gïn mo ewa joodø. 'Ba kiper luummï nø, ajääpi oleeŋa.»

⁶'Ba na nø tïïcge gøøni, gena mägö ki lwaa rëëö mo päl. 'Ba na tïm ajääpi ni manynya cöötö,

⁷jøøa bïthge ki geni moa en yi jääy maya arwaacge, nee öge kuna kønyge geni. Ni öge ni pääŋge jïëthe moge karge riet. Ni tïm jïëthe ni manynya mudö.

⁸'Ba Cayman Piter na joot gïnögø, ena put päth tiet Jecu, ni kööe, ni «Paany riï buuta, Kwäärö, kiper aana dhaanhø ma ŋat raay.»

⁹Kiper eni ki jøøa en buute bëët cwïnyge abwøk døc, kiper rec moa makge.

¹⁰Këël Jeemeth ki Jøøn wäät Dhebedi, na näk jø wø bïdhö ki Cayman, gena bwøk thuwø. 'Ba Jecu aköö jï Cayman, ni «Kärï lwäyö. Køør man ennø, ïïno tïmö na dïbïth jiy.»

¹¹'Ba na nø kälge jïëthe moge ya ageela, jammi bëët awiige piny ni caathge køør Jecu.

¹²'Ba kanya poode ni Jecu ena yi pääny aciel dï mïëyögø, nyen mør mo dëëre ogääbö bäre ki dhøøbø[7] aöö. 'Ba na joot Jecu, dëëre aleeŋ piny nyïm gø, ni kwac gø, ni «Wui Kwäärö, ni näk ïïno jïëy, dëëra diï dwøga kare.»

¹³Ni ö Jecu ni rwaak cere baŋ gø ni mul gø, ni kööe, ni «Aana jïëy, dëërï døø kare!» Ni ö dhøøbe ni put aay dëër gø.

¹⁴Ni kööm gø, ni «Kär dee ŋat mo caanï gø jïre, 'ba ciï ni nyoothï riï jï dïlämi, ni cïpï ko olämi kiper døøn dëërï kare, keda mana caan Modhe, ni wø näk ŋïï jï jiy.»

¹⁵'Ba kanyøgø gïr Jecu acäŋ wïnynyö døc ni pööth kany mo bäär. Ni ö lwaae mo thööth ni öge kuna wïnyge mare, nee ŋwiili mo wø en dëëtge køny thuwø.

¹⁶'Ba ki kwör møøk Jecu wø cøøa paap ni läme.

¹⁷'Ba dïcäŋ aciel dï nïrögø, ni Jecu pöö, da jø Paricith ki dïpööye mo ciik Jwøk mo opï piny kaace, mo ge ööi ka yïth mïëc Galili bëët, ki Judia, ki Jerucalem. 'Ba teek Wuuö Jwøk ena bääte ki man køny jøøa tuu.

¹⁸'Ba kanyøgø jø møøk aöö mo käädö ki dhaanhø mo obäp ki bäät pëëm ni ge manynya man kïthge gø yi øtø, nee eni pïëlge nyïm Jecu.

¹⁹'Ba na jootge gø ni bäŋ jöö mo kïthge gø yi øtø ki gø kiper lwaak, gena eth maal wï øtø, ni lwarge gø piny ki pëëme ki kany mo ŋaam nyïm Jecu dï jiy.

²⁰'Ba na ö Jecu na neen ŋäädhe marge, ena köö, ni «Nyie nyawat, raay moï awec.»

²¹'Ba dïpööye mo ciik Jwøk ki jø Paricith gena tägö ki man cäänge ki cwïnyge, ni «?Man a ŋa ni cäänö ka ajaany en? ?Aŋa na doo wec raay? ?Aŋø, paa Jwøk keere?»

²²'Ba na ŋäyi ya Jecu ni ge cara luupögø ki cwïnyge, aløøe jïge, na «?Aŋø ni cäänu na enø nø ki cwïnynyu en?

²³?A mane ni jööta eni na doo caanø, ki man købi ni ‹Raayï awec›, wala ki man caani, ni ‹Ö maal, ni cäädhï›?

²⁴'Ba kiper nee ŋäyu nø ni Wär Dhaanhø jïre da teek bäät piny ki man wec raay,» ena köö jï ŋata näk obäp, na «A cäänna ïïni, ö maal ni lwørï pëëmï, ni ciï paac.»

²⁵Ni put ö maal nyïmge bëët, ni lwør gïna näk eno pïël yi gø, ni aa paac, ni jiema Jwøk.

²⁶Ni ö jiyi ni rëëm yïthge bëët, ni jiemge Jwøk, ni geno lwäyö døc, ni köge, ni «Øøna jïtö ki gïn mo rëëma ec dïcäŋi.»

²⁷'Ba køør gïnögø, Jecu ena aay, ni joot ŋat ma ŋat ajwäk mo cwøl ni Libay,[8] no opï piny kar ajwäk. Ni kööe jïgø, «Ö køøra.»

²⁸Ni ö Libayi ni wii jammi bëët piny, ni ö maal, ni läp køør Jecu.

²⁹Ni ö Jecu ni tïnynyi ya Libayi ka atïya mo päl paare. 'Ba da jø ajwäk mo thööth ki jø møøk ma acämö ki geni.

³⁰Ni ö jø Paricithi ki dïpööye mo ciik Jwøk moa näk jø Paricith ni ŋurge ki nyeŋ bääge, ni köge, na «?Aŋø ni cämu ni mädhu ki jø ajwäk ki jø raay en?»

³¹Ni løgi ya Jecu jïge, ni «Jø wø dëëtge jööt ba many akïïm, 'ba beege jø wø tuu.

³²Aani, a ba ööi naa cwøla jøøa beyø, 'ba a öönynya jø raay nee cwïnyge løkge.»

³³Ni köge jï Jecu, ni «Bääk Jøøn wø lämö ki lam-wödö cooth, keda man wø tïïc bääk jø Paricith thuwø, 'ba bäägï, ge cämö ni ge mädhö jaak.»

³⁴Ni løgi ya Jecu jïge, na «?Aŋø, wëët nywöm dou wëëk wödö ni cø nyakøø poot ena dïge?

³⁵'Ba nïne oööi, kanyo ö cø nyakøøe noo lwøri dïge; ki yïth nïröke nø, beeye noo wötge.»

³⁶Ni ö eni ni cään ge thuwø ki luubö mo keda leer, ni kööe, ni «Bäŋ dhaanhø mo jëëö thääŋ abïï mo nyään wøk ni rap gø dëër abïï mo otøp. 'Ba ni näk tïïe tïïö, eni jeeya mana nyään jaak, ni ö thääŋ abïï mana nyään ni tïm kïte ni ba röömi ka abïï mana näk otøp.

³⁷Ni bäŋ ŋat mo doo kïtha køøŋ nyïïomøki mo nyään yïth opïc pëëne mo otøp. 'Ba ni näk mo tïïe tïïö, køøŋ nyïïomøki mana nyään opïyögø cööte cöötö, ni øc køøŋe piny, ni ö opïri ni ränyge.

³⁸'Ba køøŋ nyïïomøki mo nyään doo kïtha yïth opïc pëëne mo nyärö.

³⁹'Ba ŋat mo onø mäthö ki køøŋ nyïïomøki mana näk oruuö ba many man mäthe këët ki mana nyään, kiper eni köö, ni ‹Mana näk oruuö meta eni.› »