Read anuak Luk 8 Bible Online

Luk 8 - anuak bible

Luk 8

¹'Ba na tïme na køør nïne mo nøk, Jecu aay ni caatha dï mïëri moa døøŋŋø ki moa therø, ni pöö, ni køpa luumma nyään na met kiper buc Jwøk. 'Ba bääge na näk apaar kurriiø nut ki eni,

²ki mään møøk thuwø, jøøa køny ki juuga reyø ki ŋwiili na en dëëtge, ni beege Meeri na cwøl ni Magdalin, ŋata öö anäga näk abïriiø wøk dëëre,

³ki Jöwaana cï Cudha, ŋata tïny Eerat, ki Cucana, ki mään møøk mo thööth. Mään moøgø wø känna wøk ri japge ni kønyge Jecu ki bääge ki ge.

⁴'Ba kanya ö lwaaki mo päl kanya ciel, ni tïm jiyi ni ööa baŋ Jecu ki tiet mïëri, luubö mør acaane na leer, ni kööe, ni

⁵«Da dïpïïdhi mo oaa wøk kuna jør kööthe. 'Ba na jude, møøk apäth thääŋ jöö, ni nyøri ki tiel, ni ö wenynyi ni camge ge.

⁶Ni päth møøki kany mo da kïdi. 'Ba na tucge, gena waaŋ ni talge, kiper na näk karge otal.

⁷Ni päth møøki yïth koodhi, ni ö koodhi ni døøŋge ki geni na aciel, ni bøøcge ge.

⁸'Ba møøk apäth yi ŋöömö mo beer, ni døøŋge ni känge ki nyeŋ ma dïpe.» 'Ba kanya caan gïnögø, dwøre atïŋ maal døc, ni kööe, ni «Nee da ŋat mo jïre da ïdhi mo wïnye ki ge, beerra man cek ïthe.»

⁹'Ba na ö bääge na pëënyge eni ki tier luummögø na caane kaamar leer enø,

¹⁰ena köö, ni «Beeye uuni na wëëk ŋäc tiet luup moa näk tietge okwøŋ kan kiper buc Jwøk. 'Ba ki jï jø møga, luupögø caan kaamar leer, kiper noo neenge gø, ba jootge; ni wïnyge gø, 'ba tiere ba kwanyge.

¹¹'Ba tier leer manøgø beeye en. Köödhi beeye luum Jwøk.

¹²'Ba moa päth thääŋ jöö caala jiy mo wø wïny luum Jwøk; 'ba anägö öö, ni käl luubö wøk cwïnyge, kiper nee ge ba jïëcge ni ŋääthge, nee ge piem.

¹³'Ba moa päth kany mo da kïdi, ge caala jø wø laar jïëy ki met ec kany wø wïnyge luum Jwøk; 'ba jïge bäŋ lweedi, ni ge jïëy ka kany mo thiinh keere. 'Ba kany wø dee päänynyö, ge wø laara døø cään.

¹⁴'Ba moa päth yïth koodhi, beege jø wø wïny luum Jwøk, 'ba kany wø bëëtge, ge bøøc ki køør gïï wø lääŋge ki cwïnyge, ki jap kwär, ki jap wø many dëëlli, ni ba jïtge ki nyïëdi.

¹⁵'Ba moa piith yi ŋöömma beer, beege jø wø wïny luum Jwøk ni putge gø mak na bäre bäre ki cwïny mo leer ma adïëri, ni känge ki nyeŋ ni cwïnyge ege cïp piny.

¹⁶«'Ba bäŋ ŋat mo nyep lamba ni cäŋ gø rïëpö ki gïrpiny, wala kïthe tier pëëm, 'ba wø cïbe bäät tharabëëta, kiper nee jø wø dunynyi, nee tar neenge.

¹⁷Ni bäŋe gïn mo okanø, mo ba cäŋ nyoothø, ni bäŋ gïn mo omooŋø, mo ba cäŋ käl wøk yi tar.

¹⁸Kiper manøgønø, cegu ïthu døøc ki gïn wïnynyu en. Kiper ŋat wø jïre dagø, møøk ocäŋ cïpö jïre. Ni ŋat wø jïre bäŋgø, këël man wø caare ni mare, di lwørø.»

¹⁹Kanyøgø mii Jecu ki nyïïmenni aö baŋ Jecu, 'ba gena tïmö ni ba maar ci buute kiper lwaak.

²⁰Ni købi jïre, ni «Meru ki nyïïmeru cuŋŋö wøk, ni ge manynya ïïni, niï neenge.»

²¹'Ba ena kö jïge, ni «Mera ki nyïïmera beege jø wø wïny luum Jwøk ni kïthge gø bäät tïïc.»

²²'Ba dïcäŋ aciel Jecu aci yi jääy ki bääge, ni kööe jïge, ni «Cøø løøga.» Ni putge tïŋŋö.

²³'Ba kanya cääth jääyi, ena butö. Ni ö atuunna ni kwön naam, ni tïm jääyi ni manynya man pääŋe ki pïï, ni jääy manynya mudö.

²⁴Ni cige baŋ Jecu ni jiecge gø ni köge, «Dïpööy, Dïpööy, øøna thøw!» Ni pääe ni jook atuunna ka athaŋŋøgø ni raac enø. Ni cuŋge, ni put pinynyi nibäc.

²⁵Ni kööe jï bääge, ni «?Ŋäädhe maru en kaa?» Ni lwäcge, ni rëëm yïthge, ni cäänge yïthakicge keerge, ni «?Man a teeŋ dhaanhø mo nyïëdi en, ni këël atuunna ka athaga jooe jooø, ni leŋge luumme?»

²⁶Kanyøgø Jecu ki bääge gena pïï po jø Gadarin, na dïët ki Galili.

²⁷'Ba na eth Jecu wøk bäät ageela, nyen mør mo käla pääny aö baŋe mo wïïe da anäge, mo obëëdö ki kany mo bäär ni cäädhi ka dëëre ni bäŋ abïïe, ni ba bëëdö paac, 'ba wø beeta dï bwör.

²⁸'Ba na joot Jecu, ena köök døc ni put päth nyïm gø, ni cäänne ki dwøl mo päl, na «?Agïnaŋø noo tïïyï ki aani, Jecu, O Jwøa Dwøŋ ni en Maal? A kwaya ïïni, naa ba caarï.»

²⁹Kiper jwøøgø na raac enø, akööm Jecu, nee ö wøk dëër ŋatøgø. Kiper eni wø maaŋ jwøøgø maaŋŋø ki kwöre mo thööth. Ni eni wø di koorø no otwöö ko oguudi ki thøøli, 'ba gïïögø wø cööte cöötö, ni bwødhi ya anäge paap.

³⁰Kanyøgø ena pëëny Jecu, ni kööe, ni «?Nyeŋŋï aŋa?» Ni løk gø, ni «Aana Liijan,» kiper anäge mo thööth na en ri gø.

³¹Ni ö anäge ni kwacge Jecu, nee geni ba köömme ki man cige yi buura näk bäye bäŋ cuŋŋe.

³²'Ba kanyøgø da pïïth othur mo päl mo cämö nyäär thuur. Ni kwacge Jecu nee ge wëëk ciin dëët othuri. Ni wëëk ge wääth.

³³Kanyøgø anäge aö wøk dëër ŋatøgø, ni cige dëët othuri. Ni ö pïïth othuri, ni dhoothge ya ageella bäär yi naam ni mutge.

³⁴'Ba na ö dïkwääc othuri na neenge gïna tägö, gena reeŋø, ni caange gø paac, ki mïëya en wøk.

³⁵Kanyøgø jiy aci wøk kuna neenge gïna tägö; 'ba na pïïcge buut Jecu, ŋata aay anäge dëëre anwänge no opï piny tiet Jecu, dëëre ka abïï ni wïïe odøø kare. Ni putge lwäyö.

³⁶'Ba jøøa neen gïna tägö, køny mana køny ŋata näk dëëre da anäge ki gø acaange jï jøøa öö.

³⁷Kanyøgø Jecu akwac jø Gadarin bëët nee aae buutge, kiper cwïnyge ajïtö ki lwär mo päl døc. Køøre ena ci yi jääy ni døøe.

³⁸'Ba ŋata aay anäge wøk dëëre Jecu akwaae, nee eni bëëde ki gø. 'Ba ena wëëk Jecu wääth, ni kööe jïgø,

³⁹ni «Døø pou, ni køpï gïna dwøŋ na tïïc Jwøki kiperï.» Ni aae, ni køp gïna dwøŋ na tïïc Jecu kipere dï paanøgø bäre.

⁴⁰'Ba kanya døøk Jecu, ena pänh lwaaki, kiper ge bëëdö ni ge køya eni bëët.

⁴¹'Ba kanyøgø nyen ma kwääy øt acooŋ lam aöö, mo nyeŋŋe cwøl ni Jaayra, ni päth tiet Jecu, ni kwac gøøni nee ö paare,

⁴²kiper eni jïre da nyaare ma nyakøø ma aciel keere, mo cwiic dööŋŋe jïtö ka apaar kurriiø. 'Ba eni tuu ni manynya thøø. 'Ba kanya poot Jecu ni cäädhö ni aa po Jaayra, jiy atïmö ni rïïya bääte.

⁴³'Ba dhaagø mør aöö ki ŋääe, mo dëëre bëëdö ni cwïër ki remø ki cwiiri apaar kurriiø; 'ba bäŋ ŋat mo maar lønyø jïgø ki man køny gø.

⁴⁴Ni ööe ki ŋää Jecu ni gut deŋ abïï gø, ni ö remme ni put cöö dëëre.

⁴⁵Ni kö Jecu, na «?Aŋa na gut aani?» 'Ba na ö jiyi na kweecge rege, Piter ki jøøa en buute aköö, «Dïpööy, ïïno rum lwaaki dïër, ni ge rïïya bäätï.»

⁴⁶'Ba Jecu aköö, ni «Da dhaanhø mo ogut aani. Kiper ajooda ni da teek mo oaay dëëra.»

⁴⁷'Ba kanya ö nyijøøgø na joot gø ni eni ŋäc, ena ö nyïm ni dëëre kwanynyi ni päth nyïm Jecu, ni køp gïna gut gø kipere nyïm jiy bëët, ki kanya put dëëre jöönnö.

⁴⁸Ni kö Jecu jïgø, «Nyaara, ŋäädhe marï dëërï awëëk jöönnö. Ciï nø ki met ec.»

⁴⁹'Ba kanya poode ni poot cäänö, nyen mør aöö ki po kwääy øt acooŋ lam, ni kööe, ni «Nyaarï anø thøw. Kär dïpööy öölï këët.»

⁵⁰'Ba Jecu na wïny gïnögø, aköö jï Jaayra, ni «Kärï lwäyö, 'ba ŋäc ŋäädhe keere. 'Ba eno køny.»

⁵¹'Ba na ö yi øt Jaayra, bäŋ dhaanhø aciel mo ee wëëk dønyø ki eni, 'ba beeye Piter ki Jøøn ki Jeemeth, ki wää nyakøønnøgø ki menni keerge.

⁵²'Ba kaagø jiy bëët ge jwöŋö ni ge göö ko oduuru kipere. 'Ba Jecu aköö, ni «Käru jwöŋö, kiper eni kär thøw, 'ba mare niine.»

⁵³Ni ö geni ni ŋeethge bäät gø, kiper na ŋäcge gø ni nyilaal othøw.

⁵⁴'Ba Jecu cer nyilaal amaae, ni cwøl gø, ni «Nyilaal, ö maal.»

⁵⁵Ni duu jwïëye, ni put ö maal. Ni kööm geni, ni «Mooyu eni ki gïn came.»

⁵⁶Ni ö jøøa nywøl gø ni thäŋ yïthge. 'Ba gena köömme nee bäŋe dhaanhø mo caange gïna tägö jïgø.