Read anuak Tiet Ciik 1 Bible Online

Tiet Ciik 1 - anuak bible

Tiet Ciik 1

¹'Ba moi beege luup moa caan Modhe jï jø Icriel bëët kanya enge dï paap løø Naam Jördan, yi gool mana cwøl ni Araaba na näk dïët ki Cup, ni ge ena yïthakic kanya cwøl ni Paran ki mïëri moa cøøri ni Töpel, ki Laban, ki Adhëëröth, ki Didhaap.

²'Ba ki man tïŋŋö ki tier Kïn Körëp, ni beeye Kïn Caynay, ni cøøa Kadëc-Bernia, ni cørra jöö mana cør tier Kïn Cëër, beeye wääth mo jïtö ki nïne apaar kurciel.

³'Ba kanya päŋ cwiiri moa ö jø Icrielli wøk ki yi Ijep na pïëraŋween, ri dwää apaar kurciel, yi cäŋ mana dïkwøŋ, Modhe acäänö ki jø Icriel ki køør luup bëët moa köömmi ya Wuuö Jwøki ki ge ni caane jïge.

⁴Ni gïïögø acaan Modhe ni Cëëwön nyeny jø Amör na bëëdö yi Ëcbön, ki Ög nyeny Baacan na bëëdö Actaröth ki Edaray, ee nø böötö.

⁵'Ba kanya poode ni jø Icriel ena løø Naam Jördan yi ŋööm Möap kaagø, Modhe atägö ki man pwöny geni ki ciik Jwøk, ni kööe,

⁶ni «Wuuö Jwøk, Jwøk marø, acäänö ki øøni bäät Kïn Körëp, ni kööe, ni ‹Uuna nø bëëdö ki kany mo bäär lak kïdi man.

⁷Ööu maal ni aayu, ni cou po jø Amör mïëya en bäät kïte, ki mïëri mo jøøa en buutge bëët moa en yi goor Naam Jördan ni wø cwøl na Araaba, ki mïëri moa en bäät thuuri, ki moa en ŋöömma näk ree ee päärö, ki moa en kanya cwøl ni Nëgëp, ki moa en bäät naama dwøŋ, ni ŋøøpøgø bëët beege ŋøøp jø Keenan; ni cou kanya cwøl ni Libaanø këël mano këët Upareeti na näk naam mo dwøŋ.

⁸Neennu, ŋöömmögø anø cïba jïïu; cou yie ni lwørru gø, ni tïme na maru, ni beeye ŋöömma kööŋa kipere, a na Wuuö Jwøk, kiper nee cïba jï kwäyu, ni beege Eeberam ki Aydhak ki Jeekap, këël nyïïkwaacge moo lämmi køørge.› »

⁹'Ba Modhe aköö, na «Acaana jïïu kar kaaca, ni ‹Ba løny jïra keera ki man käära uuni.

¹⁰Wuuö Jwøk na näk Jwøu uuna nø tïïe nou thööth, ni dïcäŋi ennø, u thööth kaamar ceer mo maal.

¹¹Beerra man ö Wuuö Jwøki na näk Jwø kwäyu ni meet kwäännu, ni tïmu nou thööth nou kaala kwäännu ennø ki kwöre ma kuma, ni gwïëth uuni keda mana buuk gø jïïu.

¹²?Aŋø, olønye jïra keera nidïï nø ki man käära uuni kaamar tëër, ni käära öölö maru ki pïëm maru?

¹³Jëëtu ki jiy mo käla wïth tuŋi mou, mo nyeŋge reegø mo wïthge leer, na jiy mo oŋïyö ki tïïc, kiper nee ge cuuma bäätu.›

¹⁴Ni løgu gø jïra ni kööu, ni ‹Gïna caanï nee tïïc enø beeye gïn mo beer.›

¹⁵«Køøre jiy moa näk dïbwöthe mo wïth tuŋi mou, jøøa wïthge leer na näk oŋïyö ki tïïc, gena lwøra ni cuuma geni na kwääri bäätu, ni tïïa geni na kwääc lwaae mo wø käär jiy ma kuma, ki mo wø käär jiy ma dïpa, ki mo wø käär jiy ma pïërabïïc, ki mo wø käär jiy ma apaar, ni tïïa geni na kwääri kiper wïth tuŋi mou.

¹⁶'Ba kar kaace jøøgø ni wø ŋøl luup mou aköömma, ni kööa, ni ‹Wïnynyu luup mo wø tägi yïthakic jø pou, ni ŋøllu luup na karge mo wø tägi yïthakic dhaanhø ki nyï poge, wala jur mo bëëdö buutu.

¹⁷Käru jëëdö kany wø ŋøllu luup. Luum ŋata kare thiinh wär leŋŋu ni caala man wø leŋŋu luum ŋata kare dwøŋ. Kär näk mo u lwäära dhaanhø, kiper ŋøl luup ena baŋ Jwøk. 'Ba ni näk da luubö mo odhäthö jïïu, wär kälu baŋa. Køøre aani, luummeca wïnynya wïnynyö.›

¹⁸'Ba kar kaace uuna köömma ki gïïa dou tïïö bëët.»

¹⁹«Køøre øøna tïŋŋö ki tier Kïn Körëp, ni aaø ki dï paaba dwøŋ na näk di lwäär ki yie, ni beeye paaba jootu, ni ø cøra jööra ci po jø Amör, na en mïëya en bäät kïte, kaawat mana ö Wuuö Jwøki na näk Jwøø na kööm øøni, ni putø pïï Kadëc-Bernia.

²⁰'Ba aana köö jïïu, ni ‹Uuna pïï kany mo cään ki ŋööm jø Amör, na en mïëya en bäät kïte, noo cïp Wuuö Jwøki na näk Jwøø jïïø.

²¹Neennu, Wuuö Jwøk na näk Jwøu ŋöömö anø cïbe jïïu. Cou yie ni lwørru gø na maru, kaawat mana nø caani ya Wuuö Jwøki na näk Jwø kwäyu jïïu. Käru lwäyö, ni ba bwøk cwïnynyu.›

²²«Køøre uuni bëët uuna ö baŋa ni kööu, ni ‹Beerra man jäägø ki jiy nyïmmø kiper nee ŋöömö liewge jïïø, nee duuge nee luum øtjöö mana døø cør yie ki päänye moo cøø yïthge nee caange jïïø.›

²³«Ni mïn yia ki gïna caannu, ni lwöta ki jiy apaar kurriiø røgu, ni ŋati man nø käla wï tuuŋ man nø.

²⁴Ni tïŋge ni cige mïëya en bäät kïte ni pïïcge gool mana cwøl ni Ëcköl, ni liewge gø.

²⁵Køøre gena lwötö ki nyïïjenni røk nyïïjenni moa no ociek yi ŋöömmece, ni kälge gø baŋø. Ni caange gïna jootge jïïø, ni köge, ni ‹Ŋöömmo cïp Wuuö Jwøki na näk Jwøø jïïø beeye ŋöömö mo beer.›

²⁶«'Ba yïthu atïmö ni teek ki man cou yie, ni kwierru luum Wuuö Jwøk na näk Jwøu.

²⁷Ni ŋuru yïth oduŋkaare mou, ni kööu, ni ‹Kiper mana män Wuuö Jwøki ki øøni, øøna käl wøk ki yi ŋööm Ijep, kiper nøø cïp ceŋ jø Amör, nee wïthø dïïre.›

²⁸Ni kööu, na ‹?A kaa ŋø noo cøø yie nø? Nyïïmëëgø cwïnynyø amoocge ki lwär, ni köge ni jø Amör beege jiy mo dëëtge døøŋŋø ni bäyö ni kaala øøni, ni päänye moge døøŋŋø, ni kiiri moge ogeerø ni teek ni bäyö døc. Ni köge thuwø ni wäät Anak, na näk dëëtge døøŋŋø døc, ajootge kaace.›

²⁹«Køøre aana cäänö ki uuni ni kööa, ni ‹Kär cwïnynyu bwøk, ni ba lwäyu ki geni;

³⁰kiper Wuuö Jwøk na näk Jwøu, ni wø cäädhi nyïmmu, eni ki dëëre okëëdi kiperu, kaawat mana tïïe kiperu Ijep ki dï paap, ni nëënö jïïu ki nyeŋŋu.

³¹'Ba kanya enu dï paap kaace, gïna tïïc Wuuö Jwøki na näk Jwøu ajootu, ki mana käär uuni ki kwöra caathu bëët, keda man wø ö dhaanhe wø käär wääde, ni käär uuni këël mana pïïyu kany.›

³²'Ba ki yïth gïïögø bëët, Wuuö Jwøk na näk Jwøu käru ŋäädhö,

³³ni beeye eni ni wø cäädhi nyïmmu ri wääth maru, nee kwör mo beyø manynye jïïu kiper twëëre mou. Ni beeye eni na bwøth uuni ni ena yi pöölö ki yi cäŋ bäre, ni pööllögø liel kaamar maac ki yi wäär bäre, kiper nee øtjöö mana dou cør yie nyoodhe jïïu.

³⁴«Køøre luup moa caannu awïny Wuuö Jwøki, ni wëëre ni put kööŋ, ni kööe,

³⁵ni ‹Bäŋ dhaanhø aciel røk jøøi ii ni en yi beenhnhø man ni raac en mo doo neen ŋöömma beer na kööŋa kipere nee cïba jï kwäyu.

³⁶'Ba beeye Kalëp o Jöpöni noo neen gø. Ni ö ŋöömma nyøøne ki tiete ni cïba gø jïre ki jï wääte, kiper mana cäädhe køør Wuuö Jwøk ki cwïnye bäre.›

³⁷«'Ba Wuuö Jwøk awëër ki aani thuwø kiperu, ni kööe, ni ‹Këël ïïni, ï ba ci yi ŋöömmögø.

³⁸'Ba Jøcua o Nun, ni tïny ïïni enø, oci kaace. Beerra man cømï cwïnye nee bëëde ni teek, kiper eni jø Icriel otïïe nee ŋöömmögø ci jïge na marge.

³⁹Køøre, obwöre mou moa wäŋŋu ni di maaø ki tøŋ, ni beege wäätu moa näk poot bäŋ gïn mo ŋäcge kiper gïn mo beer ki gïn mo raac, geno ci kaace; ni cïba ŋöömmögø jïge, ni lwørge gø na marge.

⁴⁰'Ba uuni, ööu maal ni cou dï paap, nou cøra jöör wø ci Naama Kwaar.›

⁴¹«Køøre aløgu jïra ni kööu, ni ‹Waana bääyö dëër Wuuö Jwøk. 'Ba ennø, wa cøø ni këëtwa kaawat mana ö Wuuö Jwøki na näk Jwøø na kööm øøni.› Ni ö ŋati man nø dïïu ni lwør jap leny mare, ni tïïyu gïr ciin mïëya en bäät kïte na gïn mo jööt jaak.

⁴²«'Ba Wuuö Jwøk aköö jïra ni caana jïïu, ni kööa, ni ‹Käru ci baŋ leny ki geni, kiper aani, a na Wuuö Jwøk, a ba en dïïu. Kiper ni näk mou cøø, u bööt nyïïmännu böötö.›

⁴³Ni caana gïnögø jïïu, 'ba mara käru maar wïnynyö. Ni kwierru luum Wuuö Jwøk, ni tïm wïthu ni teek jaak, ni putu ci baŋ leny mïëya en bäät kïte.

⁴⁴Ni ö jø Amör moa bëëdö mïëya en bäät kïte ni öge wøk baŋu, ni riemge uuni kaawat man wø ö kïci wø riem dhaanhø, ni nyathge uuni yïth ŋøøp Cëër këël mana këëtu paana cwøl ni Örma.

⁴⁵Køøre uuna duuö ni jwöŋu nyïm Wuuö Jwøk; 'ba Wuuö Jwøk döötu käre maar leŋ, ni käre ïthe ciiø ki gïru.

⁴⁶Køøre uuna put bëëtö yi Kadëc ki kany mo bäär, ni putu ruuö kaace jaak.»