Read anuak Tiet Ciik 12 Bible Online

Tiet Ciik 12 - anuak bible

Tiet Ciik 12

¹«'Ba moi beege ciik ki luup ŋøl moo koorru wïthu ki ge noo gwøgu këël yïth nïr kwøw mou moo beetu bäät ŋøøm, ni beeye ŋöömmo cïp Wuuö Jwøki na näk Jwø kwäyu jïïu nou lwørru na maru.

²Wïth juurre moo ŋøøpge lwørru, kwör wø lamge juu moge yïthge bëët moa en bäät kïte moa bäyö, ki moa en bäät thuuri, ki moa en tiet jenni moa näk onigïït piny bëët wär raanynyu na bäre bäre.

³Ni raanynyu gïï wø cïpge olämme moge bäätge, ni tøgu kïte moa näk ege cwöth piny kiper nee lamge, ni ö jera näk ege tieŋø na näk ocaa ri jwøa cwøl na Acara ni waaŋŋu geni ki maac, ni ö gïïa näk ege tieŋø na juu ni ŋødu ge piny, ni raanynyu nyeŋge kaace ni tïmge ni kuc na bäre bäre.

⁴«'Ba uuni, Wuuö Jwøk na näk Jwøu ba dou lamø kaawat man wø ö jøøgø wø lamge juu moge.

⁵'Ba u doo cøøa kuna wøørru Wuuö Jwøk na näk Jwøu kanyo jiere noo caa ri nyeŋŋe nee tïme na kar bëëtö mare røk kwöro bëët wïth tuŋi mou yïthge.

⁶Ni cïpu olämme mo wø waaŋ bäre, ko olämme møøk, ki paac wïth japu, ko olämme mo wø cïp ki køør kööŋ, ki muuce ma teeŋi mo wø cïp ki met ec jaak, ki kaai mo dhäk mou ki mo dïëk mou kaace.

⁷'Ba kaace ŋati man nø dëëtu ki jø paare ge doo cämö nyïm Wuuö Jwøk na näk Jwøu, ni mïn yïthu ki køør tïïe mou bëët moa ö Wuuö Jwøki na näk Jwøu na gwïëth uuni ki ge.

⁸«'Ba kanyo pïïyu yi ŋöömmo cïp Wuuö Jwøki jïïu, u ba doo tïïö ki teeŋ gïï ni poot temmø dïcäŋi en, ni ŋati man nø Wuuö Jwøk wøøre wøørø ki jöö mana manynye jaak;

⁹kiper mana näk mou poot kär pïï kar jwömö, ni beeye kanyo dööŋ jïïu na maru noo cïp Wuuö Jwøki na näk Jwøu jïïu.

¹⁰'Ba uuni, u ŋuta løøga løø Naam Jördan, nou bëëdu yi ŋöömmo cïp Wuuö Jwøki na näk Jwøu jïïu noo dööŋ jïïu na maru, ni ö Wuuö Jwøki ni mooc uuni ki jwöm, ni bäŋ gïn mo lwäärru kiper nyïïmän mou bëët moo en lagu.

¹¹'Ba kaace, kanyo jier Wuuö Jwøki na näk Jwøu noo caa ri nyeŋŋe, gïï köömma uuni ki ge bëët wär kïthu yie, ni beege olämme mou mo wø waaŋ bäre, ko olämme møøk, ki paac wïth jammi mou, ki muuce mou ma teeŋi, ko olämme moa no ojierø ni beyø ge mo wø cïpu jï Wuuö Jwøk ki køør kööŋ.

¹²'Ba yïthu doo mïnnö nyïm Wuuö Jwøk na näk Jwøu, uuni ko obwöre mou moa näk cwøw ki moa näk mään, ki jø tïïc mou moa näk cwøw ki moa näk mään, ki ŋat tuuŋ Libay man nø mo bëëdö ka uuni, jøøa näk bäŋ ŋöömö moo dööŋ jïge na kurge yïthakiyu.

¹³'Ba gwøgu rou ki man ba cïpu olämme mou mo wø waaŋ bäre kwör wäru jootu jaak,

¹⁴'ba olämme mou mo wø waaŋ bäre dou cïbö kanyo jier Wuuö Jwøki yi ŋööm jø tuuŋ aciel røk wïth tuŋi mou bëët, ni tïïyu gïïa köömma uuni ki ge bëët kaace.

¹⁵«'Ba ŋati man nø løny jïre ki man ŋäde ri lääc paac moe ni cam rïŋ gø paare kaawat mana manynye jaak, ki køør gwïëth mano cïp Wuuö Jwøki na näk Jwøu jïïu. Ni ŋat mo waany ki ŋat mo ba waany[4] løny jïge ki man cämge, kaawat man wø cam rïŋ aŋer ki rïŋ purra jaak.

¹⁶'Ba remø keere kär cammu; wär kønynyu piny kaamar pïï.

¹⁷'Ba gïïa no omänö ki man cammu ge yïth mïëri mou beege caammi mou moa dou cïbö na paac wïth jammi ki mo kwøk nyïïomøki mou, ki mo mädhi mou, wala kaai mo dhäk ki mo dïëk mou, wala olämme mou mo wø cïp ki køør kööŋ, wala muuce mou ma teeŋi mo wø cïp ki met ec jaak.

¹⁸'Ba gïïögø ocammu nyïm Wuuö Jwøk na näk Jwøu kanyo jiere, nou cämu ko obwöre mou moa näk cwøw ki moa näk mään, ki jø tïïc mou moa näk cwøw ki moa näk mään, ki ŋat tuuŋ Libay man nø mo bëëdö ka uuni; ni mïn yïthu nyïm Wuuö Jwøk na näk Jwøu ki køør tïïe mou bëët.

¹⁹'Ba gwøgu rou ki man ba jarru jø tuuŋ Libay ki yïth cwiiri bëët moo beetu yi ŋöömmu.

²⁰«'Ba kanyo ö Wuuö Jwøki na näk Jwøu noo nyaanh keew maru kaawat mana caan gø jïïu, kanyo parru rïŋö ni kööu, ni ‹Wa manynya cam ki rïŋö,› løny jïïu ki man cämu ki rïŋö kaawat mana manynyu jaak.

²¹'Ba ni näk po dhaanhø bäär ki kanyo jier Wuuö Jwøki na näk Jwøu noo caa ri nyeŋŋe, løny jïre ki man ŋäde ri dhäk moe ki ri dïëk moe moa cïp Wuuö Jwøki jïre, kaawat mana köömma uuni, ni løny ki man cäme paare kaawat mana manynye jaak.

²²Rïŋŋögø doo camø kaawat man wø cam rïŋ aŋer wala rïŋ purra jaak, ni ŋat mo waany wala ŋat mo ba waany løny jïre ki man cäme.

²³'Ba gwøgu rou ki man ba cammu remø, kiper remø beeye jwïëy, ni jwïëy ba dou camø ki rïŋö na aciel.

²⁴Remø wäru kønynyu piny kaamar pïï, ni ba cammu gø.

²⁵'Ba remø kär cammu, kiper ni näk mo ba cammu, tïmö ni gïn mo tiir nyïm Wuuö Jwøk, ni tïme ni beer kiperu ko obwöre mou moo ööi køøru.

²⁶'Ba gïïa näk you cïp kur keerge jï Wuuö Jwøk, ko olämme mou mo wø cïp ki køør kööŋ, u doo cøø ni kïthu ge kanyo jier Wuuö Jwøki.

²⁷'Ba olämme mou moøgø mo wø waaŋ bäre, rïŋ moge ki remø marge wär cïbu bäät gïn wø cïp olämme bääte mar Wuuö Jwøk na näk Jwøu, ni ö olämme mou møga ni kønynyu remø marge piny bäät gïn wø cïp olämme bääte mar Wuuö Jwøk na näk Jwøu, ni cammu rïŋ moge.

²⁸'Ba gwøgu rou ki man leŋŋu luup bëët mo köömma uuni ki ge ii, nee tïme ni beer kiperu na bäre bäre, ko obwöre mou moo ööi køøru, kiper ni näk mo luup you leŋø, tïmö ni gïn mo beer mo tiir nyïm Wuuö Jwøk na näk Jwøu.

²⁹«'Ba kanyo ö Wuuö Jwøki na näk Jwøu noo thöör wïth juurre moo en nyïmmu, nou cou baŋge nee ŋøøpge lwørru na maru, kanyo nø lwørru ŋøøpge nø, nou bëëdu yïthge,

³⁰rou wär gwøgu nee wïthu ba maaŋŋi ki man caathu køørge. 'Ba kanyo tïme ni ge di thöörö nyïmmu, kär dee gïn manynyu ri juu moge. Kanymør u köö, ni ‹?Wïth juurre moi juu moge ege tïnynyö nidïï? Waani thuwø wa tïïö ka teeŋ mana tïïcge.›

³¹Kär dee teeŋ gïn mo caala manøgø mo tïïyu dëër Wuuö Jwøk na näk Jwøu, kiper jøøgø jammi bëët moa näk yi Wuuö Jwøk raac ki ge, na mäne ki ge, beege ni wø tïïcge jï juu moge. Kiper geni, këël obwöre moge moa näk cwøw ki moa näk mään wø waaŋge waaŋø no olämme jï juu moge.

³²«'Ba gïï köömma uuni ki ge bëët ii, beerra man gwøgu ge, ni kïthu ge bäät tïïc, ni ba meetu ge, ni ba kännu wøk rege.