Read anuak Luk 7 Bible Online

Luk 7 - anuak bible

Luk 7

¹'Ba køøre na ö Jecu na nø thöör luupe bëët ni wïnynyi ya jiyi, ena ci Kapernaam.

²'Ba kanyøgø da kwääy dïkuye ma dïpa mo jïre da laŋŋø mo pere leth døc jïre. 'Ba laŋŋøgø tuu ni kare cään ki thøø.

³'Ba na wïny gïr Jecu, jaae møøk mo jø Juuth ajääŋŋe baŋ gø, nee eni pëënynye ki man ööe nee laŋŋe kønye.

⁴'Ba na öge baŋ Jecu, ena kwaacge døøc, ni köge, ni «Ŋatøce orømø ki man tïïyï gïn jïre,

⁵kiper eni mëër ki pøø ni øt acooŋ lam marø geera eni.»

⁶Ni put Jecu aay ki geni. 'Ba na cään kare ki øtø, kwääy dïkuye nyïïawääte ajääŋ baŋe, ni caana gø, ni «Kwäärö, dëërï kär öölï, kiper a patha orømø ki man wëëga ïïni ööny paara.

⁷Ni beeye tiere na kööa naa patha orømø ki man ööa baŋï. 'Ba cäännï ki luubö keere; køøre, laŋŋø mara dëëre ojöönni.

⁸Kiper aani, aana dhaanhø mo bëënna teek ŋat mør, ni jïra da jø tøŋ mo ena cera, maa doo köö ka aciel, ni ‹Ciï,› ni dee cøø. Ni kööa jï mør, ni ‹Ööï,› ni dee öö. Ni daa laŋŋa cäännö, ni ‹Tïïc gïn,› ni dee gø tïïö.»

⁹'Ba na ö Jecu na wïny luum ŋatøgø, yie arëëm, ni løø ree baŋ lwaa cäädhö køøre, ni kööe, na «A cäänna uuni, ni këël dï jø Icriel, teeŋ ŋäädhe ma enøgønø poot kära joodø.»

¹⁰'Ba kanya døø jøøa jääŋŋi yøø øtø, laŋŋø ajootge ni dëëre ojöönnö.

¹¹'Ba køøre cään, Jecu aci paac mo cwøl ni Neeyin, ni ö bääge ki lwaak mo päl ni cige ki eni.

¹²'Ba na tïm kare ni cään ki dhi kiir paanøgø, da dhaanhø mo othøw mo di käärö, ni kïtha wøk, 'ba beeye wäädö keere jï menni. Ni nyijøøgø beeye cï thøø. 'Ba lwaak mo päl mo käla dï paac ena buute.

¹³'Ba na ö Kwäärö na joot nyijøøgø, cwïnye apädhö ki gïr gø, ni kööe jïgø, «Kärï jwöŋö.»

¹⁴Ni ci nyïm ni gut pëëm, ni ö jøøa tïëdö ni cuŋge. Ni kööe, «Nyie, dïcwøø, a cäänna ïïni, ö maal.»

¹⁵Ni ö ŋata näk othøw ni ö maal, ni pï bäät thare, ni put cäänö. Ni ö Jecu ni mëëk gø mii gø.

¹⁶Ni put lwärri öö bäätge bëët, ni jiemge Jwøk, ni köge, ni «Nyikuŋ Jwøk mo dwøŋ athïïŋ dïïø, ni Jwøk lïïma jiye.»

¹⁷Ni ö gïre manøgø ni wïnye dï Judia bäre, ki yïth mïëya en ŋää paac bëët.

¹⁸'Ba bääk Jøøn gïïa tïïc Jecu bëët acaange jï Jøøn.

¹⁹Ni ö Jøønni ni cwøl bääge ariiø baŋe, ni jääŋ geni baŋ Kwäärö ki man pëënyge gø, ni «?Bee ïïni, ŋata wäŋŋi ni öö, wala cäŋwa dhaanhø mør neetø?»

²⁰'Ba na pïïc jøøgø buut Jecu, gena köö, ni «Jøøn na näk dïlööy na nyuudhi waana jääŋ baŋï, ni pëënynya ïïni, ni ‹?Bee ïïni, ŋata wäŋŋi ni öö, wala cäŋwa dhaanhø mør neetø?› »

²¹'Ba yi caannøca Jecu jø täwe mo thööth akønye, ki jøøa dëëtge da ŋwiili, ki jøøa dëëtge da juuga reyø, ni dwøk nyeŋ cööye mo thööth karge.

²²Køøre aløk Jecu jï jøøa jääŋŋi, ni «Cou ni caannu gïïa neennu na wïnynyu jï Jøøn, ni jøøa näk cööye nyeŋge adøø karge, ni ö ŋööte ni cääthge, ni ö jøøa näk dëëtge da dhøøbø[10] ni døø dëëtge karge, ni ö meŋŋe ni wïnyge luup, ni ö jøøa näk othøw ni tïŋ ge maal ki yi thøø, ni ö jøøa canni ni køp luumma nyään na met jïge.

²³Gwïëth en bäät ŋat maa käre taaø.»

²⁴'Ba na nø aac jøøa jääŋ Jøønni, Jecu atägö ki man caan gïr Jøøn jï lwaak, ni kööe, na «?Agïnaŋø na cou baŋe paap nee neennu? ?Aŋø, u cøøa baŋ otöök mo tuuŋŋa jame?

²⁵?A uuno cøøa baŋ ŋø nø, nee neennu? ?U cii nou neena ŋat mo oruyö ka abïïe mo beyø? Neennu, jø wø käär abïïe mo beyø ni wø bëëdö yi kwär, wø ena mïëc nyeye.

²⁶?Agïnaŋø nø, na cou baŋe nee neennu? ?Beeye nyikuŋ Jwøk? Kare møn, a caana gø jïïu, ni eni kaala cer nyikuŋ Jwøk.

²⁷Ŋatøgø beeye ŋata göör gïn kipere yi wëël Jwøk, na køp, «ni ‹Neenï, a jääŋŋa nyïïatwiel mara nyïmï, ŋato jiiŋ jöörï nyïmï.›

²⁸A caana gø jïïu, ni bäŋ dhaanhø mo dwøŋŋa kare ki kar Jøøn dï jøøa nywøl määnni. 'Ba eni na kare thiinhnha eni yi buc Jwøk, tïmö ni dwøŋŋa eni ki Jøøn.»

²⁹'Ba jøøgø karge bëët ki jø ajwäk, na wïnyge gïnögø, gena köö, ni «Mar Jwøk beer,» kiper mana kwøŋ ge lwøk ki lwøk na nyuudhi mar Jøøn.

³⁰'Ba jø Paricith ki jø wø caan tiet ciik Jwøk, mar Jwøk na manynye kiperge akwierge, ni kär geni lwøø na nyuudhi ki ri lwøk mar Jøøn.

³¹Ni kö Jecu, ni «?Beenhnhi en, a daa gø päärö ki ŋø, ni ge caalge ŋø?

³²Ge caala obwöre mo opï piny kar ŋïëw, ni cøøra rege, ni köge, «ni ‹Waani opelø akoothwa jïïu, ni käru miel. Ni jwöŋwa ki jwøk thøø, ni käru jwöŋö.›

³³Kiper Jøøn na näk dïlööy na nyuudhi na nyuudhi aöö, ni ba cämö ki møø, ni ba mädhö ki køøŋø, ni kööu, ni ‹Wïïe da anägö.›

³⁴'Ba Wär Dhaanhø aöö ni cämö ni mädhö, ni kööu, ni ‹Neennu, ŋat wärö na ŋat maath, na nyawat jø ajwäk ki jø raay.›

³⁵'Ba leec wïc ojoot na adïëri ki ri nyïëdi moe bëët.»

³⁶'Ba Jecu apëëny ŋat Paricithi mør nee ge cämge ki gø paare. Ni ci po ŋat Paricith manøgø, ni pï piny kar cam.

³⁷'Ba kanyøgø da dhaagø mo bëëdö päänyögø, ma ŋat raay. 'Ba na wïny gø ni Jecu cämö yi øt ŋat Paricith manøgø, ena kännö ki wïl maaw mo ŋwääö ni met,

³⁸ni cuŋŋe ŋää gø kany mo cään ni jwöŋö, ni tïm pï nyeŋŋe ni cwïëra bäät tiet Jecu, ni pooc gø ki jïëye, ni nuum tiet gø, ni wïïr ge ki maarøgø.

³⁹'Ba kanya ö ŋat Paricith manøgø, ni beeye ŋata cwøl gø baŋ cam, na neen gïnögø, ena köö ki cwïnye, «Onää ŋati nyikuŋ Jwøk møn, dhaaŋŋøgø dee ŋääö, na a teeŋ dhaagø mo nyïëdi ni muur gø enø, kiper nyaanøgø ŋat raay.»

⁴⁰'Ba aløk Jecu ni kööe jïgø, «Nyie Cayman, da gïn mo caana caanø jïrï.» Ni løk gø, ni «Caanï nø, dïpööy.»

⁴¹Ni kööe, ni «Da ŋat mo owëëk jiy ariiø mac jape. Na aciel maya dïpe abïïc, 'ba maya maya pïërabïïc.

⁴²'Ba na dhäthe jïge ki cool, awëëk geni, karge riet. ?A mane nø, ni mëëye okadhø ki gø dï jøø na ariiø yøø?»

⁴³Ni løgi Caymanni, ni «Ki jïra, beeye ŋata wëënne ki japa thööth.» Ni kööe jïgø, na «Acaanï na kare.»

⁴⁴'Ba køøre ree aløø baŋ dhaaŋŋøgø, ni kööe jï Cayman, «?Dhaaŋŋi en ajootï? Aana duny ødï, ni kärï a mooø ki pïï kiper tieta, 'ba eni tieta atïïe ni thec ki pï nyeŋŋe, ni pooc ge ki jïëye.

⁴⁵Ni kärï a nuumø, 'ba eni kanya ööa yi øtø, tieta poot käre wiiø ki nuum en.

⁴⁶Ïïni, wïïa kärï wïïrö ki maaw, 'ba eni tieta awïïre ki maaw mo ŋwääö ni met.

⁴⁷Kiper manøgønø, a caana gø jïrï, ni raaye ni thööth yøø awec, kiper mëër mare okadhø. 'Ba ŋat wø wëënni ki gïn mo thiinh, mëëye thiinh.»

⁴⁸Ni kööe jï dhaaŋŋøgø, ni «Raayï awec.»

⁴⁹Kanyøgø jøøa en kar cam ki eni, gena tägö ki man cäänge yïthakicge, ni «?Man a ŋa, ni köö en, ni këël doo naa raay wiie wiiø?»

⁵⁰Ni kö Jecu jï dhaaŋŋøgø, ni «Ŋäädhe marï ïïna pieme. Ciï nø ki met ec.»